¹ Ri'ak ri'erizi paka kweeka neta esəkrət te' ak, ni n doosən mariya i esə timr Gaalatiyai, i bən bo'on rii. ² Ublaa seenka ma'ka lumma rəkrə, koo neeya na sums wa una topa ni kinənnak. Nok mina zaa dakska una piipa. ³ Mina rektə, ura i kaau az n tomkpu naa rababaaz sə na kam esəka iik Ursaalima. ⁴ Na bo'rum haa sə mii mina rekren sei e ri'gək yam. ⁵ N zak zan iirə mina kootə buta Makedoniya attə. No̱k n duutək dəlla Makedoniyallə. ⁶ Ləəgə n lo'oklon koo n ɓamsək niig naa ii nok sə i de'ete ara n rekənakrə. ⁷ N ii gwenkən sə n arpa, n ii in gapt naa ii wáá ru'rə te', Dangwanz na ii gə. ⁸ Ama n gakp dəlla Afisallə haa ubla pentikos nagə zaa, ⁹ i gbe'rəsapu bilaa aakapak bo'ka tomsa wessassək, ama umkeerei ipu gənŋa. ¹⁰ Timoti na záá iirə te' ser kana kamu pa, nok pu bo'ok tomsa Dangwanzəz sə, ni n bo'on ak. ¹¹ Ko maz kana ɓə'su pa, keetunu wessa sə na gətə mirə. No̱k npu gwenk bilaa ulləkrə na uriyangi. ¹² Paka doowiya aazək Afolos n ooru wessa we' na záá iirə naa uriyangiya i seetəi. Ama dən sundə zaka pa. Ama zak zan bəlla og to̱o̱lə. ¹³ Gamn naa gbaksa tok, de'sən zok eska timra iilə, esən gbam sə i weng ni marik. ¹⁴ Ina i bo'kan yas bo'on naa gbaaka. ¹⁵ Uriyangi ri'ak i me̱e̱men mariya Istifaanussə gwa'ai yangiya seeniyaiyi dəlla Akaayallə, i esə zu'teya gwanirəi nok tomsa iya esə timrai. Npu oorukəndə uriyangi. ¹⁶ I gau mariya i duu ina i doon ai, naa iya i do'sáá tomsəi sə i tom naa aa. ¹⁷ N gee yaksa zok naa zaka Istifanuus sək naa Fartunatus, naa Akaikas, nok iya ipu roopai. ¹⁸ Nok i wees rumsa miis naa iis. Nok sə i gba mariya ri'ai, ¹⁹ Ikiliisiya Asiyairəi ipu də'əskəndə, Akila naa Bilkiisu i də'sən riira Dangwanz zəllə. Naa iya i esə timr iirə gwa'ai. ²⁰ Uriyangi yas ipu də'əskəndə. Də'sən koo neeya naa kukgbənkaa oomik. ²¹ Mii Buulus, n biitə də'əskaa ak naa na'a mindəi. ²² Ura gbaa Dangwanz paz, ur maza zuk azzi. Dangwanza aaz pu zakrə. ²³ Go'numa Dangwanza aaz Yeeso rəm na gau naa ii. ²⁴ Gbaaka na gau naa ii Dangwanz Yessorə.