¹ Do̱ka do̱' Bil pag naa do̱'ga mariya aai anabawaya ulləirə, dən gənŋa billət soma so̱. ² Ama ru'a airə, Bil pag naa aa Waza ulləzzə, ura de'su pe'ba ɓintezəz koo andə paya tele, ura gə ulləzi sə wom dəllaz. ³ Waza ullə ezi uzi dənta oosaa ullə gbi'kəmrək, goosa ullə zəmas, noos koo anya naa gbama ullə pakrəm. De' le' ra'aska hakkei, sə gau na' go'naa ura naa Gbi'kəm paarikrə. ⁴ Uza gau naa gbi'kəm malaikairə, ni riira pe'tel punaa gbi'kəm haa ar ri'teya iirəi wessawe'. ⁵ Malaikaa pazzi Bil meɗe doosu bonge, ''Moozi waza miiz, wonka N gapsapu daa mooz'' naa gəbən, ''N gakp daa ulləz, ur bən gakp waza miiz paya?'' ⁶ Gəbən de Bil kamtə Waza ullə seenzaz dəllə roo, doo bonge, "Malaikai yas ina noosu." ⁷ Malaikairə paa doo bonge, "Yes malaikaiya ulləi rumsəs, seniya ulləi ra'a egǝkǝk." ⁸ Ama Wazzirə paa doo bonge, ''Teng gwanta moot, Bil gakp tingting. Gbala gwanta moot uki gbala wessak. ⁹ No̱k a gbaa gban go'num sə a mu'us ina go'pan. No̱ka ri'ik Billa mool, woosapu naa waaga yaksa zokrək haa a ar iya i noo yammai.'' ¹⁰ "Ma'karə Daa Bil a kur dəl. Ara billə paak tomsa mondə nattəssi. ¹¹ I laak lan ama moo a rək mu'ka, i busək ni yaluk. ¹² A kooki ni gbette sə i yetək ni yaluk. Ama moo apu ni a pinnak, wi' a mooi i ɓamkp pa." ¹³ Ama malaikairə te' neezi Bill meɗə dooka bonge, "Gam na' go'naa miikrə, Sei mina yesapu umkeereiya mooi ar de'səna dənta moot ya"? ¹⁴ Malaikai yas rumsa i tom no̱k ina noose sǝ ina gbaa iya i pe'ek ɓinta iya kweekii paya?