¹ Gini nǝ zhidkǝn Yesu ɗaŋ nǝ ɓorghǝni,ɗaŋ Cogn vǝr tǝ gid monsǝ wos mǝn ngǝtn yo ɗaŋ wofi tǝ gǝrǝgǝn hŋ. A gid gini a te shinghǝn kǝ zhipti shighǝni wos a mon wos Yohanna. ² Yohanna a naa nǝ murghǝ tlyeghǝn zha a ngǝtn yo ɗaŋ a yeli a dulgam vik Cogn tǝ tlyeghǝn zha yo ɗaŋ tǝ vǝr a dulgam Yesu ɓorghǝni Cogn . ³ Cinǝ murghǝshidshiɗi gyo ɗaŋ caa kwaan tagartan tǝ yer tlyaa-tlyaa tǝ gya gyo ɗaŋ tǝ sǝǝ kǝǝm a ngǝtn yo ɗaŋ tǝ dlyaad ɗa gibi ,durghǝ tu kiles a tuliɗi. ⁴ Myaani Yohanna mya shindardlyaadkǝni gini a mǝn vin ladi kǝ Asiya: Gyal tǝ raa wussni tǝ naa ɓaski kǝ gyo ɗaŋ ci ɗaŋngǝni, tǝ gyo ɗaŋ a ta yi ɓaŋdǝŋ yani ghuŋ gyo ɗaŋ caa maangǝnɗia ken ,ɗaŋ nǝghǝ zhipti wadtsǝmai gyo ɗaŋ cigha ken ghǝ guŋdǝ wos . ⁵ Ɗaŋ yigha Yesu ɓorghǝni Cogn,gyo ɗaŋ nǝ murghǝ tlyeghǝn zha ɗaŋ maa caa vwa woshi,ŋaa ghǝ keni kǝ shishighǝn a gibkǝ mǝn mǝskǝni, ɗaŋ nǝ murghǝ guŋdǝ kǝ guŋsǝ kǝ ɗǝŋn. Tǝ gya gyo ɗaŋ caa suu mi ɗaŋ a tǝrǝŋ mi wopi a nadkǝn kusǝŋsǝ ngǝtn wopm a te vwaraŋ wos- ⁶ a sularmi wopi nǝ mǝn guŋdǝ pǝris kǝ Cogn wos tǝkǝ daagos zhimngǝni wos tǝ vartǝ tǝ naa nǝ gos kǝ ndok-ndoki tǝ naa cik. ⁷ Yellǝni caa mangǝnɗi tǝ kurvon ɓuruk ko yiri gyo wo yaltǝ ,hal tǝ gya gyo ɗaŋ tǝ ta dlwabtǝ. Ɓuruk zaarsǝ dǝgǝn ta waa mitsǝ nǝ dur wos.eh, tǝ naa cik. ⁸ "Myani ghun kǝ keni tǝ kǝ kari " Yani Daadǝn Cognvon a kon gyo ɗaŋ ciɗa ɗaŋngǝnin ,"Gyo ɗaŋ a tsǝn ɓandǝŋ yani ghuŋ cinǝ murghǝ manngǝnɗi a ken murghǝ vartǝɓuruk." ⁹ Myani Yohanna yeswan tǝ gyo ɗaŋ caa jwaam gaam cimki a gibkǝ tlyaghǝni forǝm, tǝ guŋdǝ tǝ lǝdkǝni duumghǝni vwaa waan gyo ɗaŋ yigha Yesu - lǝb gi ɗaŋ caa cimtǝ tu Batmusa nǝ durghǝ vik Cogn tǝ tlyeghǝn zhaa dulgam Yesu. ¹⁰ Mi gha gibkǝ zhipti dzaŋ ghǝ Daadǝn. She mǝ wum yer tlya-tlya a kaaran ɗaŋ tu nǝ mwaari. ¹¹ A wul tu,"Dlyaad ngǝtn won ɗaŋ kǝ yeli a gibkǝ tagarta, shindar mǝn labkǝn mǝn ɗaŋ ci wadtsǝmai- Afisus ,tǝ Simirna tǝ Birgamas,tǝ Tayatira, tǝ Sardisu,tǝ Fidalfiya,bed tǝ Laudikiya." ¹² Mǝ suken tu mǝ yel gyo ɗaŋ ca wul vi tǝ myani,ɗaŋ mǝ suken she kubka wud wadsǝmai a lǝb gaaghǝni wasǝŋ. ¹³ Ɗa dlei ghǝ kubka wud ngǝtn won ɗaŋ a ta ŋaa zaar ,ɗaŋ a caa lǝŋsǝ ɗi nǝ fupmni hal akar yasǝŋ wos ,ɗaŋ a nadtǝ tǝ jinari nǝ kaabkǝn a gǝb wos. ¹⁴ Gaam tǝ mbitlǝŋ gaam wos nǝ fyali pak-pak ɗaŋ mbwam ɗaŋ shemdi tǝ yir wos ɗaŋ risǝŋ wud. ¹⁵ Yasǝŋ wos ɗaŋ tu nǝdwaan kǝ zhikǝni, ɗaŋ tu nǝ dwaam yo ɗaŋ caa worti tǝ wud viin vad ,yer wos ɗaŋ tu nǝ yer ghǝ dǝllǝ ghǝ zha. ¹⁶ Taas wos kǝ zari a ngab caar wadtsǝmai, a vii wos nǝ sǝɓǝr won ɗaŋ yi tǝ vii mbǝlǝŋ ɗaŋ caa nyolɗi. Tsoŋ ken wos caa zhik ɗaŋ tu nǝ zhikǝn dzaŋ. ¹⁷ A kiliyo ɗaŋ mǝ yeltǝ, she mǝ ndaaɗi a yasǝŋ wos ɗaŋ zaar yo ɗaŋ a mǝǝshi. A gaa taas zari wos a wultu ,"Vertǝ tǝ ɗuughǝ hǝŋ ,myani ghuŋ minǝ kǝ keni tǝ kǝ kari. ¹⁸ Tǝ gyo ɗaŋ ci gwam, Ma mǝshi bed tǝ gii yeli miɗa gwam hal zhad -zhad ! yaan citu mitǝ piis kǝ mǝskǝn tǝ kǝ nyemri. ¹⁹ Nǝ durghǝ gii dlyaad ngǝtn won ɗaŋ kǝ yeli, ngǝtn yo ɗaŋ yi ɗaŋngǝni tǝ ngǝtn yo ɗaŋ wo ngab a kaar gini. ²⁰ A dulgam dek gya gin ɗaŋ nǝ wadkǝni a dulgam caar wadtsǝmai ɗaŋ kǝ yeli a zaren tǝ lǝb gaaghǝni kubka wud wadtsǝmai kǝ jinari: Caarǝn ɗaŋ ci wadtsǝmai nǝ zhipti shinghǝni kǝ viin ladi wadtsǝmai ,ngǝtn gaaghǝni kubka wud wadtsǝmai nǝ viin ladi watsǝmai.