¹ Athu a vula a di hwile gisalo gia gu sonega ndaga ja balegele mu katshi dietu, ² ha gu tala phila athu wanyi a tu sonegele najo katuga ha luyandigu ma themwe a ndaga jene a kitugile enya gisalo gia ndinga yene. ³ Hene, n'eme nji, nga mona gima gia bonga mukunda ngu jiya mwa bonga sha luyandigu lwa ndaga jene mukunda n'eme ngu gu sonegele, mukanda umoshi wa bonga eye Teyofile. ⁴ Nga tshigina egi u jiye kielega dia malongi wanyi wa longeye. ⁵ Mu tangwa Elode a kalele fumu wa gu Yudeya, gwa kalele nganga nzambi mu moshi mu jina dia Zakari, wa kalele mu gimvuga gia nganga nzambi Abiya. Mukajenji wa kalele mu gikanda gia Aroni, jina dienji Elizabeti. ⁶ Khungi'awo muyadi a kalele athu a bonga gu twama dia nzambi, a kalele mu lemvuga gu shigo jikima ja Fumu. ⁷ Uvi a kalele nu mona go mukunda Elizabeti wa kalele gikunia, enji a kalele muyadi'awo nu mvula ja balega. ⁸ Gilumbu gi moshi Zakari wa kalele mu kita gisalo gienji gia nganga nzambi gu twama dia Nzambi, mukunda ya kalele tangwa dia gimvuga gienji, ⁹ mu phila ya shigo ya gisalo giene gia gi nganga nzambi, mwene wa phoneye ha gu mu hana makapho a vumba mu katshi dia inzo ya isambu ya Fumu. ¹⁰ Athu akima a kalele honze mu isambu mu tangwa dia gu hana makapho. ¹¹ Wanjo wa Fumu wa mu zogele mu gisagumwisa, wa maganele gu koko dia gi tata dia hama ha nu tambigiya makapho. ¹² Ha gu mona wanjo mwene Zakari wa vile woma. ¹³ Uvi wanjo wa mu lezele egi: " U vi woma go, Zakari mukunda isambu yaye ya viya. Mukajaye u mu gu butila mona yala mba u mu hwa jina dia Yowani ¹⁴ Mba u mu gu kalele gima gia kiese, enji athu a vula mba a mu vwa kiese ha gu butuga gwenji. ¹⁵ Mukunda mba u kala muthu wa koma gu twama dia Nzambi, mba gwa nwi go matombe. Mba u kala wa zala nu pheve Santu katuga mu vumo dia ginenji. ¹⁶ Mba u mu vutula athu a vula a gu Izalayele gwa Nzambi wawo. ¹⁷ Mba udi mu wenda gu twama dia athu, mu ngolo nu pheve ya Eliya, mukunda nu gu vutula mitshima ya a tata gwa anawo enji nu nu gu twameza iphumbulu ha gu wenda mu njila ya gu tema nu masonga, mukunda nu gu londela fumu athu a mu phoneye. ¹⁸ Zakari wa lezele wanjo egi: " Phila khi mba ngu jiya ? mukunda ngu di nga mbuta muthu enji mvula ja gubuta ja mukajami jidi ja balega." ¹⁹ Wanjo wa vutudile egi: " Eme Gabidiyele, yonu wa nu magana gu twama dia Nzambi. Nga tumiya ha guza mu gu leza nu gu guhwa ngenji ya bonga. ²⁰ Tala, u mu bwa wa gatabu ti nu gilumbu mba gi salama ndaga inyi nga gu lezele wa kondela gukwikila." ²¹ Athu a kalele mu nenga Zakari a yitugile ha gu mona egi kinga ha gu zoga hama ha gijila gia mu inzo nzambi. ²² Tangwa a zogele, wa bwile gatabu, enji a bagishile egi wa lota nzoji mu katshi dia hama ha gijila gia mu inzo nzambi. Wa kalele mu zwela mu njila ya idimbu mukunda wa kitugile gatabu. ²³ Hadi tangwa dienji dia gisalo dia suga, wa vutugile mu gisapha gienji. ²⁴ Gu nyima dia ga ilumbu mukajenji Elizabeti wa zudile vumo. Wadi swegele ngonda jitano, wa