¹ "Tushi angẹni ichọọchi ọna yi Ẹfesọsi, chẹrẹ ẹ: 'Ẹnẹni ọnọ vi irẹyi ọna fineenu ẹzẹna za ụzọmi ishimba chaụvọ tụni ụvọọri aani, dọọ zụsẹ ini akaakana ọchi irakọpa ishimba ọna si igoonu mẹ, ² Maa yẹ ụkọrọ ọnụụ mẹ, ọnri ọnyinyaka ọnụ wa nyaka ọnri ọsiẹngwụdọ awụ. Maa yẹ ku we me pe azeshimi nin mẹ. Maa yẹ ka ẹnẹna kaa ki ọnitụ (apostẹri) Ijesu ọnẹni vi, waazama wa re, ama duu re ki anapinẹ ẹnẹ vi. ³ Maa yẹ kụ wa nyi ọsiẹngwụdọ, dụụ dụyari fụvọ irẹsha ami, dọ razi tii tụ wụ. ⁴ Ama ọ nyi isọnya ọnụụ mẹ ọna razi ngwụmeyi, ọnọviki, waa navọ osisi ipaapa awụ nin tẹtẹ. ⁵ Fụvavọ, tamayi irasha ọnụụ ya sẹdụ nini. Rinẹvarama dụ waa varama mẹ isẹnụụ bidi mẹ ini ipaapa nini. Ọọzivavọ, mvaa vẹ vaa tụ ọchi irakọpa awụ nini fụri irasha ọnọ ya, ọchishi kụụ rinẹvarama nini. ⁶ Ama wa nyi isọnya nini: Waa nyishẹrẹ isọni eziafụ Inikorọsi nin mẹ, avọ ọni ẹmi nyẹmbẹ mẹ zẹ nyi nyishẹrẹ aani. ⁷ Ẹzẹna ra nyi ụtọ, o batọ tụni isẹni Ifẹ aa ka yi ichọọchi nini. Ẹzẹna raa fụrẹkụ vọnim mvaa si ụmọ yi ki ọ ri fini ẹtụtụ ọchi ọnaa si ẹshe yi ọzạ, ọna yininẹ ụbazi Oshomoshi."'" ⁸ Tushi angẹni ọna yini ichọọchi Isimaina, chẹrẹ ẹ ka, 'Ẹnẹni ẹnẹ vi irẹyi ọza ana vi ipaapa ọnri enekeke, ọza one bidi su dọ varama sha vavẹ: ⁹ "Maa yẹ ụya ọnụ waa ri ọnri iriwa awụ, ama opisa ọnụụ vi. Maa yẹ ẹnẹnaa shi ẹngwụ aanini Iju mẹmẹ si irenu du wu nini, ama ẹzi vi Iju. Isinagọgụ Eshu ẹnẹ vi. ¹⁰ Asụ tụainẹ fụvọ ụya ọnụwa vaa rii nini. Re! Eshu avaa za azẹnyi ini akaakana awụ nin, do ne wu nin ngwụni ijaaru, dọ si ọ zamawụ nin re, ụ vaa rụya mẹ ẹkụshi ẹwu niṇ. Nyi ọsiẹngwụdọ na ngwụ ini isu, mvaa si ade ẹshẹ poro pooro yụ wụ nini. ¹¹ Navọ ẹzẹna ra nyụtọ o batọ tụni isẹni Ifẹ Ọnini aa ka yi ichọọchi nini. Ẹzẹna ra fụrẹkụ, isu ụpọfụụva ọi zụa mẹ isọnsọnyi."'" ¹² " Tushi angẹni ọna yini ichọọchi Ipẹgamọmụ, chẹre ẹ̣ ka: 'Ẹnẹni ẹnẹ vi irẹyi ọzẹna nyi itakovi ọrirẹ ọ nyi eyi ẹẹva: ¹³ Ma yẹ izọnụụ ra nin, irasha ọni ogede eshu ya. Tuavọtuavọ, dụụ ti ta irẹsha ami ku nini. Ma yẹ ki we zi yi ọdọwụ ọnụụ nyi yi mi tẹtẹ nini, shi ini ụmẹ Antipasi ọna vi ọnivenu ami, ọna vatụra mi ẹtẹtẹre, ọna wụ ini akaakana awụ nini izẹni eshu ra. ¹⁴ Ama, ọ nyi isẹnyi ọnụ waa