¹ Bulus manzo, manzo a keetə marirə koo maz uzare paz, ama diga Yeeso Kweebaazə naa Daa Billə, ura ruusu diga roobaamrəz, ² naa uriyangiya epu yamai tele, rekarə ikiliisiyaiya Galantiyai: ³ Go'nəm zakarə iirə naa gapta wessat diga Daa Bil Daa aaz naa Dangwanz Yeeso Kweebaaz, ⁴ Ura esə zura ulləl nok hakkeiya ai sə boo ke̱e̱saa zoora e̱nkurəllə, ni Daa Billa aal sundunnak, ⁵ nooska na gau ullə diga ri'ak ting ting. Na gau ri'. ⁶ Inni məsse wessa we', de i yese maza derənnaz kur naa gbaku sə i duu paka tingkak uza rəz som. Inni gə məssə nok i yerəpu sə i daa ura derən nok go'numa Kweebaazəm. ⁷ Paka tingkak uka pii som pa. Ama mari uri i pii sə i səərən sə i ii yerka paka tingkaa Kweebaazək. ⁸ Koo ee koo malaikai diga billə paa ina doosən paka tingkak uka som naa a e doosənnak, su' kamkpu. ⁹ Ni e doon pììk, npu dookrə bən ''Uza na doosən paka tingkak som naa a i kweeuwaz, su' kamkpu.'' ¹⁰ Ri'ak gə n laa seedakum mazzə koo Billə ya? N laa yaksəka mari zok ya? Mina bo'rə ina yaksək màri zokan, mii se̱nza Yeeso Kweebaazəzzi pa. ¹¹ N ii minge i me̱e̱, uriyangi, paka tingka n doo ak a mazzəkki pa. ¹² N kweetu uzarə pa, maz boo ge̱e̱seu pa. Gobtəra ri'ik, ina Yeeso Kweebaaz yiisenni. ¹³ I gee gen gapta miit Yahudawaam rəm, ni n ɓəsən ikiliisiyaa Billəz baar go̱'səma go̱'o̱g, n yaa no̱k sə n wo̱'gəsu. ¹⁴ Npu rekrə mu' naa Yahudawaam haa n ar doowi gbamiya mii yam, diga mariya miirə. Uki n gau naa warkiis haa langsiya miirə do'ga marirəirə. ¹⁵ Ama de tinsə Bil sə te̱e̱ge diga maiya miizə baalə, sə de̱re go'nəma ulləmrə ¹⁶ sə yiise waza ulləz nok sə mina doosə meŋnki paka ullək, n gbar de̱ska maz uza pa. ¹⁷ Gəbən n ree Urusalima iya i gau manzaaniiya se̱e̱niyairə pa. Gobtəra ri'ik n ri'gə Araabiya sə n gətə Dimaskus. ¹⁸ De wi' taarəi i ar, n ree Urusalima nok meeka Kefas si n gabtə naa ur ru' komna naa gbanaarəi. ¹⁹ Ama n ogtə manzaaniz koo muzə pa sei Yaakubu doowiya Yeesu Dangwanzəz. ²⁰ Zəmazə Billə mu', ina n biisənnan n bo'rə songbi pa. ²¹ Sə n ri'gə buta Suuriya naa Kiliikiyattə. ²² Haa ri'ak ikiliisiyaiya Kweebaazə Yahuudiyai i me̱e̱ye pa. ²³ I geegen kotto bonge, ''Maza dó̱o̱ ɓəsaa baar az, ri'ak pu bo̱'o̱k wa'aziya eska timlə do̱ka yaan wo̱'o̱skuzzə.'' ²⁴ I noos Bil nok mii.