¹ ئەی دەوڵەمەندەکان، ئێستا بە هۆی ئەو نەهامەتییەی کە کە چاوەڕێتان نەدەکرد، بگرین و بناڵێنن. ² سامانە زۆرەکەتان لە ناوچوو، جلە جوانەکانتان مۆرانە دەیخوات ³ ئاڵتون و زیوەکەتان ژەنگی هێناوە، ژەنگە شایەتحاڵتان دەبێت و گۆشتان دەخوات وەک ئاگر ئایا بۆ ڕۆژانی دوایی سامانتان کۆکردۆتەوە؟ ⁴ وە ئەمە کرێی ئەو کرێکارانەیە کە کێڵگەکانتان دروێنە دەکەن، ئەو کرێیەی کە تا ئێستاش بە ناڕەوا لێیان ڕادەگیرێت، هاوار دەکەن، وە هاواری هەر ئەو کرێکارانە لەلایەن پەروەردگاری سوپاسالارەوە بیستراوە! ⁵ ئێوە لەسەر زەوی بە خۆشگوزەرانی دەژین و خۆتان بە خۆشی و چێژەوە سەرقاڵ دەکەن؛ دڵتان قەڵەو بکەن وەک ئەوەی ئامادەبن بۆ ڕۆژی قوربانی. ⁶ ئێوە بێتاوانتان تاوانبار کرد و کوشتان، ئەویش بەرەنگارتان نەبۆوە! ⁷ سەبارەت بە ئێوەش، ئەی براکانم، بۆیە دانبەخۆتاندا بگرن، چاوەڕێی گەڕانەوەی پەروەردگار بن. وانەیەک لە جووتیارەکە وەربگرن: چاوەڕێی زەوییەکەی دەکات تا بەرهەمی گرانبەهای پێبدات، وەک چۆن دان بەخۆدادەگرێ تاوەکو بارانی پاییز و بەهار بەسەر زەویەکەیدا ببارێت. ⁸ بۆیە ئارام بگرن و دڵتان بەهێز بکەن، چونکە گەڕانەوەی پەروەردگار نزیکە. ⁹ ئەی برایان، لە بەرامبەر یەکتردا مڕومۆچ مەبن، تاکو بڕیار بەسەرتاندا نەدرێت. هەمیشە لەبیرتان بێت کە دادوەر زۆر نزیکە، ​​لەبەردەم دەرگاکەدایە. ¹⁰ ئەی براکانم، لە بەرگەگرتنی ئازار و دانبەخۆداگرتن، وەک پێغەمبەران بن کە بەناوی پەروەردگارەوە قسەیان کردووە. ¹¹ سەبارەت بەوانەی لە ئازاردا دانبەخۆدا دەگرن دەڵێین: «خۆزگە بەوان!» ئێوە گوێتان لە ئارامی و خۆڕاگری ئیۆڤ بووە، بینیتان کە پەروەردگار لە کۆتاییدا چۆن مامەڵەی لەگەڵدا کردووە. ئەمەش ئەوە دەردەخات کە پەروەردگار زۆر میهرەبان و بە بەزەییە. ¹² بەڵام پێش هەموو شتێک، ئەی برایانم، نە بە ئاسمان و نە بە زەوی و نە بە هیچ سوێندێکی تر سوێند مەخۆن. بەڵام با «بەڵێ»تان بۆ بەڵێ بێت، و «نەخێر»تان ئەگەر نەخێربێت. ئەمەش بۆ ئەوەیە بڕیارتان لە سەر نەدرێ. ¹³ ئایا کەسێک هەیە لە نێو ئێوەدا ئازار بچێژێت؟ با نزا بکات! ئایا لە نێو ئێوە کەس هەیە دڵخۆش بێت؟ با سروود بۆ خودا بڵێت! ¹⁴ هەرکەسێک لە ئێوە نەخۆشە، با بانگی پیرەکانی کڵێسا بکات، بۆ ئەوەی نزای بۆ بکەن و بە ناوی پەروەردگار بە زەیت چەوری بکەن. ¹⁵ ئەو نزایەی کە بە باوەڕ بەرزدەکرێتەوە، نەخۆشەکە چاک دەکاتەوە، وەک چۆن پەروەردگار تەندروستی بۆ دەگەڕێنێتەوە. ئەگەر نەخۆشییەکەی بەهۆی گوناهێکەوە بووبێت، پەروەردگار لێی خۆش دەبێت. ¹⁶ با هەر یەکێک لە ئێوە دان بە تاوانەکەیدا بنێت بەرامبەر بە براکەی، نزا بۆ یەکتر بکەن، تاکو چاک ببنەوە. ئەو نزا بە تینەی کە مرۆڤی چاکەکار دەیکات کاریگەرییەکی زۆری هەیە. ¹⁷ ئیلیاش وەک ئێمە مرۆڤ بوو، لە ڕێگەی نزاوە داوای لە خودا کرد کە بارانەکە ڕابگرێت. بەم شێوەیەش بوو، بۆ ماوەی سێ ساڵ و شەش مانگ دڵۆپێک باران نەبارییە سەر زەویدا. ¹⁸ پاشان نزای دووهەمی کرد، لە ئاسمان باران باری و زەوی بەرهەمی دا! ¹⁹ ئەی برایان، ئەگەر کەسێک لە ئێوە لە ڕاستی لابدات، و کەسێکی تر بیگەڕێنێتەوە، ²⁰ با دڵنیا بێت هەرکەسێک گوناهبارێک لە گومراییەکەی رزگار بکات، وەک ئەوەیە کەسێک لە مردن ڕزگار بکات و گوناهەی زۆر دادەپۆشێت!