¹ Pakwawakati kwapinda mazhuba mashoma , Jesu wakabwilila kuCapenawumi zwakawhika kuti upo kungumba. ² Nokudalo luvute lwabanhu lwakabungana yoko zokuti kwakashayika bugalo noponkoba pose, wakalebeleka iwhi kunayibo. ³ Pakalepo bamwe banhulume bakabebuza unhulume wakaba elichilima; banhu bana bekonyamula. ⁴ Pabakakonwa kusika kwaali nokuti kwakabeli noluvute lwabanhu, bakabhisa idenga yakabeli pezhulu paJesu, pakwakazhulika inzila, bakabheluja inhobo yakabelilele chilima yechiya. ⁵ Ebona kudimbwa kwabo, "Jesu wakati kuchilima, "Mwanangu, zubi zuzo zose zwalekejelwa." ⁶ Ngweno bakwali bakabeligele pakalepo, bakayeya mumwoyo yabo, ⁷ "Unhulume yoyu unolebelekelani zunu zwakadayi? Unotuka Mwali! Ndiani unolekejela luchinyo kuzhe kwaMwali ega?" ⁸ Pakalepo Jesu wakabeziba mumpepo uwe zwabakabeyeya mundangalilo jabo. Wakati kwabali, "Munoyeyelani zunu yozo mumwoyo yenu? ⁹ Ndizupi zulelu, kubuja chilima yechi, 'Zubi zuzo zwalekejelwa; kana, 'Nyamuka, tola inhobo iyo ukwende'? ¹⁰ Koga kuti muzibe kuti Mwananhulumyana woNhu unamasimba penyika okulekejela zubi," wakati kuchilima, ¹¹ "Ndinoti kwauli, nyamuka utole inhobo iyo, unde kungumba kuko." ¹² Wakanyamuka pakalepo nokukimbija ekanyamula inhobo, ekabhuda pazhe mbeli pabanhu bose, nezo banhu bose bakachenama bekakuja Mwali, nokudalo bekati, "Atijanu tabonabo zunhu zwakadai." ¹³ Wakabhuda akenda mugungwa, luvute lose lwabanhu lwakwezha kwaali, ekabalayija. ¹⁴ Wakati echinopinda, wakabona Levi, mwananhulumyana waAlphaeus eligele petende lontelisi akati kwaali, Nditobele." Wakanyamuka akontobela. ¹⁵ Jesu pakabelya mungumba yaLevi batelesi nabachinyi banji bakabelya naye nabalayijwa babe, nokuti bakabeli banji bakontobela. ¹⁶ Nokudalo bakwali bakabeli baFalisi, bakabona kuti Jesu wakabelya nabachinyi nabatelisi, bakati kubalayijwa babe, " Unolyilani nabatelesi nabachinyi?" ¹⁷ Jesu wakati awha yozu wakati kwabali, "Banhu balosima mumbili abatopota ndapi; koga banhu bapenyu abatompota. Andijakezhila banhu balolulama, koga bachinyi." ¹⁸ Balayijwa baJohane nabaFalisi bakabezuminya kulya. Bamwe banhu bakezha bakati kwaali, 'Neni balayijwa baJohane nabalayijwa babaFalisi bezuminya kulya, koga babo balayijwa abatozuminya kulya?" ¹⁹ Jesu wakati kwabali, "Zunota na kuti banhu bezha kopembelela muchato bezuminye kulya undoboli echipo na? Kana bechinondoboli, abatokwelela kuzuminya kulya. ²⁰ Koga achezha mazhuba okuti undoboli watolwa kumesho abo, mumazhuba yayo bachazuminya kulya. ²¹ Apana unofuma uncheka umpya pengubo yantolo. Nokuti chigamba chinojeluka chiva pengubo, zupya zuva kunozwantolo, nokuti zunova zwajeluka kasa. ²² Akuna unhu unobiga iwayini impya mujosaka lyantolo. Nokuti iwayini inokwamula ijosaka kova iwayini nejosaka zulashike. Panokuti, iwayini impya ibigwe mujosaka ibhya." ²³ Muzhuba lyeSabata Jesu wakapinda muminda mwakabelinozulyo, balayijwa babe bakatanga kununga zulyo bezupindila. ²⁴ BaFalisi bakati kwaali, "Linga, ini beta zunu zusinovumijwa muzhuba lyeSabata?" ²⁵ Wakati kwabali, "Ani amujakabala nozwakatiwa naDavida pakabeli nezhala eda zokulya_ iye nabamwe banhulume bakabeli naye_ ²⁶ kuti wakenda chini kungumba yaMwali Abiatha eli untebuji unkulwana, ekalya chinkwa chakabelipo pakalepo, chakabekwelelwa kulyiwa nabatebuji chete, wakapabo baakabenkwenda nabo?" ^{27 28} Jesu wakati, "Izhuba lyeSabata lyakatiwa banhu, asi banhu abajakatilwa iSabata. Nokudalo, Mwananhulumyana woNhu ndiShe, kana weSabata."