¹ Ndyurug kwaləmaŋ əkwi ni tuza nnwan Əgwaza ənio shyyo Afisus ni mbwag ətəm ntswa: '+Swaŋ əlyyad əji ni nyyo mbwag ətyo əwo ə byoŋ +təngwad natad na bumi bwag yag gu ku ni əwod əsɨbwo coŋ bə kəucyo kyenkyay fitilu zinariya natad ba. ² "Ndyen kəkəb nkyaŋ ənio nyi kə nyyo ni, mbyyaŋ ntəm bə dɨdɨd bɨ yab tsswo bɨ gbaŋ əlyo nyi ku. Ndyen naŋ nyi byyid bə kətug ənied dag.Ndyen naŋ nyi kə mag ənied əba nyo ba yed +əgwag ntəm Yesu ni, əwod ba yed dag dənian əka nyi nfɨg naŋ ba ngyed ənied bwoy əlyem byo ni. ³ Ndyen naŋ a byyo yab tsswo dɨ gbaŋ əlyo, əwod əsɨ sswo zwod bəd dənian əyorog nka, də wâ cyyo bəbwod dag. ⁴ Əwod kyaŋ əlyyad tuza aka kukwo yed, nyi ncyyo ulyim bɨ cad əkwo nyi ku tsa byyo ni. ⁵ Kukwo mbyyo nnyyo â jyyuŋ ulwo əkyo aku nshwod kwǎ ni. Sə a nay ə yurub a ndyo a ga ya uswon dɨ nyyo nkyaŋ ənio nyi ku tsa nyyo ni. Kə asɨ lag nay ku, ntəbay bə ŋwan n tɨn fitila ji dulwo nswad ka ji. ⁶ Əwod a byyo tan bə sɨkwi ni: A lag di nkyaŋ ənio Nikolatawa ba əku nyyo ni, byo nuŋ bwo ndag ni. ⁷ Yog konyan ə byyo tsutsswo twoŋ ulwo gwô fəg kyaŋ əkwo Zɨzərag Ntswa u ə lyyad tuza +ulwo nnwan Əgwaza ni kəkəb bə ətyo əwo ə shyyo san ku ni. Ngwo mma joŋ gu jen gwô ya əsum ukwon sɨced ka, kyo ushyyo bu uli Əgwaza ka ni." ⁸ Ndyurug nnwan Əgwaza ənio shyyo Samirna ni mbwag ətəm ntswa: 'Swaŋ əlyyad əji ni izo yed utsa ka bə nghan wu ngwo yed ətyə əwo ku hwu əsɨbwo shyyo əced ni. ⁹ Ndyen sswo ubuŋ aku bə kunag aku, kaŋ bə ənnyo, əsɨ yed ətyə nzwa. Ndyen ənied əba byyan əyorog nka ni nyo ba yed Yahudawa ni, əwod ba yed dag. Ba wa yed tu əgwam utənyiraŋ kwo. ¹⁰ Yog fəg uwun sswo nzwod ənio təbay nyin duswon ni dag. Di! Əgwam utənyiraŋ əkə ta tsswo ku di jim əyyaŋ nyin bumi hwo dənian gwô mag nyin. Nyi nɨ sswo zwod nnwam swag nio.Sə nyi kwog cucug bəd, kwo əna hyay nyin, nyî ga shyyo uzwwan tyog sɨced ji. ¹¹ "Yog konyan ə byyo tsutsswo tswoŋ gwô fəg kyaŋ əkwo Zɨzərag Ntswa u ə lyyad tuza +ulwo nnwan Əgwaza na ni. Sə bə ətyə əwo shyyo san ku ni ngwô əna shwod əhwu saŋ sɨsag ka." ¹² Ndyurug nyin nnwan Əgwaza Burgamas mbwag ətəm ntswa : 'Swaŋ əlyyad əji ni izo yed tswad əzo ya uma ufyyaŋ ni.' ¹³ 'Ndyen naŋ á nyyo swad aku kpəkpog bə ncug nswad əgwam utənyiraŋ ku. Had bə ənnyo, əsɨ byoŋ əyorog nka kəŋkəm. Ndyen naŋ a tsswó ŋwwag tsswo aku də nuŋ dag. Kwo də njen əzo Antifas wo əku kub n uma, wo bwo yed kwog cucug ngu ni, əku hyad gu bumi nyin ka dulwo əkyo əgwam utənyiraŋ ə nswan ni. ¹⁴ Əwod mbyyo əlyyad byyan