¹ Bulus manzo'a Yeeso Kweebaazəz Bil deru naa Timotaawus ungwanza aaz, ² Rəkarə mariya i es timr Yeeso Kwebaaz zə Kolosiyaawi. Gapta wessat naa go'numa Daaa aaz Billəm rə na gau naa ii. ³ É iisə Bil Daaa Daaa aarə Yeeso Kweebaazəz usuko, gə koo bənnaya epu we̱̱e̱rək Billə no̱k moo ii. ⁴ E gee gen eska timra iilə Yeeso Kweebaazzə, naa gbaaka iirə mariya Bil te̱e̱gii rək. ⁵ I puna gbaaka eki nok riika baara ina í gbaksən billə paan də. I geesapu riika baara zema'ze'el paka tingkakrəl ⁶ Paka tingka zasən ak, pu dakrə pu yasək dəllə. Pu bo'runkgkpa rə ri'eri iirə te' diga ublaa i ma'an geeka gə sə i kubrun go'numa Billə zəmmammak. ⁷ Paka tingka ak uki ni i kubrutən doowiya aarə á iinu pa ar to̱msəz Abafaras sək, ura kamsə Kweebaaz to̱ms wessa no̱k ááz. ⁸ Abafaras doose pu gbaakáá iirə Rumsək. ⁹ No̱k gbaaka eki diga ublaa e geenak é gbas we̱e̱rəka Bil no̱k ii pa. Epu oorukrə nok sə i gau naa me̱e̱ka ullək naa me̱e̱gəskaa Rumsək. ¹⁰ Epu we̱e̱rək Billə nok sə i ri'gə ri'gətta to̱o̱ Daat ko bila a pakrə ya. Epu we̱e̱rəkrə nok sə i ree mu' naa me̱e̱ka Bil. ¹¹ Epu we̱e̱rək Billə no̱k sə i wengs zok le'ka koo andəya rekarə gbi'kəma ullə nooskarə ɓampam naa ɓəska baaləm. ¹² Epu we̱e̱rək Billə i ììk usukoa yaksa zokrəs Daarə ura bo'rə sə i kin torka ɓinta iya i esə timr oosa rəirə. ¹³ Gbittaa diga gwanta təgra rəssə sə kamtaa gwanta Waza gwandə iinu pazzə. ¹⁴ Waza ulləzzəzzi sə a kinə dopska naa ra'askaa hakkeirək. ¹⁵ Wazzi uzi go̱o̱sa Billa og zok palləz. Uzi i se̱e̱u womkpa. ¹⁶ Nok ulləzi sə wom koo anya, neta billə paat naa a dəllə te'et, a og zok naa a og zok pat. Koo teng gwani koo gwant, koo gwani, koo le'sum, gwanzi wom koo anya no̱k zura gwandəl. ¹⁷ Uzi zanŋa sə koo anya tele, gə ulləzi net yas daksək zok. ¹⁸ Uzi zura ikiliisiyairəl. Uzi ura se̱e̱nza ma' ruuka roobaamrəz, no̱ka ri'ik uzi naa ara se̱e̱nkak koo andəya tele. ¹⁹ Zok yak Bil, no̱k koo anya pu yiisəntət ullə, ²⁰ səna geekəns koo anya Waza ulləzzə. Bil na kamtə gabta wessat kuuska kwaala ulləl vaga raurəllə. Bil geekəns koo anya rekarə ullə, ko neta dəllət ko neta pu billə paat. ²¹ No̱k do̱o̱ íí mara giniyi Billə, gəbən keereiyi timterə roo naa tomteya enkurəi. ²² Bo'rə ri'eri no̱k sə bo yiin mariya wessai iya i doo ina go'pan iirə paa pai gwandə mu'. ²³ Ina pu rekrə mu' naa eska timr, naa de'eska zok naa kepska naa riika baara iirə zəmal paka tinka tingka i geekrə. Paka tingka eki uki i i doosə koo neeya ura pu dəlləz. Paka tingka akki uki mii Bulus n yen to̱mbaaz. ²⁴ Ri'ak npunaa yaksa zok bərka baar miilə no̱k íí, gə n npu yi'sək ɓərka baara seetə Kweebaazəllə miirə zokrə, no̱k zoka ulləkki ikiliisiya. ²⁵ No̱k ikiliisiya sə n gau to̱mbaaz tomsa Bil essəssə no̱k íí, sə n reksən paka Billək. ²⁶ Uni sumsuma zəmam i sums wi'a i arairəm ama ri'ak i keetəpu kaaka allə iya i esə timr ulləirə. ²⁷ Íírəzi Bil íí keeska gbi'kəma sumsumrəm rekarə menkirə. Kwebaaza pu iirə ezi uzi de'eska zoka gbi'kəma zakamdəz. ²⁸ Uzi e bo'rə wa'aaziya ulləz, kubrusən koo neeya sə gə i dingsə koo neeya to' naa me̱e̱gəskəna, no̱k e yiik koo neeya wessa Kweebaazə. ²⁹ Uki sə n toməm naa yapru pa no̱ka gbaama ulləm pu tomsə miirə.