mẹnin vẹ ọnim rezi si: Azẹnyi yini akaakana awụ nini ọna sụvọza ọzizụ Ibanamụ, ọna zụ lbanaki ki o ne isa-ọkụọzafụ tụ ezi ani Isrẹni nin ọvidi, doti ẹ zụ ri isari isẹvọ, ọnri ka dẹ zụụ mẹ itutu asụ. ¹⁵ Avọ ọna mẹ zẹ nyi nyi azẹnyi ana vatụra ọzizụ eziafụ Inikorọsi. ¹⁶ Fụvavọ, rinẹ varama nini! Aaviki we zi rinẹ varama nini, mvaa vẹ ini ọfirọfira vee tu wu nini, di ma si itakovi ọna yineenu ami pe wa kụrẹkụ. ¹⁷ Navọ ẹzẹna ra nyi ụtọ, o batọ tụni irẹyi ọni Ifẹ Ọnini aa kaa yi ichọọchi nini. Ẹnẹna ra fụrẹkụ, Mvaa si isari Oshomoshi ana tẹ yụ waa ri, dim si irẹta ọvụọvụ ọna chẹrẹ irẹsha ọwọọwa tụ, irẹsha ọni ẹzẹnẹsa razi yẹ, ọchishi ọzẹna si irẹta ọnọ yi."'" ¹⁸ "Tushi angẹni ọna yini ichọọchi Itayatira, chẹrẹ ẹ: 'Ọnọni ọno ̣vi irẹyi irenu Ozi Oshomoshi, ọna nyi iri vene ira ọnaa za, dọ nyi ụfụ vene enyisụẹ ọna sụa: ¹⁹ "Maa yẹ isọnụụ mẹ: osisi awụ, ọdọwu awụ ọnri ọsiẹngwụdọ awụ. Maa yẹ ki isọnụụ mẹ inisirọni o funa isọnụụ bidi mẹ tụrama. ²⁰ Ama, ọ nyi isọnụụ mẹ ene rezi ze: Waa si oze yi ọnyẹnẹ ọnọ, Ijezibẹni, ana shi ẹngwụ aani ọkisẹ. Dọọ zirẹngwụ ọzizụ aani zụ aza itutu asụ ọnri ki ẹẹri isari ọna si mẹ isẹvọ yi ori nini. ²¹ Maa si ẹfi yọ ki o rinẹ varama, ama o zi si ki o nee rinẹ arama fini itutu asụ aani. ²² Re! Mvee ne e tụni ikụ ọna va za a tụni ode, dim ne enene pe e sẹrẹka ngwụni ụyọọri ọbani, ọchishi ki e rinẹvarama. ²³ Mvaa wụ ezirama aani bo, di ichọọchi bo si yẹ ki ẹmi ọnọọ zama inẹ ọza ọnri ọtụtụrụma ọza. Vene ụkọrụvọ ọzọnyọnya awụ nin, ọnim ve sii si wu nin atọ. ²⁴ Ama, yi ẹwụ nin ana vọ, ana yi Itayatira, ọna razi sụvọza ọzizụ ọnọni, ọnri ẹwụ nin ọna razi yẹ isọni azẹnyii shi ọzizụ eshu ọna nyinẹ--- di ma kaa yụ wụ nini, 'Me zi kune ẹnya ọsa bẹrẹ ẹnya yụ wụ nini.' ²⁵ Ọmẹ raa vii vi, ụ bẹdọ dinẹ geri geri nini poro netu ụmẹ ọnim va sii vẹ. ²⁶ Ẹzẹna ra fụrẹkụ dọ misa ọnim mẹ netuẹtẹ vọnim vaa si ụmọ yi ki ọ nyi ụmọ tụra irẹkụrẹvabẹ ana yẹshẹ keekere rẹsụ. ²⁷ 'Ụvọ enyisụẹ ọnọ va sii mẹ oshonọyi tụra wa irẹsụ, dọọ chaka wa vasha vene oji ụmapa.' ²⁸ Venim mẹ mẹ re dọ finụvọ Ada ami, avọ mmẹ vaa si ụzọmi ọnẹnẹ yọ. ²⁹ Navọ ẹzẹna ra nyi ụtọ o batọ tụni isẹni Ifẹ Ọnini aa kaa yi ichọọchi nin."'"