¹ Anni rudəma Bil yiisu Yeeso Kweebaaz no̱k səna geesə seniya ulləi ina bo'rumkpa de'randə. Tom senza ulləz naa doosə Yonna. ² Yohanna gwesapu paka Billək naa paka ipu dookrə Yeeso Kweebaazə paak neta og attə. ³ Iya naa sə'səmaiyi i zangə naa gera paari, naa iya i ke'to paka ina bo'rumkpandə, naa ura gə duu paka pu biisənkəkaz, no̱k zoora rool pu mis. ⁴ Mii Yohanna rekarə ikiliisiyaiya gbansa Asiyai, go'num naa gapta wessat diga ura puu, naa ura do̱o̱z, gwanzi gə zak bən, naa gəbən rumsa gbansas gwandə ar gwantə mu'us. ⁵ Gəbən Yeeso Kweebaaz , ura esə timr sə i seiduz ura i see dingku iya i wərairəz naa gwanza gwaniya dəlləi. Iya i ii airə sə keesaa hakkeirə gwandə kwaalə. ⁶ Yerapu mariya naa gwantai, firissiiya gwandə Daa Billəi gwandəzi gbi'kəm naa le'sum ting ting. Na gau ri' ⁷ Gwenən, pa zakrə kolirə te'; no' i oku tele, haa naa iya i bagui. Gəbən me'teya dəlləi yas i gakp wagər no̱k ur. O̱o, Na gau ri'. ⁸ ''Miizi seeka naa ɓamna,'' Daa Bil doo ri', ''Ura uzi wonka, naa do̱o̱z, na gə ura zakaz, ura ar Gbi'kəmrəz.'' ⁹ Mii Yohanna doowiya iirə a ɓər baar yamaz gwantə naa ɓəska baara pau Yeeso rəl, gbagsəra i der Batmusal no̱k paka Billək naa gəbən seedaakuma Yeesorə paam. ¹⁰ Npu Rumsə roo ubla Billəkrə. sei n gee gwera naa gbam mində sa' ni porak. ¹¹ Doose bonge, ''Biim ina a og rababaazə sə a tomsə ikiliisiya gbansa airə Afisus, rekarə Simina, rekarə Birgamas, rekarə gə Tiyatira, rekarə Sardisu, rekarə Filadalfiya, naa gəbən rekarə Laudikiya.'' ¹² N yerə n iii nka gwen neezi naa gwera pak naa miikya, de n yer n og fitilai gbansa naa kangeeri ara i dognikrə. ¹³ Uza pii fitilairə te' ni Waa ma'zak, punaa yaləna ye'kapa haa diiri, naa kangeeri ko'supu te' gwandə gumbrə. ¹⁴ Zura ulləl naa suka ullək pu seeya ni buusak, ni sakta talwuzzətak gə no'a ulləi ipu na meela ra'rəl ak. ¹⁵ Dənta ullət sekəm puni weesa i noos ra'rəl ak sə i geekəs i keetitə ra'a tibairək, gwera ullək ni wuguma wuu du'rəmak. ¹⁶ Punaa zosi gbansa na' go'naa ulləkrə, fonkaaz na sut ittərə keetə ullə su'rə. Muuga ullək okə ni ublak yaarak. ¹⁷ De n ogun n fo'sum ni roobaazak gwandə dəntə, sei gbag na' go'naa ullək miirə paa sə doo bonge, ''Kaa serəm pa. Miizi ma'karə naa ɓamnarə, ¹⁸ naa gə maza naa zəngsazzə. N wər ama gwenən npunaa zəngs haa ting ting! Npunaa mabudiya wərkrəz naa ar gamnaa roobairək rəz. ¹⁹ No̱ka ri'ik biim ina a ogan, ina ri'ak n naa ina bo'rumkpa mu'kan. ²⁰ Ni paka sumsənka zosiya gbansa a ogi miirə na' go'narə ai, naa fitilaiya gbansa naa kangeeri ai: Zosi a gbansa ai malaikaiyi ikiliisiya gbansa airəi, gəbən fitilaiya gbansa ai ikiliisiya gbansa aiyi.''