¹ Inaama isẹnẹni, maa zamẹtẹ, dim re oze ọna na sha ẹbeẹ̣ba. Di ọngwẹ ipaapa ọnim bidi wụ karẹyi yi mi vene ọpani, dọ ka, "Shirẹ vizọni di ma si isẹnẹ bẹdọ vaa mẹ inaama isẹnẹni zụ wụ." ² Ụpọnyụpọnya dim ngwụni ifẹ, dim re ki a si ogede tụ ẹbẹẹba, di ọzọnyi yatụ tụnaani. ³ Di ọzẹna yatụ tụni ogede ọnọ vene irẹta ijasipa ọnri irẹta ikaneriyani. Di ọgazi fụrẹ varakara ogede ọnọ, di ọgazi ọnọ vene irẹta ọnaa shi ẹmiradi. ⁴ Di ogede ofurẹẹna varakara ogede ọbani ọnọ, di aza ana yatụ tụni ogede ẹnẹ vi azẹkụ ofurẹna, de chire auru ọvụọvụ, de ku ade igoonu tunẹẹsụ. ⁵ Di inyanya aa ri vio vio fini ogede ọnọ, di apavana Oshomoshi aa sụrẹyi. Di irakọpa ishimba aa za inọvidi ogede; irakọpa ishimba ẹnẹ ẹ dinẹ yi Ifẹ ishimba Oshomoshi. ⁶ Da tụ oreyi ene vene enyi irefu tuni di ọvidi ogede ọnọ, dọnyi seere venebiri ikirisita. Di isẹnyi ana nyifẹ ẹẹna, yini akaakana ogede ọnri ọvarakara ogedẹ, di ẹngwụ aanini bo ta vi iri, shi ọvidi shi irama. ⁷ Ọi ipaapa ini isẹna nyifẹ ẹnẹ o vene idu, di isa ọfụụva vene ozi ụnọ, di ọfụụta vene ọza, di ọfụụna vene ibangụrụ onee shira. ⁸ Ọzọọza ini isẹnina ẹnẹni ana nyifẹ vana nyi avaka ishinọnyi, di avaka enbo shi yi iri aka ẹbẹẹba ọnri afụafụ aanini. Irafụ shi ọọdụ dẹẹ kaa poro, ka, "Ọnini, ọnini, ọnini ọni Oshomoshi Ananyiyi Ọnụkatabo vi ona yi inaani vẹ vẹ vẹ; ọni ọnọ bidi yinaani, dọ yinaani ọmẹyani, ọni ọnọ zaa vii vẹ." ⁹ Ẹfitụrẹfi ọni isẹna nyifẹ ẹnẹ ra sụga, ụbani, ọnri avọkụ yi ẹzẹna yatụ tụni ogede ọnọ, ana vi ẹzẹna ya poro pooro, ¹⁰ di azẹkụ ofurẹẹna ẹnẹ deẹ̣ vakuẹtẹ tụni ọvidi ẹzẹna yatụ tụni ogede. De nyima irẹsụ yi ẹzẹni ọviki ọọ ra poro pooro, dẹẹ tụ ade aanini shiẹtẹ tụni ọvidi ogede, dẹẹ ka, ¹¹ "Ẹwụ ọnọ sẹrẹ, ẹwụ Ananyiyi ana vi Oshomoshi ayi, ụga, ụbani ọnri ụkata vi ayawụ. Fụvọki ẹwụ ọnọ tụ isa bo vẹshẹ, zirẹngwụ osisi awụ ẹnẹ si ya, zirẹngwụ osisi wụ ọnụ si tụ wa vẹshẹ."