¹ Kwakabasala mazhuba mabili kuti iPasika nomembelo wechinkwa chisina unkukumiso. Batebuji bakulwana nabakwali bakabepyanga inzila yokunkwiba besinkosunga noku mbulaya Jesu. ² Nokuti bakabeti, '' Zusutikane ponshaji wemembelo kutila kuty kusube noluzhowa.'' ³ Echili kuBetani mungumba yaSimoni nobulepelo, ekanyetutuka petebuli, unhukaji wakezha kunayiye akabhata elinefhukwa yamafuta anodula akale akabe nhuwhilila. Wakambweja ifhukwana akondila mafuta munsholo. ⁴ Koga bamwe bakanyema. Bakanyunyuta beti, ''Ini bezanisa mafuta? ⁵ Mafuta yaya alotengeswa nemali inokwana mazana matatu amadenali, imali yeyo isikopiwa basheti.'' ⁶ Koga Jesu wakati, ''Unsiyeni. Ini mukumu yangatisa alo? Wata chinhu chibhodo kasa kunami. ⁷ Mogala nabasheti kwana mwada munobatila zubhodo , koga imi amutogala muli nami. ⁸ Wata zwanokwanisa. Wandiguba umbili wangu ebambila kujikwa kwangu. ⁹ Chokomende ndoti kwawuli, pose panopupulwa indebo mbuya munyika yose, zwatiwa nonhukaji yoyu zwichobolebwa, sechikumbulujo.'' ¹⁰ Judasi Iskaliyoti, umwe wabegumi nabili, wakenda kubatebuji bakulwana kuti enompila kwabali. ¹¹ Pabakazuwa yozu batebuji, bakashantilwa bakobimbisa kuti bempe imali. Wakashaka unshaji wokuti empile kwabali. ¹² Nezhuba lyotanga lyechinkwa chisina unkunkumiso, pabakapila imwizana sechipiliso chePasika, balayijwa bakati kunayiye, ''Unoda tinoshangana kupi, kwatichalyila chilyo chePasika?'' ¹³ Wakatuma wabalayijwa babe babili akati kwabali, ''Ngwinani mumaguta, muchashangamijwa nonhulume ekanyamula chisengelo chevula. Muntobele. ¹⁴ Akangina mungumba, namwi mungine muti kumweni wengumba, 'Undayiji wati, ''Ikokupi ingumba yangu inosikila bezi akale ndolyila kupi iPasika pamwempela nabalayijwa bangu na?'' ¹⁵ Uchamutondeja ingumba imbhodo iloshambajikwa ipo pezhulu ilobambilwa kale.Mulonganyile nokuti bambila mwakale''. ¹⁶ Balayijwa bakenda bakenda muguta. Bakawana zose sokubujwa kwabo, bakabambila kulya kwePasika. ¹⁷ Kwakati kwabamadeko, wakezha nabegumi lyabili. ¹⁸ Bakati beligele belya, Jesu wakati, ''Chokomende ndoti kwamuli, umwe wenu umulya nami uchanditengesa.'' ¹⁹ Bose bakandinga bewhise she nokulwajilwa, umwe nomwe wakati kunayiye, ''Chokomende atobami?'' ²⁰ Jesu wakashandula akati kwabali, ''Umwe wabanegumi nabili, wanyika chinkwa pamwe nami mundilo. ²¹ Nokuti mwananhulumyana wonhu uchenda sezulokwalwamayelana naye. Koga mayo kunoyo nhu kubhudilija nonhulumwayana uchatengeswa! Zwaloba zubuya ngana esijakazwalwa.'' ²² Bekumulya , Wakatola chinkwa Jesu, akakombolela, akachimedula. Wakabapa akati, ''Tolani, Yoyu umbili wangu.'' ²³ Wakatola unkombe, akaboka, akabapa, bose bakanwa. ²⁴ Wakati kwabali, ''Yeli ilopa lyangu lechivumilwano, lyakutukila banji. ²⁵ Chokomende ndoti kwamuli, anditonwa unchelo wechivini kuswika yelo zhuba ndilinwa bupya mubushe bwaMwali.'' ²⁶ Mushule mokukwimba lwimbo, bakabhuda bakenda kudunhu lyamaOlivi. ²⁷ Jesu wakati kwabali, ''Mose muchambwela, nokuti zulokwalwa, ''Ndichaloba uncheji nemwizi jichapalajana.' ²⁸ Koga mushule mokumuswa, ndichenda mbeli kwenu ndinda kuGalaliya.'' ²⁹ Petulo wakati kunayiye, bangambwela bamwe, koga imi pe.'' ³⁰ Jesu wakati kunayiye, ''Chokomende ndati kunawi, nasi-iyi, busiku bwakolubu-igukulume lisanu lakokolika uchandilamba katatu.'' ³¹ Koga Petulo wakati, ''Kana kulikuti ndokwelela kuti ndife nawi, anditokulamba.'' Bose bakata chibimbiso chimwe chete. ³² Bakezha mubugalo bunowhi Getsemani, Jesu akati kubalayajwa babe, ''Galani yopa imi ndichinonamata.'' ³³ Wakatola Petulo, Jakobe, naJohane akatanga kushungulujika nekushupeka mukati momoyo umwe. ³⁴ Wakabeti kunayiye, ''Wakati umpepo unane shungu, kuswikila kolufu. Salani yopa mundilinde.'' ³⁵ Asundubuka, Jesu wakambwelela pasi akanamata kuti ngana