¹ Kukwo ətəm ntswa wu əsɨ twərag n cen səhwod sɨced ku nio ə di bə zɨzərag ni. Na sɨ gwwud ə wwud nyyo bə cug tyog Əgwaza mbyyaŋ Zwon Tsyyeb ji. ² Na sɨ kwog adɨdəy ndwag bə kəucyyo ukəraŋ wu. Bə kozaŋ əfam əsɨ byyo ukwon sɨced nio ubyyo əsum +təŋkəy na swag bɨ ufyyaŋ nio ə shyyad kozaŋ nzwad ni. +Huhwwo ukwon ba əyed kan corog +nŋwab dunio na. ³ Səm əbwo na byyo kyaŋ əkwo əna shyi ni dag. Cug tyog Əgwaza ji mbyyaŋ Zwon Tsyyeb ji na shyyo bumi gbəndaŋ ukəraŋ ka. Əwod nnwan ntəm gu na nâ nyyo gu ntəm. ⁴ Bana di uyyi gu ka, əwod əlyorog gu ka əna lyurug bu +ukpəraŋ bana. ⁵ Əbwo na byyo utug dag. Ba na cad loŋ fitila kwo say nwam dag dənian Ətyə Uli Əgwaza ə na say ba. Bana nyyo tyog ku dunduŋ bə ngu tɨnad jen saŋ sɨsag. ⁶ Ətəm ntswa wu əsɨ nyo bə nuŋ, "+Swaŋ əlyyad əji ni yed kyaŋ nsag tsswo bɨ yed cucug. Ətyə Uli əwo yed Əgwaza ntswa ənied əlyyad əŋwwad Əgwaza bani, ə̀ku tə́m ətəm ntswa gu wu gwô twərag nnwan ntəm gu na kyaŋ əkwo yed tɨlɨd ə nyyo ni də bɨ byyan jen." ⁷ "Di la! Ntəmbay bə nini! Lɨbərka əshyyo dunduŋ bə ətyə əwo nyyo nkyaŋ ənio kwa twaŋ əkwi ni shey nyo ku tɨbay ni." ⁸ Nuŋ Yohanna ə, nku fəg nsɨ mo ndi nkyaŋ ənay ni. Jen əzo nku fəg nsɨ di nkyaŋ ənay ni, nsɨ kwa əbyin bə tɨtag ətəm ntswa əwo ku twərag n nkyaŋ ənay ni dɨ nyyo gu sujada. "Əsɨ nyo bə nuŋ, "kud, yog nyyo n kyaŋ əkwo dag! Nuŋ bwo mma ngyed bə ŋgwon ntəm kyo bənaŋ ŋwan ni, dunduŋ bə +nənyyug a ba ənied əlyyad əŋwwad Əgwaza ba mbyyaŋ ənied əbyo ə nyyo nkyaŋ ənio shyyo bə kwa twaŋ əkwî ni. Nyyo Əgwaza u sujada bə nyin gu!" ¹⁰ Əsɨ nyo bə nuŋ, "Kud, yog niad swaŋ əlyyad tuza əlyyad nkyaŋ utswon ji zo shyyo bɨ kwa twaŋ əkwi ni dag, dənian əka jen ji mbay kpəkpəg ni. ¹¹ "Ətyə əwo ə yed ətyə əbun ni, yog gwo ya uswon bə əkwa əbun guka. Ətyo əwo əma nyyo nkyaŋ nkag ni yog gwo ya uswon bɨ nyyo nkyaŋ nkag guna. Ətyə əwo ə ma nnyyo zɨzərag nswad ni, yog gwo ya uswon dɨ nyyo zɨzərag nswad wu." ¹² "Di la! Ntəmbay bə nini. Zaŋ nji shyyo dunduŋ bə nuŋ, kwo yed ta kwo ntan konyan cəcərag tuza nkyaŋ ənio gwo nyyo ni. ¹³ Ətyə Uli Əgwaza u ə nyo, nuŋ ə ngyed Alpha bə Omega, utsa ka bə nŋhan wu, utsa kozaŋ nkyaŋ bə nŋhan ku wu. ¹⁴ Lɨbərka ə yed ənied əbyo Kristi əkə nkwi +ətərog ba ba dɨ nyyo dokoki guji naŋ gwo ncad ni. Ba byo əna ya bə səd bə usum ukwon sɨced ka, bâ bwo ŋwwo gbəndaŋ ukəraŋ wu bu +ulwo ŋwway bana. ¹⁵ Tusa ka ə mbyyo +ubwu, ənied nyyo tuntug, ənied hwi agwaza dunio, ənied əba yed +uləm ni, hyay ənied dunduŋ bə konyan ə cad nyyo nkyaŋ saŋ cucug. ¹⁶ "Nuŋ ə Yesu, wo ku tə́m ətəm ntswa ngu gwô twərag a nkyaŋ ənay ni tuza nnwan Əgwaza ka. Nuŋ ə ngyed ənan ka bə+umbwon Dauda na, təŋgwad əkyo say bəd bɨbyib tsutswod kani. 7 Tswa ji bə əbyyug əfay u əsɨ nyo, "Bay! Yog ətyə əwo fəg ni ə hyyo, "Bay!" Konyan ə tswoŋ nwamshyi, yog gwo bay. Ətyə əwo cad sswo səhwod ni, yog gwo bay bə səd gwô shyyo səhwod sɨced na. 8 Ngyed ətyə əwo əna joŋ konyan ə fəg swaŋ əlyyad tuza nkyaŋ ənio tɨbay bumi kwa twaŋ əkwi ni. Kə əyin əsɨ mbyyaŋ kyaŋ tuza na ka, Əgwaza u bwo əna mbyyaŋ ətyə əwo zwod, kwo ə lyurug bumi kwa ntwaŋ əkwi ni. ¹⁹ Kə əyin tyad ə bwad swaŋ əlyyad əji zə shyyo bumi kwa twaŋ nkyaŋ ənio tɨbay ni, Əgwaza u bwo əna kyag kunuŋ guka dɨ ya bumi ukwon sɨced ka bə zɨzərag gbəndaŋ ukəraŋ wu byo ə lyurug bumi kwa twaŋ əkay ni, ə wod gu. ²⁰ Ətyə əwo ə yed ətɨ yoŋ tuza nkyaŋ əkay ni ə nyo, " Î! Ntəmbay bə nini." Zəm! Ətyə Uli Yesu, Bay! ²¹ Yog shog Ətyə Uli Yesu ji ji shyyo dunduŋ bə konyan bəd. Zəm.