¹ Mukunda nu nganyi tu feto keba mu ndaga ta vile. Mukunda muthu gu tu dimba ndo. ² Mukunda nu ndaga jia zwelele ma wanjo jia kalele jia kielega. Enji gu kulula shigo imoshi nu gukonda gu lemvuga gwa batele ndola. ³ Phila khi etwe lulu tu feto kita mukunda tu zangule lugulugu lwa koma? Lugulugu lwene lwa kalele Fumu wetu mbala ya thomo enji ya kumbudile ayi vile. ⁴ Nzambi wa zwelele mu njila ya idimbu ya khumbwa egi idimbu ya saleya ya phila nu phila, nu ndaga jia phila nu phila jia pheve santu ya kaphele muthu nu muthu mu phila ya luzolo, lwenji. ⁵ I shi gwa ma wanjo go Nzambi a vile mavu ha gutala ndaga yiyi tu mu zwelela. ⁶ Uvi muthu mu moshi wa zwelele khanda iko egi: " Muthu udi nanyi mukunda u mu yindudile? nga ndo Muna muthu udi nanyi u mu kwatese? ⁷ Wa salele muthu ndambu gosha ma wanjo. Wa sudigile lukumu nu mambote. ⁸ Nzambi wa hanele ima ikima gwa mwene, egi gwa mwene a hwiye ima ikima. Gwa bembele go ata gima gi moshi ha gu mu lemvugila. Lulu tu shi mu mona go ata gima gi moshi nu gu mu lemvugila. ⁹ Uvi tu mu mona yonu wa saleye mu ga tangwa ga moshi gosha ma wanjo: Yesu Kilistu, mukunda nu phashi nu lufwa lwenji, wa zudile lukumu nu khembo. Hene mu njila ya khenda ja Nzambi wa tuphudile lufwa lwa muthu nu muthu. ¹⁰ Ya kalele ya bonga mukunda nu Nzambi mukunda ima ikima idi mu jinga mukunda nu mwene gwa mwene, nu ha gu twala athu a vula gu khembo. Ya kalele ya bonga ¹¹ Mukunda yonu wa nu tambiga athu wanyi a tambigiye a nu katuga gwa muthu mu moshi. Mukunda nu nganyi gwa shi go nu sonyi ha gu a tamega nji egi aphangi. ¹² Wa zwelele egi: " Mba ngu mu jiyisa jina diaye gwa aphangi'ami, mba ngu mu gu yimbila khunga mu katshi dia gimvuga ." ¹³ Wa zwelele nji egi: " mba ngu mu mu hagela mutshima." Wa zwelele nji egi: " Tala, ngu di nu athu a ngu hwila Nzambi." ¹⁴ Hene, mukunda athu akima adi ana a Nzambi a nu kapha mwila nu menga, nu Yesu wa nu kapha nawo ima, mukunda mu njila ya lufwa, wa belesele yonu wa kalele nu giyega gia gu shiya, disongidila diabulu. ¹⁵ Ya salamele nganyi mukunda nu gu gulusa wanyi akima, mukunda nu lufwa a balegele mu njila ya gihiga. ¹⁶ Mu kielega ikima, gwa shi mu salesa ba wanjo go, uvi idi gwa gikanda gia Abalayama adi mu salesa. ¹⁷ Mukunda nu nganyi, ya kalele nu funu mukunda nu mwene ha gu kala ole aphangi'enji mu phila ikima mukunda a kituge fumu wa nganga-Nzambi wa masonga nu wa khenda mu ndaga ja Nzambi, enji mukunda nu gu totesela enya masumu. ¹⁸ Mukunda Yesu mwene ha khenji wa monele phashi enji wa phageye, lulu udi nu giyega gia gu salesa wanyi a nu phageya mu tangwa dikima.