¹ Koga samwi, mwakabafa muzubi nomuluchinyo, ² yomo mumwakaba kwenda, munzila jomunyika. Mwakalalama sabatongi bamakota omumpepo, umpepo umushinga mubana basinowhilila. ³ Kale tose takagala pakati pabanhu yaba tizhajikija zudo zwenyama yedu, nokushinga mishingo yozudo zwenyama nozwendangalilo . Takabeli bana bozubo mumbumbilo, sazose zubumbwa. ⁴ Koga Mwali ulofuma mushe nokuti ludo lulwe lukulwana lwakatida nalo. ⁵ Patakaba tikafa muzubi, wakata kuti tibe bapenyu tose munaKhristo _ neshe takachijwa. ⁶ Mwali wakatimusa pamwempela naKhristo, akale Mwali wakata kuti tigale tose mubugalo bokumatenga muna Khristo Jesu, ⁷ kutila kuti mumakole anozha etitondeje ifuma inji yeshe jilotondejelwa mushe jije kunasu mbeli kwaKhristo Jesu. ⁸ Nokuti neshe mwakachijwa nokudimbwa, asi yozu azujakava kunamwi, chipo chaMwali, ⁹ zusinova mukushinga, kuti pesibe unozuloba chifuba. ¹⁰ Nokuti tizushingiswa zwaMwali, takabumbilwa pana Khristo Jesu kuta mishingo yedu mibuya yakabambwa ntolontolo , kuti tikwende nayo. ¹¹ Nokudalo yeyani kuti pamwakabeli maGentali munyama. Munoshobwa kuti "basilomhalajwa" zunolebwa kuti "kumhalajwa " kopenyama kunotiwa namaboko abanhu. ¹² Nokuti panoyo unshaji mwakaba mukapambulwa munaKhristo, bokuzha mubugalo bomuIsilayeli, bakwendi muchivumilano cholubimbo, musina kubimba akale musina Mwali munyika. ¹³ Koga ngweno munaKhristo Jesu yaba bakabeli kule naMwali bakabuzwa pafupi nelopa lyaKhristo. ¹⁴ Nokuti iye womene lunyalalo kwatili, nokuti wakatita tikaba bamwempela. nenyama iye wakakolomola bulambo bunoganula malwajo. ¹⁵ Wakabiga kumbali milawo nemilayo kuti ebumbe muna iye unhu umpya eva pababili, eta lunyalalo. ¹⁶ Khristo unobhatanisa banhu babili kuba umbili umwempela kunaMwali zubhudila panchinjikwa, zubiga kufa kumalwajo. ¹⁷ Jesu wakezha ekapupula indebo imbuya yolunyalalo kunamwi bakabeli kule akale lunyalalo nokunabo bakabeli pelyo. ¹⁸ Kubhudikija naKhristo tose tilosungulwa muMpepo umwempela kuswika kunaTate. ¹⁹ Nokudalo, imwi ngweno maGentali amuchilibokuzha nabakwendi. Koga mubagajikani nabachena baMwali nemhuli yengumba yaMwali. ²⁰ Mwakabakwa pakutangisila kwabapositoli nabapolofita, naKhristo Jesu omene elibwe lopechiswi. ²¹ Muna iye chibakwa chose chinoma zubhodo kova chikubuka kuba itempeli jena munaShe. ²² Ndimunaiye kuti nasu timubokwa pamwempela kuba bugalo bwaMwali muMpepo.