¹ Uriyangi n ii ika sundusən, paka tingka n doosənnak a i kwee sə ipu duukrək. ² Sə i kinən kweekak, ina kam wessa we' ni n geesənnak, ina kwee páá páá zi pagə. ³ N dooskən ina an wessa we' ni n kweetənak: ge Kweebaaz wər nok hakkeiya ai ni rababai i doonak. ⁴ Gee i iisu, i ruusu ublutta taatəttə ni rababai i doonak. ⁵ Kweebaaz gbəsə Keefas sə gə gbəsə iya komna naa ittəkəi ai. ⁶ Sə gə gbəsə mari zu' zur naa gbanarəi zoora mulləllə, haa ri'ak uri iirə te' i pii uri boo i ruspu. ⁷ Sə gbə'sə Yakubu sə gə manzaani. ⁸ Ɓapsaa rookrə gbəse mii, miya n rəks unanən paz gə n topaz. ⁹ No̱k miizi waizəz manzaanirə te'. N rəks ara ika dənne manzo pak no̱k n ɓəs ikiliisiya Billək baar. ¹⁰ Ama no̱k go'numa Billəm sə n gau ni n pinnak, go'numa bo'sem bən ree zuk pa. Gobtəra ri'il, miizi pa go'numa Billə pu miirə. N kam toms naa timr mulə sə n ari ii yas. ¹¹ Ri'eri ko mii ko ii, e doo paka Billək sə i esə timr. ¹² Riizi i doo paka Kweebaazə i ruusnu roobaamrək, bo'rə ga sə uri iirə te i doo bonge ruukaa roobamrək pii paya? ¹³ Sə ruukaa roobaamrək na piipa gə, ekigə i ruus Kweebaaz pa; ¹⁴ ina ruus Kweebaaz pagə, paka Billə aarə a doo ak zuk zi, eska timra al bən zuk zi. ¹⁵ Gauni a doo ina bo'rum Billə pan ak, nok a doosapu Billi ruus Kweebaaz ura boo ruusu paz. ¹⁶ Nok ina ruus roobai pa, Kweebaaz bən i ruusu pa; ¹⁷ ina ruus Kweebaaz pa, eska timra iil zukzi haa es ipunaa hakkeiya ii. ¹⁸ Napu ri'gə iya i rus Kweebaazəi i wo̱'pu. ¹⁹ Naka zəngsə zi kotto sə a esə timr Kweebaazə, mari yas ika gaupu ina yirkurən. ²⁰ Zoka Kweebaaz i ruusupu roobaamrə, uzi dokta seentat iya i rus airə. ²¹ Ri'erizi de wərk duutə mazzə ri'erizi bən ruukaa roobamrək pu mazzə. ²² Ni wərk zan nok Adamuk, riizi bən i ruusək koo neeya nok Kweebaaz. ²³ Koo anya gbo'sirə gbo: Kwebaazi, dokta seentat sə iya ipu Kwebaazəi i ruuski ublaa gətkənnakrə. ²⁴ Sə ɓapsa zak. Zoora Kweebaaz gəskən Daa Bil gwantal. Na kweerəpu gwant naa gbi'kəm naa gbam. ²⁵ Nok gakp gwant sə digt umkeerəiya ulləi gwandə dəntə dii. ²⁶ Umkeereza ɓapsarə i wo̱'o̱skuz uzi wərk ²⁷ Nok ''uzi digt koo anya gwandə dəntə dii.'' Ama naka doon bonge, ''i de'espu koo anya,'' pu kaakarə ur ura de'es koo anya gwandə gbi'kəmrə diiz espu. ²⁸ Net yas nakapu gwandə gbi'kəmrə dii, sə ura Wazaz naa zura gwandəl kapu ura net yas pu gwandə gbi'kəmrə diiz. Ina eni bo'rumka no̱k Daa Bil gwanzi koo anya yas. ²⁹ Naka ri'eri pa iya i neesipu batismai nok roobaam aiya? Ina ka ruus ro̱o̱bai pa ves, nok an sə i bo'sə uri batisma nok ii ya? ³⁰ Nok an sə a ɓər baar zoor yas ya? ³¹ Uriyangi n ɗuns kur nok mooi Kweebaaz Yeesorə Dangwanza aaz, n