zwelele egi: ²⁵ " Tala gima gia ngu kitila Fumu wami; wa ngu mba diso ha gu manesa sonyi gu twama dia athu." ²⁶ Mu ngonda ya gi sambano ya vumo dienji, wanjo Gabidiyele wa tumiye gwa Nzambi mu dimbo di moshi dia gu Galileya jina diadio Nazareti, ²⁷ gwa mona mukhetu mu moshi wa konda gu jiya mwila wa yala wa kalele wa feto zudiya mu dibala gwa mona yala mu moshi mu jina dia Yozefi wa mu gikanda gia Davidi. Mona mukhetu mwene jina dienji Mariya. ²⁸ Wanjo wa ngidile mu inzo yenji wa mu lezele egi: " Kala nu kiese, eye wa viya khenda, Fumu udi mu katshi diaye." ²⁹ Ha gu vwa nganyi wa yitugile enji wa di hudile ikhi ya jiya gu kala disongidila dia mbote yene. ³⁰ Wanjo wa mu lezele egi: " U vi woma go, Mariya, mukunda wa viya khenda gu twama dia Nzambi. ³¹ Tala u mu zula vumo enji mba u mu buta mona yala,mu jina dia Yesu. ³² Mba u kala muthu wa koma wa funu enji mba udi mu tamegeya egi Muna Nzambi wa Gosa. Fumu Nzambi mba udi mu mu hwa gife gia Gifumu gia Davidi shenji. ³³ Mba udi mu yala mvula jikima gikanda gia Davidi, gifumu gienji mba gi kala nu suga go." ³⁴ Mariya wa vutudile wanjo egi: " Phila khi ndaga yene mba i salama mukunda ngu jiya gami mwila wa yala go?" ³⁵ Wanjo wa mu lezele egi: " Pheve santu mba idi mu gu bulumwila enji ngolo ja Fumu wa Gosa mba jidi mu gu tshiga sonyi jikima. Mukunda mona mba u butuga mba u kala Santu, mba u mu tamegeya egi Muna Nzambi. ³⁶ Tala, Elizabeti wa phangi'aye nu mwene udi gu vumo kaka mu gi mbuta gienji vumo diene didi dia ngonda ji sambano; mwene wa tamegeye gikunia, ³⁷ mukunda gu shi nu gima gia phashi gwa Nzambi go." ³⁸ Mariya wa zwelele egi: " Ngu di gami nga muthu waye wa gisalo Fumu. Ndaga jene ji balege mu phila wa yindudile: " Hene wanjo a katugile. ³⁹ Mu tangwa diene dinyi, Mariya wa ile mu phushi mu dimbo di moshi dia ha mulundu dia gu khanda ya yuda. ⁴⁰ Wa ngidile mu gisapha gia Zakariya wa hwile Elizabeti mbote. ⁴¹ Tangwa a tambudile mbote ya Mariya mona wa di nyigishile nu kiese mu vumo dienji. Elizabeti wa zalele nu Pheve Santu. ⁴² Wa kabugile nu gu zwela egi: " Udi wa sagumuga mu katshi dia akhetu akima enji lusagumunu lu kale nu mona udi mu vumo diaye. ⁴³ Ngu di nga nanyi hene gina Fumu eza mu ngu tala ? ⁴⁴ Mukunda tangwa nga vwa mbote yaye mu matshi ami, mona mu vumo wa balumuga ni kiese. ⁴⁵ Kiese gwa yonu wa kwikila egi ndaga jinyi wanjo a gu leza mu jina dia Fumu mba jidi mu salama kaka nganyi." ⁴⁶ Mariya wa zwelele egi: " Monyo wami u mu hana lukumu gwa Fumu, ⁴⁷ enji pheve yami idi nu kiese gwa Nzambi, mu gulwishi wami. ⁴⁸ Mukunda wa ngu tala mu diso dia bonga eme mukhetu ngu di nga muthu wenji wa gisalo. Hene katuga tangwa didi athu akima u mu kala mu ngu tamega egi mwenya kiese. ⁴⁹ Mukunda Muthu wa ngolo jikima wa kita ndaga ja koma mukunda nu eme; jina dienji didi Santu! ⁵⁰ Khenda jenji ja nu ya mvula nu mvula gwa athu wanyi a nu mu jitisa. ⁵¹ Wa kitile isalo ya koma gu mago enji nu gu phanza athu wanyi