¹ Ama, ẹwụ ọn vanaa zụ aza isa ana vi irẹiza ana sẹrẹ. ² Anẹrụ azẹkụ bẹdọ nyi ọzẹngwụsụ, dẹẹ nyi ụbani, dẹẹ nyi irẹyọọyẹ, dẹẹ nyi ụfụ dinẹ ẹtẹrẹ ini ọdọwụ, ini osisirẹyi ẹngwụ ọnri ini ọsiẹngwụdọ. ³ Avọ ọnọ mẹ zẹ vi vọrọ ki anyẹnẹ azẹkụ ẹnẹ zẹẹ sii siọzụ ki ẹnẹ nyi angwashi Oshomoshi, asẹ vi ẹzẹnaa kụ aza irẹka ziizi. Asẹ mẹ ẹngwụ aanini ọrishi yi eche ofifu. Ọ vọrọ ki ẹẹ zụ aza isẹnẹ sẹrẹ, ⁴ doti ẹẹ zụ ọnyita nin ọnri ezioshi nini ana yineeshi ọva, ẹ mẹmẹ vaa si irẹyọọyẹ sirẹyi ọva aanini ọnri ezi aanini. ⁵ Ẹ zụ wa doti ẹ nyi irẹyọọyẹ, inẹ ọiza, ọnri irẹsha ọiza, doti ẹẹ sụbani yi ọva aanini. Ọ vọrọ ki ẹ maan mẹ isẹnẹni bo doti asa vana karẹyi ene rezi zee shi irẹyi Oshomoshi. ⁶ Avọ ọnọ mẹ zẹ si sẹrẹ kụ waa tụ eziọmụsha nin ụkata doti ẹ va zụ nyi irẹyọọyẹ. ⁷ Inoze tuzore, si ẹngwụ awụ zụ nin ki anụkọrọ ọni aza vee ree fama ọnụụ vi nin; aaviki waa zụ aza isa, navọ dụ wa vi ẹzẹna va zụụ dọrenu, ọnri ẹzẹna nyi ụbani. ⁸ Karenube ana dinẹ ẹtẹrẹ, dọ razi nyi ivi, doti ụshi ọ va zụ nyi ẹnẹnee sioze ọmẹ va sii kụrẹyi awụ sha, ụmono rezi re ivi ọnyọnyi inaani. ⁹ Navọ ọrishi nin ẹ sụbani yi ọga aanini ini isa bo. Ọ sẹrẹ ki ẹẹ mẹ inẹ ọga aanini shinẹ, dẹẹ me pe wa nyi ẹshankata. ¹⁰ Ase yuyi. Akikọnọ ẹ siọzụ ki ọdọwụ irẹiza ọni ẹni nyi, doti ẹ si ọzizụ ọnii zụ wa inọpati Oshomoshi ọnri Ọdọzatụ zụ inoze turoze. ¹¹ Fụvọki ọiza ọfẹ Oshomoshi ọ si ẹngwụ zụ aza bo da. ¹² Ọ zụ yi ki ya zi kavana yi arimanyi Oshomoshi tụni ẹshẹ ayi ọnri osisi ẹchiẹngwụ. Dọ zụ yi ki yaa mẹshẹ irẹyọọyẹ, ọmimanasẹrẹ ọnri ọmimẹ Oshomoshi ini ụmẹ ọnii ya aani, ¹³ imaa nyi iribatọ ẹdabẹrẹ ọna yini ọkụeyitụra ọnii kueyitụra ọsisiẹngwuzụ ọni ụga Oshomoshi ọna nyi ụbani ọnri ọi Ijesu Ikristi Ọdọzatụ. ¹⁴ Ijesụ ọ fụrẹngwụ aani ụvọ fụvọ ayi, dọ si ọ dọ yi tụ fini akụvi ọmimẹ, dọ si ọ vara yi aza ọnini ana shatụ renyi yi ẹngwụ aani; aza ọni ụkọrụvọ ọiza ọmimẹ jiareyi. ¹⁵ Navọ waa karẹyi inọpati isẹnẹni bo, dụ waa tụ aza ụkata ki ẹẹ mẹ wa. Si ụmọ ọnụụ nyi bo zụ aza oze ọna vọrọ. Asụụ navọ ki ọzọnzọnyi ọ sieyiwụ wụ.