¹ Bulus, manzoo Kweebaaz Yeeso rəz naa iikaa Billək, rekarə mariya naa riisəm Billə Afisussairə, iya i esə timr Kweebaaz Yeesorəire. ² Go'num na gau naa ii naa gabta wessat diga Daa aaz Bil naa Dangwanz Yeeso Kweebaazət. ³ Bil naa Daa aarǝ Dangwanzəz Yeeso Kweebaaz na noos zok, ura sə'saa naa sə'səma rumsa billəssə a keetə billə paa. ⁴ Bil teegaapu ullə diga ma'ka dəl, teegaa sə ana gau ookapa iya ipunaa aibe pa ullə mu'ui. ⁵ Bil teegaa nok iikaa ullək sə ana gau yangiya ullei Yeesso Kweebaazǝ, Bo'rə ri'zi naa Iikaa gwandək. ⁶ Tingtuma room umi Bil noos zok go'numa ulləmrǝ ina esaa kotto nok Waza gwandə iinupaz. ⁷ Yeeso Kweebaazə a kin keeska nok kwaala ulləl naa ra'sǝskaa hakkeirǝk, a kin nok esǝkaa ullə go'numrək. ⁸ Esee go'numa ulləm gənɲa rekarə aarə nok geegəska naa me̱e̱gəska. ⁹ Bil yiisaa sumsuma ullə ɓo'rarəm naa iika ullək Kweebaazzə. ¹⁰ Nok bəl na go'sapu yiiska sundume a ulləirə daksək neta billə paat naa buttə diit yas Kweebaaze dii. ¹¹ I teegaa Kweebaazə ana gau pe'ba ɓintei. Sə ana gau naa zo'kaa gwandəkrə, go'rə koo anya naa iika gwandək. ¹² Bil teegaa ana gau pe'ba ɓintei no̱k sə ana gau iya seeniya i kinə gbaksa tók Kweebaazə, sə a gau no̱k nooska go'numa ulləmrə. ¹³ Nok Kweebaazəzi, sə ii boo, i kinə paka zəma, paka tingka kweekaa iikrək, i esəpu timr ullə sə i bi'sən na' naa alkawalla Rumsa Oomissəs, ¹⁴ Uzi tabbuskaa ɓinta andət anagə kinə, rekerə nooska go'numa ulləmrə. ¹⁵ Nok ri'ik, diga zoora n geen eska timra iil Daa Yeesorək naa gbaaka iik rekarə mariya naa riisəm Billəi, ¹⁶ N gbas iiska Bil useeko no̱k moo ii pa, naa derka riira iil weerəka miikrə. ¹⁷ N weerə Billa Daa aaz Yeeso Kweebaazəl, Daa naa gbi'kəmaz, na esǝn rumsa me̱e̱gəskarəz naa ruduma me̱e̱kaa ulləkrəm. ¹⁸ N weerǝ Bil nok no'a iirǝ timləi i geesən ni i me̱e̱kən koo anyak, sə ina mee naa gbakska tók ina i dǝnnənnandə naa esəka go'numa ullə ɓintemrək iya naa riisəm Billəi tele. ¹⁹ Npu weerəkrə sə i mee gbi'kəma ullə kəspam naa gə gbamma ulləm rekarə aarə aa a esə timr ulləi, nok tomsa ullə naa gbamaz. ²⁰ Uni gbi'kəma bo'rə Kweebaazəm zoora ruusunu diga roobaairə te' sə gabsunu gwandə na' go'narə paarikrə. ²¹ De'su koo andə paya yas diga gbi'kəm naa gwant, kala riira der zokan Kweebaaz gakp gwant ullə paa, wi'a airə kotto pa, ama naa wi'a zakrə mu'kairə. ²² Bil de'sapu koo anya Kweebaazə dəntə dii gapsu uzi zur ikiliisiyarə naa koo anya tele. ²³ Ikiliisiya zoka ullokki, yi'səkaa ulləkki yi'is koo anya yas.