¹ Ndimuleba kuti undyi wefuma, konshaji wakalebha chini unobeli mwana, apana nsiyano nechingi, koga elimweni wendawo. ² Koga elipasi pabakulwana kusika izhuba lyakabigwa nadade babe. ³ Akale, tichili batukutuku, takabetiwa kuti titobele zunotiwa munyika. ⁴ Koga pawakasika unshaji, Mwali wakatuma mwananhulumyana, wakazwalwa nonhukaji, ⁵ wakazwalwa pasi pondawu kuti echije yabo pasi pomulawu kutila kuti posa tingatolwa sabana babe. ⁶ Akale nokuti mubanhulume, Mwali wakatumila umpepo womwana nhulumyana mumwoyo yedu, unolila eti, ''Abba, Dade.'' ⁷ Amuchili zushingi, koga mwana, akale mwananhulumyana, akalen undyi wefuma kubhudilija kunaMwali. ⁸ Asi ponshaji yoyo, pamujakabeziba Mwali, mwakatiwa zushingi nayabo, namasimba abakeli nawo, asijili aMwali. ⁹ Koga sezwo mwaziba Mwali, kana kuzibwa naMwali, asi ini mundishandukila kunabo basina masimba nabasinoziba kushingisa imali? Munoda kutiwa zushingi kose kabili na? ¹⁰ Unolinga mazhuba, mweji mipya, mwaka namakole! ¹¹ Ndimukutyila nokuti unshingo wangu nawi posa awutoshinga. ¹² Ndimumukimbila, banakwayina, ibani sami, nokuti ndakaba samwi. Apana chibi chamwakanditila. ¹³ Asi munoziba kuti bwakabeli bulwaji bwenyama bandaka pupula iwhi lyaMwali kokutanga, ¹⁴ akale kuba kwangu kwenyama kumumubiga mukumu kwejwa, amujaka kandilamba kana kundilingila pasi. Asi mwakanditambula sokuti ndakabeli nhumwa yaMwali, sokuti ndakabeli iye Jesu Kristu. ¹⁵ Nayozu chiipi chikombolelo chicho?Nokuti ndikakupupulila, ndiyani walokubhisa mesho endipe. ¹⁶ Nayozo, ndaba mbengi uwo na nokuti ndakubuja ichokomende? ¹⁷ Balosungwala kuti bezunde, asi besina chinangwa chokudalo. Banoda kumujikamisa kuti musungwale kunayibo. ¹⁸ Zwagala zubuya kusungwalila nechinangwa chibhodo, kusube patinobeli tose chete. ¹⁹ Bana bangu, ndimuwha kulwajilwa kokuzwala kusika Kristu wabumbwa mwamuli. ²⁰ Chishubilo changu kuti ndibe yipo nawi ndishandule lulimi lwangu, nokuti ndilo chenamiswa nawi. ²¹ Ndibuje, iwi unoda kuba pasi pomulawu, awutowhilila mulawo na? ²² Nokuti kulokwalwa kuti Abrahama wakabeli nabana banhulume babili, umwe wakabezwalwa nonsichana wakabeli chishingi koti umwe nonkaji uwe. ²³ Umwe wabezwalwa nonsichana wonshingo zope nyama, koga umwe wakabezwalwa nokanji uwe zuli pachibimbo. ²⁴ Yozu zunopandululwa sekwale kumo nokuti yaba b anhukaji balomilila zuvumilano. Umwe wabo wokudunhu llyokuSinayi unozwalila mubulanda. Yoyu unowhi Haga. ²⁵ Feno Haga unomililila idunhu lyokuSinayi iko kuArabhiya; akale ulomilila iJerusalema ipo, umo mubulanda nabanha babe. ²⁶ Koga iJelusalema ilosungunuka, akale ndimayi bedu. ²⁷ Nokuti kulokwalwa, ''Shanta, iwi ngomwa usinozwala; lililila ushomeja mulushanto, iwi usinoshangana nokulwajilwa kokuzwala; nokuti bana bonhu usina ndume banji kupinda boyu unondume.'' ²⁸ Koga imwi, banakwayina, saIsaki, bana bechibimbiso. ²⁹ Noyo nshaji yoyo wakazwalwa munyama wakashetesa yoyo wakazwalwa nompepo. Zulofanana nafeno. ³⁰ Koga umbhalo unotini? ''Tatani chishingi nomwana uwe.Nokuti mwana yoyo hatokobejana ifuma nonkaji wolusununguko.'' ³¹ Nokudalo, banakwayina, atitobeli bana bechishingi, asi bonkaji wolu sununguko.