¹ Ni ika mee ni n bərin baar wessa nok iik, nok iya ipu Lawudikiyai, naa i uri gənga a zokrə i medə oka mug pai. ² N bo'rə toms nok sə tiomtə a ii ina me̱e̱ de'eska zoka iiki daksi goonəm rə rekrə zaudi a de̱e̱nu zəngs naa məgəska sum səm a zəma Billəm, wato Kwebaaz. ³ Gwandə zi bəəku naa məgəska pu sumə nən yas. ⁴ N doosən ri'eri nok uza kana sərim naa pak uka a pe̱e̱sək sundume a ii ak pa. ⁵ ko noka n pu naa ii zokrə ro' pak yas naa riik n pu naa ii rumsə. Ina pu yaksa zokrə nok n okən on ina wessan də na gbaama eska timra ill Kwebaaz zə. ⁶ Ni i kween Dangwanz Kwebaaz ak, riigən riigətta iit ni gwan ak. ⁷ De'en naa gbaama gwandən, sə ina woomən gwandə pa', sə i es timr goonəm rə ni i kubrusənən ak, sə i yas ar nok ika useiko. ⁸ De'sən zok uza kana sərən pa naa kubruskəna ullək, nok pu zuk lasiya irə marirəi rə, rigəskəna naa net a dəllət pa, ama naa rigəskəna Kwebaaz zək. ⁹ Nok ullə zi sə goonəma Billə zokn rəu gau. ¹⁰ I yiis gwandə, gwanzi zura gbaam rəl yas naa gbikəm. ¹¹ Gwandə zi i na'won naa goosa maz'zək rə i dəsən zok ak pa, ama nakpaa Kwebaazək rə. ¹² I iin naa ur batisma rə, sə gə ulləzi i ruusən rəkarə eska timrlə naa gbikəma Billəm, ura ruusu iya i wər airə. ¹³ Noka i wərən hakkeirə te' naa nakpa zokrək, ruusə naa zəngsa gwandə sə gə ra'səsaa hakkeiya ai. ¹⁴ Sə ra'səsa hakkeiya ai yas. Sə ra'səsa hakkeiya arə bisənən ai, naa ro'oknaiya ipu arə mu'ui. pe̱e̱si yas, sə renni vaga rau rə. ¹⁵ Sə le'es gbaam naa gbikəma, sə yiisə dəl ka'ka allə, sə kinə le'eska gwanirə pa vaga rau rə. ¹⁶ Nok, sə uza kana zəəsən bis rek rə ko bo'karə pa, ko ubla naasək rə, ko se' a pəkka gbətək ak, ko ubla əngəska rə. ¹⁷ Zəngsa neta zak attək, ama zəma rəki Kwebaaz . ¹⁸ Uza muzo ura i tiska zur zs nooska tombairək kana zəəsən bis, sə na le'nən kinka fasəm pa. Irəm maza ri'ezi tor pu neta og at sə gopsək hakkilo a ulləs sundume azok rəi rə. ¹⁹ Kamz zullə pa. Nok zullə zi sə zok naa dalət yas dakən naa se'em sə dakən yas; Sə dag naa dagsəra Bil esun. ²⁰ Ina wər naa Kwebaaz yam nok neta dəllət, nok an sə i gau gapta ni i pu dəllət ya; ²¹ ''Kai kam pa, kai gek pa, kai pa' pa. ²² Neta eti yas neta laksə atti, do̱kaa naa kubruskəna a mari rək rə. ²³ Ro'oknai a ei ipu naa megəska zok rək naa diina rək, a i kamtə nok tiska zur, naa ɓasu, naa zok. Ama i go' zokrə pa.