espu zur nok wərk kala ubla. ³² N kink anya go̱o̱sa mazzəz sə mina gwa ro̱'o̱r naa galətta wo̱'sət dəlla Afisallə, ina ruus ro̱o̱bai pa gə? ''A regə a bo̱' a zo' wərk bo'ta.'' ³³ Kaina səərən pa: ''Gabta naa enkabai at uti laks go̱o̱sa wessas.'' ³⁴ Pigən rumrə! sə i kam tomsa wessas! dààn bo'ka hakkei. Nok uri iirə te' ipunaa meeka Billək pa. N doo ri' sə zur na dəgən. ³⁵ Ləəgə uri i de'sək, ''I ruus roobai rigaya, naa irəm zoka pakki i zakən ya?'' ³⁶ Moo ii mee pa! Ina i ta'an ɓu'tuk pa sei na wərpu zanga. ³⁷ Ina i ta'an uni gbətək pa, ama ɓu'tuk doktət. Ni alkamak ko unanən. ³⁸ Ama gwan Billi yes kala doga ni goosu gwanak, ni kala doga naa goosa ulləzak. ³⁹ Nams a zokrəs a musəs sipa. Gobtəra ri'il, mari naa namsa iis, do'net naa a iis, noi naa iis, dukt naa iit. ⁴⁰ Zogruma billə paam pu som a dəlləm pu som. Zogruma noo paarim pu som zogruma noo dəlləm pu som. ⁴¹ Gbi'kəma ublarəm pu som naa oosaa se' rək, ni gbi'kəma zosirəmak. Zosəz uza ar an uza gbi'kəmrə. ⁴² Ri'erizi bən ruukaa roobaamrək. I ruuk zok naa go̱o̱sa bumkpa rəs, ama i ruu naa go̱o̱sa bumpas. ⁴³ I ta' naa enku i ruus naa gbi'kəm i ta' naa yapru i ruus naa gbam. ⁴⁴ I ta' naa go̱o̱sa zokrəs; i ruus naa go̱o̱sa rumsəs. Də zoka marəmrək pii, ri'erizi bən zoka rumsək pii. ⁴⁵ Ri'erizi bən pu biisənən bonge, ''Adamu maza seenzaz gau maza naa zəngsaz.'' Adamu a ɓapsarəz boo gau naa zəngsa eska rumsəs. ⁴⁶ Go̱o̱sa rumsəs gau ma'karə pa sei goosa zokrəz, sə a rumsəs. ⁴⁷ Maza seenzaz gau dəllə, i wo̱mu naa but. Maz ittəzəz ke̱e̱tə Billə paari. ⁴⁸ Ni ura i go'ru naa butas, ri'erizi bən iya i keetə paarii. ⁴⁹ Ni a pe'en go̱o̱sa zoka buttəs ak ri'erizi bən a pe'ek go̱o̱sa ura paaris səs. ⁵⁰ Ri'erizi bən uriyangi, npu dooskəndə zok naa kwaal kink gwanta Billət pa. Ri'eri zi ura bumb az pe'ek ɓinta ura bumpazzət pa. ⁵¹ Gwenən! N dooskən paka sumsənka zəmak: A wərk aa yas pa, ama i yerk yen go̱o̱sa aarə zokrəs yas. ⁵² I yerk go̱o̱sa as ri'ak, ni umkpa norak, poraa ɓapsarək na piptə zok. Poraa eki na piptə zok i ruusək iya i wərai sə i yerk go̱o̱sa aarə zokrəs. ⁵³ Ri'erizi ura wər az na ruutə zəngsə ura punaa zəngsas boo yerk rekarə zəngsə. ⁵⁴ Ura wər az na ruutə zəngsə, sə ura naa zəngsaz naa yer zəngsə, sə ina bii an bo'rumkpa bonge, ''I wo̱'o̱s wərk gbi'kəmrə.'' ⁵⁵ ''Wərk, gbi'kəma moom aa pam ya? Wərk, salla mool a palya?'' ⁵⁶ Hakkei uki salla wərk rəl, gbama hakkei rəm umi biis. ⁵⁷ A iisə Bil useeko, ura esaa gbi'kəm Dangwanza az Yeeso Kwebaazə! ⁵⁸ Noka ri'ik uriyangi, de'en wessa we' kai yeg pa. Bo'on tomsa Dangwanzəs koo bənaya, nok tomsa iirə i bo'rə nok Dangwanz as pu kotto pa.