zutubulika i-awa ingapinda kwaali. ³⁶ Wakati, ''Abha, Dade, zose zunhu zunovuma nawi. Unkombe yoyu ngawupinde, asi kusube kuda kwangu koga, kube kuda kwenu,'' ³⁷ Wakenda pakezha akawana belilele, akati kunaPetulo, ''Simoni, ulele na? Awungalinde kwe- awa limwe chete. ³⁸ Linga unamate kuti usungine mukukwejwa. Umpepo unoda, koga inyama imulamba.'' ³⁹ Akale wakenda konamata eshingisa mabala anofanana. ⁴⁰ Akale pakabuya kechibili, wakabawana belilele, nokuti mesho abo akabe elema. Bakuzushayiwa zokuleba kunayiye. ⁴¹ Wakezha kechitatu akati kwabali, ''Muchilele nokunyetutuka na? Zwakwana! I awa yakwana yakwana. Lingani! Mwananhulumyana wonhu umutengeswe mumaboko ebanochinya. ⁴² Mukani, andeni. Linga, uchanditengesa uli pelyo.'' ⁴³ Echinolebeleka, Judasi, umwe wabanegumi nabili, wakasika, lumbwembwembwe lwabanhu lwakabeli naye luli nozubaza nefumo bevha kubatebuji bakulwana. ⁴⁴ Feno untengesi wakabapa chitondejelo, eti, ''Ýoyo uchandi myonta ndiye. Mumbhate munsenge enolindwa.'' ⁴⁵ Paakasika Judasi, wakasika nokukambija kunaJesu akati, ''Ndayiji,'' akomyonta. ⁴⁶ Bakatula maboko pezhulu ponsholo pape bakontola. ⁴⁷ Koga umwe wabo wakabelimile wakabhisa chibaza ekacheka inzebe yechishingi chontebuji nkulwana. ⁴⁸ Jesu wati kwabali, ''Mumuzha soti mwazhila imbava, nozubaza namafumo, kuti muzhondisunga na? ⁴⁹ Pandakabeli namwi mazhuba ose ndilayija mutempeli, amujakandisunga. Koga yozu zwakatilwa kuti chibalo chizhajikijwe.'' ⁵⁰ Bose bakabeli naye bakontizha bakonsiya. ⁵¹ Umbisana, ekambala chimbalo choncheka ekazuputila, wakabetobela Jesu. Pabakambhata, ⁵² wakasiya uncheka akatizha elichinkuna. ⁵³ Bakonsenga kumpulisiti unkulwana Jesu. Bakabe kabungana batebuji bakulwana, bakulwana nabakwali. ⁵⁴ Petulo wakontobela elikule mane kunoswika kuguta lyompulisiti unkulwana. Wakagala pakati pamapolisa, ekota moto. ⁵⁵ Feno batebuji bakulwana negota lokuJuda lyakabe pota busumikiji bokuti bangambulaya chini, koga bakashayiwa. ⁵⁶ Banji bakabuza busumikiji bokunyepa, koga azujaka kwendelana. ⁵⁷ Bamwe bakanyamuka belino busumikiji bokunyepa; bakati, ⁵⁸ ''Tankowa eti, 'Ndichapalaja itempeli lyakabakwa namaboko, mumazhuba matatu ndichabaka limwe lisijilo bakwa namaboko.'' ⁵⁹ Akale busumikiji abujabe kwendelana. ⁶⁰ Umpulisiti wakamilika akabhuza Jesu, ''Awutoshandula na? Ini banhu yaba bepa busumikiji bekamilana nawi?'' ⁶¹ Koga wakalamba ekawhilijila. Akale wakombhuza eti, 'Ndiwi Kristu, mwana nhulumyana woyo ulokombolelwa na?'' ⁶² Jesu wakati, ''Ndimi; akale uchabona mwana nhulumyana wonhu ekagala kuluboko lolulyi lwamasimba luzha namakole okudenga. ⁶³ Untebuji unkulwana wakajelula zumbalo zuzwe akati, ''Tichinoda basumikiji na? ⁶⁴ Mwawha nokutukwa. Mwabayeyani?'' Bakompomela bakondasha sonhu wakabekwelela kufa. ⁶⁵ Bamwe bakatanga kumfila mate bemvala bendoba beti kunayiye, ''Polofita!'' Bakantola mapolisa bakandoba. ⁶⁶ Petulo echimo pasi pegota, umwe wezushingi wechinukaji wabapulisiti bakulwana wakezha kunayiye. ⁶⁷ Wakabona Petulo ekota moto, wakondingingisisa akati, 'Nawi wabeli naJesu wokuNazarena na.'' ⁶⁸ Koga wakazulamba yozu , eti, '' Andijimuwha kana kuwhisisa kuti mumulebeleka nezweni.'' Wakabhuda akenda ponkoba wegedi. Igukulume lyakakokolika. ⁶⁹ Koga chishingi chechinhukaji chakombona akatanga kubuja yabo bakameli mile yopo, ''Umwe wabo unhulume yoyu!'' ⁷⁰ Koga wakalamba akale. Mushule mwakanshaji yabo bakamelimile yopo bakabeti kunaPetulo, ''Chokomende umwe wabo, nokuti ndiwi muGalili.'' ⁷¹ Koga wakatanga kuzubiga muzutuko epika eti, ''Andintonziba yoyu nhulume wamumuleba.'' ⁷² Igukulume lyakakokolika kechibili. Petulo wakoyeya mawhi aJesu pakati kunayiye: Mushule mokukokolika kwegukulume kechibili, uchandilamba katatu,'' akale wakasikilwa neshungu akalila.