¹ Ẹmi Ipọọrụ, ozida Oshomoshi, ọna vi Ọnitụ Ijesu Ikiristi, fụvọ ọdọwụ aza Oshomoshi ana ni tẹtẹ, ọnri ọyiyẹ irẹiza ọna vaji ọnyi nyi ivefu Oshomoshi, ² bẹrẹ ayiọvanẹtẹ ọnii nyi ini otoowu ọni Oshomoshi, ọna rama nyapinẹ, mẹ yi yi fụrụmọrụmọ. ³ Ini ẹfi ana sẹrẹ, dọ si irẹyi aani zụ ini itụ ọnọ si chire mi ụvọ ki me showu aani. Oshomoshi ọnaa dọyii tụ ọnọ sụmọ kaa yi mi ki me ne showu irenube ọiza ọnọ. ⁴ Tushi Itaitọsi, ọnim si mẹ ọzi ini ọdọwu. Ọizọfẹ ọnri ẹngwọrọ fidi Oshomoshi Ada ọnri Ijesu Ikristi Ọdọzatụ. Ụkọrọ ana sichire Itaitọsi ụvọ ini irẹkụra Ikẹrẹti ⁵ Fụvavọ ọnim si navọ wụ tụ Ikireti, doti we zu teni isa bo ọna vọ, dụ wa mẹ wa bo na zẹtẹ, ọnri ka dụ wa ni azẹkụ ichọọchi tụ irẹkụra ọbani bo, vene mmẹ ka yụ wụ nini. ⁶ Ọzọkụ ichọọchi ọzi bẹdọ vi ana akụvi, dọọ nyi ose ọnya, di ezi aani vi anọdọwụ, dẹẹ vi ezi ana pa ẹtẹrẹ, dẹẹ ma nyi akụvi. ⁷ Ọ sẹrẹ ki oshirẹsụ ichọọchi, anaa si eyi pe ireshi Oshomoshi, ki ọ vi ẹzẹna razi vi anakụvi. Asọ vi ẹzẹnaa mẹ ka ayami renya ọnọ vaa gẹ. Asọ vi ẹzẹna firaa mọikụ, asọ vi ofuechi, ọvụrẹvụ, navẹki oneisa, navẹki ọkụrẹka, navẹki ọrisari avụkavụka. ⁸ Akikọnọ, ọ vọrọ ki ọ vi ọzẹnaa mẹ azẹga ẹtẹrẹ, doo sirẹyi isọiza, dọọ vi ọyẹrẹyi, dọọ vi ọmanasẹrẹ, dọọ vi ọza Oshomoshi, dọọ vi ọzẹna zẹngwụsụ. ⁹ Ọ vọrọ ki ọ sụvọza irẹyi irenube ọiza ọna zụ wa ẹtẹrẹ ọnọ vi ki aa dọrenu aani, doti ọzụ tụ ẹnẹnavọ ụkata ini ọzizụ, ọnri ki doti ọ zụ si oze ana sẹrẹ zụ ẹnẹnaa kụ irẹyi aani sha. ¹⁰ Fụvọki avaazi ẹrụrụ ẹrụrụ nin yinaani, paapa ini akaakana ẹnẹnaa kaa ki ọvọrọ ki a jụma da va zụ dọ Ijesu wụ. Irẹyi aanini ọzi zarẹsụ. Ẹẹ mẹ ọza apẹ, dẹẹ za ọzaa nyeeyi. ¹¹ Ọ sẹrẹ ki a jantụ za wa dinẹ. Ẹẹ zụ aza isẹnọ razi vọrọki ẹ zụ aza, fụvọ ọgụ ẹngwụ aanini. Dẹẹ gara ofenje azẹnẹsa. ¹² Di ọnụvira ọnya ini akaakana aanini ka, "Ani Ikireti nini vi anapinẹ ọshimi, uye inavi ọshimi anaa wụ ọza ọnẹ vi. Ọriri kẹnẹ ọnọ vi ayaanini. ¹³ Irẹyi ọnọni vi irẹiza, fụvavọ navọ wa za wa zioze ana vi oze irẹiza, doti ẹ zụ nyi afụ dinẹ ẹtẹrẹ ini ọdọwụ. ¹⁴ A suu batọ tụni ụshi tụrụshi ọni Iju ninii che navẹki ụmọ ọza rẹyi rẹsụ ọnẹ sii mẹ ki asi aza vatụra irẹyi irẹiza. ¹⁴ A suu batọ tụni ụshi tụrụshi ọni Iju ninii che navẹki ụmọ ọza rẹyi rẹsụ ọnẹ sii mẹ ki asi aza vatụra irẹyi irẹiza. ¹⁵ Ẹnẹna vi aza ọnini, vọni isa bo vi ọnini yi. Ama, ọzi nyi isẹnẹ vi ọnini yi ẹnẹna kụẹngwụ vi ẹkụkụ ẹkụkụ, dẹ razi nyi ọdọwụ. Fụvọki ọtụtụrụma aanini ọnri ivefu aanini ọzi ni. ¹⁶ Dẹẹ mẹ ki ẹnẹẹ yẹ Oshomoshi, ama de yi o tẹtẹ ini ụkọrụvọ aanini. Ẹẹ nyọzishẹrẹ ini ọmimẹ aanini, ọnri ka, anakamawụ ọnẹ vi.