¹ Yoku ndiko kutanga kwendebo imbuya yaJesu Khristo, Mwananhulumyana waMwali. ² Sozwakulokwalwa muhwalo yaIsaya umpolofita, "Lingani, ndimutuma untumwa mumesho enu, iye uchakungubula inzila yenu''' ³ Iwhi looyo umulila elimugwegulu, 'Lulamisani inzila yaShe; mululamise inzila iye. ⁴ Johani wakezha, ebhabhatiza mugwegulu nozombhabhatizo wokushanduka nokulekejelwa kozubi. ⁵ Inyika yose yeJudiya nabanhu bose bomuJelusalema bakenda kwaali. Wakababhabhatiza mulwizi Jolodani, belebulula zwibi zwabo. ⁶ Johani wakambala ijasi lobokuse bekamelo nebhanti lyenkhumba munshana, elyemhashu nobuchi bweshango. ⁷ Wakabepupula, eti, ''upo uchezha mushule lyangu unesimba linopinda lyangu; intambo jembatata jije andijilokwelela kufugama ndijipombosola. ⁸ Ndakamubhabhatiza nevula, koga iye uchamubhabhatiza noMpepo uNchena," ⁹ Zwakatikana mumazhuba yayo yopo Jesu wakasika evakuNazaleti yokuGalileya, wakabhabhatizwa naJohani mulwizi Jolodani. ¹⁰ Jesu paakabhuda muvula, wakabona matenga ezhulika uMpepo uNchena ubhelukila paali muchimo chenjiba. ¹¹ Iwhi lyakawhikana liva mumatenga liti, ' Ndiwi Mwananhulumyana wangu wandinodisisa. Ndinoshantilwa kasa nawi." ¹² Akale uMpepo wakonsungilija kunda mugwegulu. ¹³ Wakabeli mugwegulu kwamazhuba makumi mana ekwejwa naSatani. Wakabeli nemhuka jeshango, inhumwa jushingila. ¹⁴ Ngweno paakasungwa Johani, Jesu wakezha muGalileya, epupula indebo mbuya yaMwali. ¹⁵ Wakati, " unshaji wazhajikijwa nobuShe bwaMwali bwaba pelyo. Shandukani mudimbwe indebo mbuya." ¹⁶ Paakabekwenda polutibi lwegungwa leGalileya, Wakabona Simoni eposa kanyandi mugungwa, nokuti bakabeli bavubi behobe. ¹⁷ Jesu wakati kwabali, ''Izhani munditobele, ndichamuta bavubi babanhu.'' ¹⁸ Nokukambija bakasiya tunyandi bakontobela. ¹⁹ Jesu paakabekwenda ekasundubuka, wakabona Jemusi mwana waZebhediya naJohani mwanakwayina uwe; bakabeli mubwato befuma tunyandi. ²⁰ Wakabashoba, bakasiya dade babo Zebhediya mubwato nabashingi banolipwa, bakontobela. ²¹ Bakaswika muKapenawumi , muzhuba lyeSabata. Jesu wakenda muSinagoge ekalayija. ²² Bakachenamiswa nokulayija kukwe nokuti wakabelayija sonhu unamasimba zulosiyana nabakwali. ²³ Pakalepo unhulume womuSinagoge mwabo wakabeli nompepo umbi wakalilila pezhulu, ²⁴ eti, ''ini zwatingate kunawi, Jesu woku Nazaleta? Asi wezha kotipalaja? Ndokuziba kuti ndiwi ani. Unchena wa Mwali!'' ²⁵ Jesu waka layila idimoni akati, ''Nyalala ubhude mwaali!'' ²⁶ Umpepo umbi wakomposela pasi ukabhuda mwaali ulila nehwi lipo pezhulu ²⁷ Banhu bose baka chenama, baka bhuzana, ''Ini yozu? Kulaija kupya kunesimba! Unolayila akale mipepo mibi kova ihwilila!'' ²⁸ Indebo jije jakazhala kose nomubhazu lose le Galileya ²⁹ Pabaka bhuda mu sinagoge, bakaswika pengumba ya Simoni na Andulu, belina Jakobe na Johani. ³⁰ Ngweno amezwale ba Simoni bakabeli lele belwala kululuma, beka buja Jesu nozwabo. ³¹ Nokudalo wakezha, ndokumbhata luboko, akabanyamulila pezhulu, kululuma kukabhuda mwabali, bakatanga kuba shingila. ³² Pakwakaba busiku izhuba lyamila, bakabuza kwaali bose bakabelwala kana balobhatwa namadimoni. ³³ Iguta lose lakabungana ponkoba. ³⁴ Wakachija banji bakabelwala malwaji alosiyana siyana ekatata ma dimoni manji, koga ajakavumila madimoni kuti elebeleke nokuti akabonziba. ³⁵ Wakamuka zungwanangwana, kuchaka swibha; akenda, pobugalo bulosisika ekanamata. ³⁶ Simoni nabo baakabeli nabo bakatanga kumpota. ³⁷ Bakongwana bakati kwaali, ''Bose banhu bamukupota ³⁸ Wakati, ''Andeni kumwe, kuzhe kwamaguta alotikombeleja ndinopupulabo kwakale. Ndizo zwakatisa ndizhe yopano.'' ³⁹ Wakenda iGalileya yose, epupula muna Sinagoge etata madimoni. ⁴⁰ Undwaji wamapele wakezha kwaali, onkumbila; wakafugama akati kwaali , "Kana ulinechido, ndite ndichene. ⁴¹ "Nokuwhila ishe, Jesu wakatulika luboko lulwe amkombata, eti kwaali, "Ndinechido. Cheneswa. ⁴² Pakalepo mapele akondeka, akaneswa. ⁴³ Jesu wakonchenjeja akonsungula kuti ende. ⁴⁴ Wakati kwaali, " Usilebe zuli zose kunhu, asi inda, unozutondeja kuntebuji, upile umpilo wokucheneswa sokuleba komulawo waMozisi, uta buchapupu." ⁴⁵ Asi wakenda akatanga kupupula zupopachena iwhi, kasa zwakonkoneja kungwina muguta ekasunungunguka asi wakagala kubugalo bukokule. Koga banhu bakalamba bezha kwaali beva kumatibi ose.