¹ Paulo, umpositoli waKhristo Jesu nokuda kwaMwali, kubanhu bachena baMwali bayimo muEfesusi, balobimbika muna Khristo Jesu. ² Ishe kunamwi nolunyalalo lunova kuna Mwali Tate bedu naShe Jesu Khristo. ³ Ngana Mwali naTate bedu baShe Jesu Khristo bakujwa, wakati kombolelwa nazwose zwikombolelo zompepo kubugalo bwamatenga munaKhristo. ⁴ Mwali wakatishala muna iye kuva kumatangisilo enyika, kutila kuti tibe bachena basina chibi mumesho awe nomuludo lulwe. ⁵ Noludo Mwali wakatida sabamwe bemhuli iye, akatilondota sabana babe nomuna Jesu Khristo, nolushanto lwechido chiche. ⁶ Kulondotwa kwedu kunotiwa nolukujo lokungayima kuchena kwakatipa muna iye waanoda. ⁷ MunaJesu Khristo takawana luchijo nelopa lilye akale nokulekejelwa koluchinyo lwedu, nokufuma kweshe jije. ⁸ Wakapamijila ishe jije kunasu nobuchenjevu nokuwhisisa. ⁹ Mwali wakatizibisa zuchenamiso zokuda kukwe, nozunoshantisa, nozo zwakatondejela muna Khristo, ¹⁰ nokubona kwechinangwa mukuzhajikijwa konshaji, kubunganisa zunu,zose, zunu zose kudenga napasi, pasi ponsholo umwempela, kana Khristo. ¹¹ Muna Khristo takapiwa ifuma, sezo takatiwa bamwe bemhuli zunda nobulongwa boyo unoshinga eta zose nokuda kukwe. ¹² Mwali wakatishala sabalyi befuma isu, bakatanga kubimba munaKhristo kuvila kumatangisilo , zunaba zolukujo bobushe bubwe. ¹³ MunaKhristo, namwibo, pamwakawha iwhi lyechokomende, indebo imbuya lyoluchijo lwenu, mwakadimbwa kuna iye mwakakonywa nechibimbiso chompepo Nchena, ¹⁴ iye ulichibimbiso chefuma yedu kuswikila kusupulwa kozupo kulukujo lobuchena bubwe. ¹⁵ Pezhulu pechinangwa yechi, kuvila pandakawha nozokudimbwa kuko munaShe Jesu akale noludo lulo kubanhu bachena baMwali, ¹⁶ Andijanu ndaleka kuboka Mwali pezhulu papo nokukuleba muminamato yangu. ¹⁷ Ndanamata kuti Mwali waShe Jesu Khristo, Tate bobuchena, bachakupa umpepo wobuchenjevu akale wokumpamula mukuziba. ¹⁸ Ndanamata kuti mesho omoyo uwo ezhulike, kutila kuti uzibe lubimbo lwakakushobela nefuma lyobuchena bwefuma pakati pabose bachena baMwali. ¹⁹ Muminamato yangu ndokumbila kuti muzibe bukulwana bwamasimba awe kunasu banodimbwa, zundila mukushinga kwamasimba awe makulwana. ²⁰ Akale yaya ndiwo masimba akashinga munaKhristo yopo pakomusa kubafi akongajika kuluboko lulwe lwechilyi kubugalo bokudenga. ²¹ Wakagajika Khristo pezhulu pabo bose butongi akale namasimba makulwana, akale nalose izina lino shobwa. Khristo banotonga, asi kusi kwamakole yaya, asi mumakole anozha. ²² Mwali wakabiga zunu zose kuti zube pasi pamakumbo aKhristo, akale ekompa kugubungano kuti ebe unsholo pozunu zose. ²³ Igubungano umbili uwe, kuzhajikijwa kukwe unozhaja zose muna zose.