¹ Yaakubu se̱nza Bil naa Daa a aaz Yeeso Kweebaazəz, rekarə me̱'teya komna na ittəko i fakssairo, N də'sen. ² Uri yangi, pe'en ina yaksa zokrənni ina tor ɓərka baar somaso'rə, ³ Me̱e̱n gweka eska timra iil kamtək we̱ngska timr. ⁴ Daan we̱ngka timra ill na ɓams toms nok sə i gau mariya i tə'sapu, una le'i pai . ⁵ Ama uza iirə te' na ii me̱e̱ka, na oorə Bil ura ɓoo paz, esək ura ooruz, ro'̱kən pa. ⁶ Ama na oorə naa eska timra sinəm pii pal, nok ura punaa sinəm timləz goopu zaka witaa gbonarə ruurək. ⁷ Maza rooz naa sundo bo kink ina bo laa daa Billən pa; ⁸ irəm mazzi punaa timte ittee, de' ar muko pa. ⁹ Or waza naa zaamaz na də'rum na gbi'kima ulləm, ¹⁰ ama ura naa na'az boo na tiisək zok nok wo̱'o̱k ni buruma wo̱'som wo̱'o̱nak. ¹¹ Nok ubla dəgtə ma'ankək sə wo̱'o̱s kos. Buruma ulləm reks sə ootuma ulləm wó̱' ves. Riizi gəbən mariya naa na'ai i assək. ¹² Maza naa sə̀'səmazzi ura we̱ngs zok gwekaa kirez, kink me̱e̱tuwolla zəngsə a i bo̱'rə alkawal i esku iya i ii Billaiyaz. ¹³ Ina gwek uza naa doo bonge, "Gwekaa ak keetə Billə pa", nok Bil gweg maz naa e̱ngku pa, Bil naa zura gwandəl gweg uza pa. ¹⁴ Ama koo ne̱e̱ya gweg zok naa ne̱ta kimdə səəru sə pe'su timrat. ¹⁵ Neta kimdə e̱ngkurət na noosapu dingtə hakkei, hakkei na noosapu i kamtə wərk. ¹⁶ Ka ina səərən pa uriyangiya n íini pai. ¹⁷ Kala esəka oomik keetə paari, tiitə diga Daa a oosarəzzə. Ullo aska zok pii ni zəngnə i adək pa. ¹⁸ Bil te̱e̱gə eskaa zəngs naa paka zəmak nok sə ana gau ni yangiya se̱e̱niya ullə ne̱ta womattə. ¹⁹ Me̱e̱n an uriyangiya n iinipai. Koo ne̱e̱ya na gbakə geeka pak, na ɓəs baar baka pakkirə, na ɓəs baar suksa baalə, ²⁰ nok suksa baara mazzəl bo̱'rə go̱'numa Billəm pa. ²¹ Nok riik tusən ne̱ta hakkeirət yas naa e̱ngkuwa pu koo arayau, tiiska zullə te' i kwee paka i də'ək, ura kees zəngsa iisas.̱ ²² Kai gau mariya i gee pakai kotto pa, duun nok kai səərə zuta iit pa. ²³ Nok uza na gee paka rook səna bo'rə pa goopu maza gwen muuga ullək daarogallək. ²⁴ Gwen muuga ullək, na ri'ge sei zins ni gook. ²⁵ Ama maza gwen naa hakkilo dookairəz, dookaiya keeskarəi, sə ree mu naa duuka, gau geebaaza zinssaz pa, mazzi kink sə̀'səm ina bo'rəndə. ²⁶ Uza na sundo bopu duuk Billə ama ne̱e̱ me̱e̱la ulləl pa, səərə zura gwandəlli, duuka Billa ulləl pu zuk. ²⁷ Duuka Billa oomi naa laaatər pal uki, po'ka yanga daani naa tuuki ɓərka baara iilə, naa gə kaŋgbuska zur laatera dəlləllə.