¹ Epu oorukəndə uri yangi paka zaka Daa aarəz Yesso kweebaazzə, naa tookənkaa aarə ullo mu' ² naa sundumi timtəya ii kaina lamya pa, zengsa iis kana ruu pa, koo nok rums koo pak ko rababaaza gə̱ə̱ keetə érəz, naa sundumə a ubla Daa Bill zakən ak pu ang. ³ Uza kana serəm ko Bilaa pak rəya pa. Na zaa, gwanza ruguska ulləz gɓə̀tik ezi. ⁴ Ur umkeerəzi noos zura gwandəl az mu'us ina puna ri'ra Billəl ang, haa gau gwaaga Billək rə sə doogə boozi Bill. ⁵ I sundə bəllka i pin yam alpa allə i doosa neta at paya? ⁶ ri'ak i meemen ina punaur ang nok sə kana gɓere diga bəlli go' dən pa. ⁷ Nok ina sumsənan pu gɓə̀tikrə kaaka allə: sei dei ura ro'onnaz pii rək mu' naa ro'okna sei ublaa i esnuk. ⁸ Sə ura kaas bis ezi gɓə̀tik , Daa Yesso wo'suku naa pipsaa gwandə zokro, naa gɓerka ullok zakarə sə woosuku. ⁹ Ura zak ulooz pu tomsa Setan es ppa, naa gɓi'kəm yas naa alamai naa neta mesərət song rət. ¹⁰ Naa seerəme a go'num pini pai nok iya i wook ai, de' i ii gɓaaka kwekaa gɓaaka zemak pa i gɓisikən pak. ¹¹ Noka ri'ik sə Bill tomtikini meegəskəna pa iirə nok sə ina meegəs song. ¹² Sə i zeesəki bis, iya i esə timr pai i mu'us meegəskəna ina zeman sə zok yagi engkuro. ¹³ Ama koo benaya iisəm Bill useeko nok ii, uriyangiya Bill gɓaay ai nok Bill teegən diga ma'karə, nok neesəka rumsok rə naa iika irə zemak , ¹⁴ detən nok paka tingkak aarə nok sə i kine Daa aarəz Yesso Kweebaaz. ¹⁵ Nok ri'ik uriyangi, sei i de' naa gɓam sə i keerə ina kubruskəna ang koona pakrə naa su' koo rababaazə. ¹⁶ Ri'ak Daa aaz Yesso Kweebaaz, naa Daa Billa aal ura gɓaaz sə ina esaa gɓopsəka timr wessal naa eska timra wessal go'numma ullom rə. ¹⁷ Naa gɓopsəsən timr səna wemgrəsən zok, koo tomsa passiya naa pak.