ntsswo tuza aka: Nyi byyo əyyaŋ bə nyin əbyo byoŋ cyyed Bilamu ku ni kəŋkəm, wo cyyed Balak gwô ə sag kyaŋ tyərəm nnwan Isra'ila na bâ ga ya kyaŋ ya əkwo ə nyyeb ágwaza swanta əkay ni, had bə shɨshɨg kɨ nyyo . ¹⁵ Ənnyǒ əyyaŋ bə nyin ə mbyoŋ cyyed Nikolatawa ku kəŋkəm. ¹⁶ Kukwo mbyyo tɨlɨd nyî nay ə yurub nyi ndyo! Kə nyi ma ndag, di ntəbay bə nyin bə gbəŋgboŋ. Əwod nnyyo zwaŋ tuza ba bu tswad əzo shyyo bumi unuŋ nka ni. ¹⁷ Yog konyan ə byyo tsutsswo fəg əlyyad gwô fəg kyaŋ əkwo Zɨzərag Ntswa u ə shey +ulwo nnwan Əgwaza na ni. Tuza ətyə əwo ə́ ya zwaŋ ji dɨ yed əgwag ni, nna joŋ gu manna əwo ə niad ni. Mmo joŋ gu jijyad əfaŋ wo əna byyo əyorog əfay kyo əlyurug bə nka ni. Ə̀ mbyyo ətyə əwo ə lyen ka ni dag, sə bə ətyə əwo san ka ni." ¹⁸ Ndyurug nnwan Əgwaza ənio shyyo Tiyatira ni mbwag ətəm ntswa nyo: Swaŋ əlyyad əji ni nyyo mbwag ŋgwon Əgwaza ka, wo byyo əyyi naŋ əlyem ndoŋ ni. Tɨtag gu ba bənaŋ mimyad bɨlog ni. ¹⁹ Ndyen kyaŋ əkwo a nyyo ni, tuza cad aku, ŋwwag tsswo, nyyo ntəm bə tswaŋ lwam aku. Ndyen kyaŋ əkwo akə nyyo nini ni sswag kyaŋ əkwo aku tsa nyyo ni. ²⁰ Əwod di əbun əwi ni tuza aka: A kɨ byyid bə Yezebel wo kyag əpyo gu ə mun ə yed ətyə lyyad əŋwwad Əgwaza ni. Bumi cyyed gu ka əsɨ kɨ lyyen nnwan ntəm nna basɨ ŋwwo nyyo shɨshɨg kɨ nyyo bə əyyaŋ mbyyaŋ ya nkyaŋ ya əna ə nyyeb +agwaza dunio ə nay ni. ²¹ N ŋwwag gu ətan njen gwô nay ngyurub gu ndyo əwod əsɨ lag wod nyyo a shɨshɨg kɨ nyyo na. ²² Di! Nna ta ka tuza əgbərag myyan ətyə nzwan. Əwod kəkəb ənied əba kɨ myyan ka ni bana ŋwwo ga gbəndaŋ sswo zwod. Kə ba ma nay əsɨ yurub ba ndyo kukwo bana nshwod. ²³ Nna hyay nnwan ka na ku cyyo kəkəb +ulwo nnwan Əgwaza na bâ lyyen naŋ nzwob dɨdam ntsswo ənied na. Konyan gwô fway kyaŋ əkwo gwo nyyo ni. ²⁴ Əwod nyin əbyo mbwad Tayatira ni, nyin əbyo lag byoŋ cyyed əkwi əsɨ nnyyo ntəm ni. Nyi sɨ bu lyen kyaŋ əkwo əyyaŋ ə ngyi ceced cyyed nkyaŋ əgwam utənyiraŋ ni dag. Nyin, təŋkay ənied ənay ni,nna cyyo nyin kyaŋ əkwo sswag ced nyin ni dag. ²⁵ Əwod kaŋ bə ənnyo, tɨlɨd kwo nyî yoŋ bɨced sənaŋ mbay. ²⁶ Ətyə əwo ə shyyo san ni, bə ətyə əwo nyyó kyaŋ əkwo nnyyo tɨnad nghan wu ni, ngwo mba sag gu bɨ tyog tuza bɨbyin +əkag ənied ba. 7 Ə̀ba nyyo tyog tuza baka bɨ shan ntsam. Nna fwwo ba naŋ lɨlən əkwo ə nog bɨ lyem ni." ²⁸ Bənaŋ n̂san tyog ku mbwag Əcyo nka ni, nuŋ bwo nna joŋ gu təngwad bɨbyib tsutswon ka. ²⁹ Yog ətyə əwo byo tsutsswo ni gwô tswoŋ kyaŋ əkwo Zɨzərag Ntswa ə lyyad bə +ulwo nnwan Əgwaza na ni."