¹ Mu tangwa dikulu, Nzambi wa khalele mu zwela gwa a khakha mu njila ya ba profeta a vula mu phila jia vula. ² Uvi mu ilumbu yiyi ya suga, udi mu tu longa mu njila ya munenji, yonu a phonele ha gu khala mona wa gifugo gia ndaga jikima. Idi mu njila yenji Nzambi a salele thotho ikima. ³ Udi muthu wa nu monesa lukumu lwa Nzambi. Udi mu bumba ndaga jikima hama ha moshi mu njila ya ndinga nu ngolo jenji. Gu nyima ya go wova masumu, udi wa di tumbiga gu koko dia gi tata dia Fumu udi gosa gwa leha. ⁴ Wa kitugile wa gu balega ma wanjio mu njila ya jina a zudile didi dia lukumu dia balega diawo. ⁵ Mukunda wanjio khi mu katshi diawo khanji a zwela go egi: " Udi wa Munami wa yala, magino nga kituga nga shaye? Wa zwelele nji egi; " Ngu mu khala nga shenji, mwene Munami wa yala?" ⁶ Tangwa Nzambi a bulumwishile munenji wa thomo haha ha mavu, wa zwelele egi: " Ma wanjio akima a Nzambi a feto gu mu hwa lukumu." ⁷ Mu ndaga idi mu talela ma wanjio , wa zwelele egi: " Mwene udi mu kitula ma wanjio pheve, nu athu a gisalo soga jia tshiya." ⁸ Uvi mukunda nu Munenji wa zwelele egi: " Gife giaye gia Gifumu , Nzambi udi hene tangwa dikima. Gishina gia Gifumu giaye gidi gishina gia kielega. ⁹ Wa tshiginile masonga wa tuna ndaga jia bola, hene Nzambi, Nzambi waye a gu kungudile mafuta a santu a kiese a gu balega aphangi'aye." ¹⁰ Fumu, ha luyandigu wa hagele makunji a ha mavu, gosa gudi eye wa gu salele nu ngindu jiaye. ¹¹ Mba adi mu fwa, eye mba udi mu jinga, mba a mu bwa mambuta mu phila mulele wa nu kituga u kulu. ¹² Mba adi mu khala mu phila wa nu sudigiya gilumbu nu gilumbu, uvi eye udi gaye mu jinga phila imoshi mvula nu mvula. ¹³ Wanjio khi yonu Nzambi khanji a mu leza go egi: " Giza di tumbige haha gu koko diami dia madia ti nu tangwa nga mbo bwisa mbeni jiaye? ¹⁴ Keti ma wanjio a shi go pheve jinyi jia nu salesa ha gu tumiya muya mu keba athu wanyi mba a guluga?