¹ Gu tshigina gwa gi phangi gu khale kaka mu katshi dienu. ² Mu jimbila go gu yamba a nzenza, mukunda athu ako a yambele ma wanjio konda gu jiya. ³ khalenu mu yindula enya bologo, ha gu mona egi mudi mu mona nawo phashi. Khalenu mu yindula athu wanyi a nu moneseya phashi, n'enwe nji mu mone phashi adi mu mona. ⁴ Muthu mukima a jitise makwela. Muthu mukima wa kwela a jitise mbeto ya makwela, mukunda Nzambi mba udi mu sambesa enya uthambi nu enya ndaga jia bola. ⁵ Mu gu wenda gwenu mu kala mu haga mutshima gu falanga go. Khalenu mu jingila ima mudi nayo, mukunda Nzambi mwene ha khenji wa zwelele egi: " Mba ngu shi mu gu bemba go ata gabiyo." ⁶ Tu kalenu nu gikesa tangwa tudi mu zwela egi: " Fumu mwene wa nu ngu salesa, ngu shi mu vwa woma wa gima go." Ikhi muthu a jiya gu ngu kita?" ⁷ Yindulenu mambuta enu a dibundu wanyi a mi longele ndinga ya Nzambi, enji yindulenu ndaga jia bonga jidi mu katuga mu lujingu lwawo. Hatenu lukwikilu lwawo. ⁸ Yesu Kilistu udi giteso gi moshi hamene, magino ti nu mvula nu mvula. ⁹ Mu kala go mu hata malongi a phila nu phila nu malongi a nzenza, mukunda idi ya bonga mutshima u zule gikesa mu njila ya luzolo, uvi mu njila ya ima ya gudia ndo inyi ya nula gu kwatesa ndo wanyi a nu lemvuga. ¹⁰ Tu di nu gathamba ga gu tambigila ima mu katshi dia gisapha gia tenta, wanyi a nu kita gisalo mu katshi dia gisapha giene a shi nu nswa go ya gudia ima idi mwene. ¹¹ Menga a mbiji jinyi jia shiyiye mukunda nu masumu a nu balega gwa fumu wa nganga nzambi hama ha shigo, uvi mbiji jene jia nu wokieya go mu katshi dia dimbo. ¹² Mukunda nu nganyi Yesu gwa fila mu katshi dia dimbo, uvi wa file gonze, mukunda menga enji a katule athu enji mu masumu. ¹³ Tu zogenu gu ngando, tu ye gonze, tu ye gwa mwene mukunda a tu yegule mu phila a mu yegudile. ¹⁴ Mukunda haha ha mavu tu shi getu nu dimbo go dinyi dia nu jinga mvula nu mvula. ¹⁵ Tangwa dikima tu hanenu lukumu gwa Nzambi, lukumu lwene ludi ole makapho a mu jina dia Yesu. Disongidila egi, ta jiyile gu hwila go ha gu kumisa jina dia Nzambi mu makano etu. ¹⁶ Mu jimbila go ha gu kita ndaga ja bonga enji mu kala mu salesa aphangi'enu ako, mukunda Nzambi wa nu tshigina makapho a phila inyi. ¹⁷ Kalenu mu lemvugila mambuta enu a dibundu, enji mu kala mu a vila. A nu langidila mionyo yenu, mukunda a feto jiyisa ndaga jene gwa Nzambi mukunda nu gisalo giawo. Gula mudi mu a lemvugila gisalo giawo a mu gi sala nu kiese, uvi nganyi ndo, mba a mu kita gisalo nu phashi, ebuna ndaga ja phila yiyi ja jiyile go gu mi salesa. ¹⁸ Kalenu mu tu sambela Nzambi tangwa dikima. Tu jiyenu mwa bonga bonga egi tu di nu mutshima wa bonga, mukunda tu di nu luzolo lwa gu kita ndaga ja bonga tangwa dikima. ¹⁹ Uvi gima gia thomo gi ngu di gu mi bondila, mu kala mu samba Nzambi mu phila egi a ng hwe njila ya guza mu mi vutugila. ²⁰ Nzambi wa zugishile Fumu wetu Yesu gu lufwa, mukunda nu menga enji. Yesu wa kitugile muthu wa koma yonu wa nu tala mameme. Mukunda nu menga enji, gudi visa gwa mvula nu mvula gwa nu monega. Nzambi wa ngemba a mi hwe ngolo mukunda nu gu kita ndaga jikima jinyi ja bonga jinyi a nu tshigina. ²¹ A tu kitile mu jina dia Yesu Kilistu, ndaga jinyi mwene a nu mona ja bonga, enji tu hane lukumu gwa Yesu Kilistu mvula nu mvula. Amen. ²² Aphangi'ami, ngu mu mi bondila ha gu kita ndaga yiyi ngu mu mi leza mukunda nu gu mi hwa gikesa, mu kange mutshima ha gu ji vwa, mukunda ndaga jiji ngu mu mi sonegela gu mukanda wuwu jishi ja vula go. ²³ Nga tshigina mu jiye egi phangi'etu Timote wa zoga mu bologo. Gula weza mu phushi phushi, mba ngu mu mu zula ha guza nenji njila imoshi tangwa mba ngu za ha gu mi tala. ²⁴ Hanenu mbote ya vula gwa mambuta a dibundu nu gwa a kilistu akima. Aphangi a gi Italia a mi tumila mbote. ²⁵ Luzolo lwa Nzambi lu kale mu katshi dienu.