¹ Zungwanangwana, batebuji bakulwana, beli nabakulwana nabakwali namagota ekuJudiya bakabhuzana bose. Bakansunga Jesu bakenda naye. Bakanompila kunaPilatu. ² Pilatu wakombhuza eti, ''Ndiwi She wamaJuda na?'' Wakoshandula eti, ''Unodalo.'' ³ Batebuji bakulwana babempomela zunhu zunji. ⁴ Pilatu wakombhuza akale, ''Awutoshandula na? Linga zunhu zose zwabamukupomela!'' ⁵ Koga Jesu wakabe esinonshandula Pilatu, yozu zwakonshamisa. ⁶ Nonshaji wemembelo , Pilatu wakabeba sunungulila unsungwa umwempela, ⁷ unobakumbilwa. Kwakabeli nonhulume unowhi Bhalabasi muntolongo nabapandukili bakabeli mhondi noyo nshaji. ⁸ Ibungano lakezha kunaPilatu likakumbila kuti ebatile zwakabe eta ntolo. ⁹ Pilatu wakabashandula akale eti, ''Moda ndimusunungulile Ishe wamaJuda na?'' ¹⁰ Nokuti wakabeziba kuti yakabeli shanje yakatisa kuti batebuji bakulwana bempile Jesu. ¹¹ Koga batebuji bakulwana bakasungwaja ibungano kuti lishomeje kasa bekwila beti kusunungulwe Bhalabhasi. ¹² Pilatu wakabashandula akale akati, ''Ndinte chini Ishe wamaJuda?'' ¹³ Bakashomeja akale, ''Unkahamileni!'' ¹⁴ Pilatu wakati kwabali, ''Wachinyani?'' Koga bakashomeja kasa kasa, ''Unkahamileni.'' ¹⁵ Pilatu eda kuti ibungano ligutikane , wako sunungula Barabhasi. Bakondoba Jesu bakompila kwabali kuti benkahamile. ¹⁶ Magamba bakonsenga muguta( mubugalo bwafulumende), akale bakashoba chikwata chose chamagamba. ¹⁷ Bakombajika chimbalo chibuya Jesu, bakapombelela chibila chomiwa bako mbajika munsholo. ¹⁸ Bakatanga nkukuja beti, ''Ndawe, Ishe wamaJuda!'' ¹⁹ Bakabendoba munsholo nedete bemfila mate. Bakafugama namavi bekotama pasi kunayiye. ²⁰ Pabakontuka,bakombula chimbalo chiche chibuya bakambajika zumbalo zuzwe, benda naye bensenga kuty enokahamilwa. ²¹ Umwe nhulume , Simoni woku Sayilini, wakezha evha kuneyimwe nyika(wakabeli dade baAlekizanda naRufusi), bakamanikija kuti enyamule unchinjikwa uwe. ²² Magamba akasenga Jesu kubugalo bunowhi Gologota (zunova kuti ''Bugalo bwefupa lonsholo''). ²³ Bakompa iwayini iloshanganiswa nezwisinozipa, asi ajakayinwa. ²⁴ Bakonkahamila baganula ingubo jije betila kuti bekobane bose umwe nomwe ewane chibabi chengubo iye. ²⁵ Kwakabeli nonshaji wetatu , pabakonkahamila. ²⁶ Pakabakakwala pezutondejo undandu uwe kuwhi, ''Ishe wamaJuda.'' ²⁷ Bakonkahamila nembavha mbili ,umwe kululyi koga umwe kuchesho. ²⁸ Iwhalo, yakozhajikijwa payakati, ''Wakabalwa kuna basina mulawu,' ²⁹ Bose bakabepinda panayiye bakabentuka, bezungunuja misholo yabo beti, ''Iwi! Wokubepalaja itempeli esiko bakulula mumazhuba matatu, ³⁰ zuchije ubhuluke mpochinjikwa!'' ³¹ Nenzila imwempela batebuji bakulwana bakabentuka nabamwe, nabakwali beti, 'Wakachija bamwe, koga umukonwa kuzuchija. ³² Lekani Kristu, Ishe wokuIsrayeli, ebhuluke pasi feno eva pomchinjikwa, kuti tizubone tidimbwe. ''Bakabeli naye pomchinjikwa nayibo bakabentuka. ³³ Nonshaji wechinamwempela, kwakaba nenhilima munyika yose kuswikila ponshaji wechifumbamwe. ³⁴ Ponshaji wechifumbamwe Jesu wakashomeja newhi lopezhulu, ''Eloi, Eloi, lamaSabakitani?'' Zunoleba kuti ''Mwali wangu, Mwali wangu, mwandisyilani na?'' ³⁵ Bakabeli mile pelyo bakawha mawhi yaya bakati, ''Linga, umushoba Eliya.'' ³⁶ Umwe wakalabuka, akabiga iwayini peganganga, akalisungila pedete akanchumwikija muwayini lino baba , akompa kuti enwe. Umwe unhulume akati, ''Toda kubona kuti Eliya uchombuluja na.'' ³⁷ Jesu wakakwila newhi lopezhulu akafa. ³⁸ Idabiko lyetempeli lyakakwamuka livha pezhulu kunda pasi. ³⁹ Untungamili wezana wakama bekandinga Jesu bakazubona kuti wafa neyi nzila, akati, '' Chokomende unhulume yoyu wabeli mwana waMwali.'' ⁴⁰ Kwakabeli nabanhukaji bakashozhela belikule. Pabanhukaji yaba Mariya Magadalena, Maria(amai baJakobe ununa waJose) naSalomi bakabelipo. ⁴¹ Eli kuGalaliya bakobontobela bamwe beli balanda babe. Banhukaji banji bakezha naye kuJelusalema. ⁴² Pakwakaba madeko, nokuti lyakabeli zhuba lokuzubambila, mushule mwezhuba lyeSabata, ⁴³ Josefa wokuAramatiya wakezha yoko. Wakabeli nechilemela muguta ekamilila bushe bwaMwali. Wakenda zubuya kuna Pilatu akakumbila untumbi waJesu. ⁴⁴ Pilatu zwakonchenamisa kuti Jesu wakabafa kale; wakoshoba untungamili wezana okombhuza kuti Jesu wakabafa na. ⁴⁵ Pilatu paakazuwa nontungamili wezana kuti Jesu wakabafa, wakapila untumbi kunaJosefa. Yoyo ⁴⁶ Josefa wakatenga micheka. wakombuluja pomchinjikwa, akomputila akandajika mugumbu lyakabakwazabulwa namabwe. Wakabumbuluja ibwe pongwinilo wegumbu. ⁴⁷ Mariya Magadalena na Mariya mayi baJose bakabona pakajikwa Jesu.