a nu yindula egi adi athu a lulendo. ⁵² Wa katudile mafumu a koma ha ife yawo ya gifumu nu gu hana lukumu gwa athu wanyi a konda lukumu. ⁵³ Enya nzala wa nu gu a hwa ima ya vula, mvwama wa nu gu a tambula ima ikima nu gu a vutula mago a thugu. ⁵⁴ We jile mu salesa enya gu izalayele wanyi a nu mu salela, nu gula gu jimbila ndo ha gu leza khenda jenji gwa a shetu, ⁵⁵ mu phila a tele laji gwa Abalayama nu gwa enya gikanda gienji mvula nu mvula." ⁵⁶ Mariya wa henele mu inzo ya Elizabeti ngonda ji tatu, hene a vutugile mu inzo yenji. ⁵⁷ Tangwa dia gu buta Elizabeti dia lungile, wa butile Mona yala. ⁵⁸ Athu a nu jinga nenji phene phene nu aphangienji a gikanda adi a vwa egi Fumu wa mu kitila ndaga ya koma a vile kiese gia vula. ⁵⁹ Mu gilumbu gia nana a ile nu mona mwene ha gu mbiya gu luyotisi. A tshiginile gu mu hwa jina dia shenji Zakariya. ⁶⁰ Uvi ginenji wa zwelele: " Jina dienji Yowani." ⁶¹ A mu lezele egi : " Mu gikanda gietu gu shi nu muthu udi nu jina diene go." ⁶² A hudile shenji mu idimbu ha gu a leza a jiye jina khi dia gu mu hwa. ⁶³ Wa lombele maseso a gu sonegela wa sonegele egi : " Jina dienji Yowani." Athu akima a yitugile. ⁶⁴ Mu tangwa diene, kano dienji dia kangugile. Wa yandigile gu hana lukumu gwa Nzambi. ⁶⁵ Hene wanyi akima a kalele mu jinga nawo phene-phene a vile woma wa vula. Membo a mu khanda ya gu Yudeya a jiyile ndaga jene. ⁶⁶ Wanyi akima a vile ndaga jene a ji hagele gu mutshima nu gu zwela egi : " Mona mwene mba u kituga nanyi ? Koko dia Nzambi didi mu katshi dienji. ⁶⁷ Shenji Zakariya wa zalele nu pheve santu, wa yandigile gu longa athu ndinga ya Nzambi nu gu zwela egi : ⁶⁸ " Fumu a zule lusagumunu, Nzambi wa enya gu Izalayele, mukunda weza mwene ha khenji mu tala athu enji nu gu a katula mu gihiga. ⁶⁹ Wa tu zolela mu gulwishi wa ngolo mu gikanda gia Davidi, muthu wenji wa gisalo. ⁷⁰ Mu phila a jiyishile mu kano dia ma profeta a mu tangwa dikulu. ⁷¹ We ji mu tu katula ha mago a mbeni nu ha mago a athu a nu tu vweza. ⁷² Wa leza khenda jenji gwa a shetu, ⁷³ nu gu yibuga mu phila a salele lusilu gwa Shetu Abalayama. ⁷⁴ Gu nyima ya gu tu katula ha mago a mbeni jetu ha gu mu sambela konda guvwa woma, ⁷⁵ mu njila ya gi santu nu masonga gu meso enji ilumbu ikima ya lujingu lwetu. ⁷⁶ Eye munami, mba udi mu tamegeya profeta wa Nzambi wa gosa, mukunda mba udi mu wenda gu twama dia Fumu ha gu londa guza gwenji, ⁷⁷ nu ha gu jiyisa athu enji egi mba udi mu a gulusa nu gu a katula masumu. ⁷⁸ Nzambi wetu mba u mu tu vila khenda. Hene mu njila ya khenda jene, mba udi mu tu zogela mu phila tangwa dia nu zoga ha gu tu hwa mwanya, ⁷⁹ ha gu lema ole mwenya wa gosa. Mba udi mu leza athu a nu jinga mu phipha mwanya nu wanyi a nu vwa woma wa lufwa. Ha gu tu bata mu njila ya ngemba. ⁸⁰ Mona mwene, wa yandigile gu kula nu gu kituga ngolo mu gi pheve, wa ile mu begela genji mu temu dia fufuta fufuta ti nu gilumbu ginyi a jiyishile ha gu di monesa gwa athu a gu Izalayele.