¹ Tama wa ayi ki ẹẹ sụbani yi oshirẹsụ ọnri ọnụmọ nini, ẹẹ wụrẹyi tụ wa irenu, doti ee teni ẹngwụ tẹtẹ yi ụkọrụvọ ọiza bo. ² Tama wa ayi ki asẹ karẹyi ọshimi ọzọnzọnyi, ase pe ọza nyi ẹshankata, ẹ navọ doti azẹnẹsa ẹnẹ zẹ nyi nyi ọkika tụni irẹyi, ọnri ki ase chema ẹngwụ tụẹba ọzọnzọnyi. ³ Ọ nyi ụmọnyi, ọni ẹyi nyẹmbẹ razi nyi oriro, di yaa mẹ akamawụ. Di osisi ẹchẹngwụ renyi renyi aa za yi nyeeyi, dọ zẹ za yi ọrishi. Di yaa mẹshẹ irẹyi ọshimi, di yaa kụayi azẹnẹsa fụvọ isa aanini. Di yaa mẹ irẹyi kụ ẹngwụ ayi, dọọ mẹ ki yaa kụ ayi ẹngwụ. ⁴ Ama, ẹfiẹni ayụva Oshomoshi, ọna vi ọdazatụ ayi, ọnri osisi ọnọ nyi yi ẹyi anẹshẹ siẹngwụ zụ, ⁵ aivi fụvọ ụkọrụvọ ọmimanasẹrẹ, ama ini ayụva aani ọnọ si dọ yi tụ. Ọ dọ yi tụ zirẹngwụ ọnyinyina ayi ini otiteni yi ma ọnri ọvivara yi tụni ọzọwọwa zirẹngwụ Ifẹ Ọnini. ⁶ Oshomoshi vana zai va Ifẹ Ọnini ku yi ẹtẹẹtẹrẹ zirẹngwụ Ọdọzatụ ayi, Ijesu Ikristi. ⁷ Inaama ọnọ mẹ yi rishi da zirẹngwụ ọiza ọfẹ aani ọnọ maan si mẹ, doti ya zụ nyi ọgiga ini ijọva aani zirẹngwụ iribatọ ọna razi nyi ọjirẹka ọnii nyi yi ẹshẹ poro pooro. ⁸ Irẹyi ọnọni ọzi nyi ọjirẹka. Mee si kụ wa si ayiọvanẹtẹ karẹyi inọpati isẹnẹni, doti ẹnẹna kụayi tụra Oshomoshi ẹ zụ veyi ka ụkọrọ ọiza ọna yi inọvidi aanini. Isẹnẹni vi isọiza, di ọgụ yinaani yi aza bo. ⁹ Ama, ẹwụ Itaitọsi, zi kavana yi ẹshankata ọna razi zarẹsụ ọnri ọtitụrafụ inọpati izẹni ọza chirẹsụ fụrẹ, irazi ọnri ọkikụgẹngwụ inọpati irẹyi ofi. Ẹngwụ isẹnẹni bo ẹzi zarẹsụ ọnri ki ọzi nyi ọgụ ọna yinaani. ¹⁰ Zi kavana yi ọza tụrọza ini akaakana awụ nini, ana gara wụ shi nini, inaama ọnụụ ra kawọnọ gụ ụpẹẹva navẹki ụpẹẹta da, ¹¹ dụụ si yẹ ka ẹngwụ ọzọnọ ọ va fiini oze ana vọrọ da, dọ si va zi oze aichama, ọnri ki ọ jivi yi ẹngwụ aani da. ¹² Aaviki ma tụ Atẹmasi ọnri Itaichikusi shu wu, jantu kwẹẹtẹ ve tu mi ini Ikoponisi, izọ ọnim vaa ya ini ụmẹ ọgụ. ¹³ Jantu tụ ne tu Izẹnasi, ọna yẹ ofi kokoro ọnri Aponosi, doti we re tụọ ki ẹzi rụya isọnsọnyi. ¹⁴ Aza ayi bẹdọ kọsụẹ ẹ mẹmẹ va sụvọ za ụkọrọ ọiza ọnẹ va sii mọgụvọ yi ẹngwụ aanini, doti asọ vana vi ki ọzi nyi isọnsọnyi ọnẹẹ mẹ. ¹⁵ Ẹnẹna ya pe mi bo ki ma kụ wụ. Pe mi kụ ẹnene sirẹyi ayi ini ọdọwụ. Ọiza ọfẹ ọ va ya bẹrẹ wụ nin bo.