¹ Ọnọni ọnọ vi ọsizụ ọi Ijesu Ikristi ọni Oshomoshi si yọ ki ọ si zụ ezida aani, ini isẹnẹ bẹdọ vaa mẹ. Ọ siọzụ zirẹngwụ itụ ọnọ tụ angẹni aani shi Ijọọnụ ozida aani. ² Ijọọnụ ọ karenube inọpati irẹyi Oshomoshi ọnri irenube ana ka inọpati Ijesu Ikristi, shi isa bo ono re. ³ Ẹdabẹrẹ ọnọ vi yi ẹnẹna vaa si ọngwẹ tụ̣ẹba ka iwe ọnọni, dẹ zẹ sụtọpeẹtẹ tụni irẹyi ẹtoore ọnọni, ọnri ẹnẹna si irẹyi ẹtoore ọna chẹrẹ tẹtẹ aani mụkọrọ, fụvọki ẹfi aa kavaape. ⁴ ijọọnu,̣ tushi ichọọchi ishimba ana yi Eshia: Ọiza ọfẹ ọnri ẹngwọrọ, finụvọ ẹzẹna vi, ọnạ bidi vi, ọnri ọna vaa vẹ; zẹ fi finụvọ ifẹ ishimba ọna yini ọvidi ogede, ọ ya bẹre ̣wụ nini, ⁵ zẹ fi finụvọ Ijesu Ikristi ana vi onivenu ọna vi ọnirẹiza, dọ vi ozi ipaapa fini azene fu su, ọnri oshirẹsụ oshinọyi ẹshẹ ọnọni. Yi ẹzẹne ̣sirẹyi ayi, dọ si anya aani dọyitụ fini aichama --- ⁶ dọ si yi vara ijọva ọnri arụfạ yi Oshomoshi Ada aani --- ọni ọnọ nyi ụga ọnri ụkata poro pooro. Aami. ⁷ Re, ọ vaa vẹ bẹrẹ egushi; iri bo vee re e, shi ẹnẹna ka ọbọdọ ngwụ ọ ẹngwụ. Anda keekere ana yẹshẹ vaa karẹsụshi fụvọ aani. Avọ ọmẹ vi. Aami. ⁸ "Ẹmi ọnọ vi aafa ọnri omega; ọna vi, ọna bidi vi, ọna vaa vẹ, ọnụkata bo." Avọ Oshomoshi Ananyiyi mẹ ka. ⁹ Ẹmi Ijọọnụ --- ọnyara awụ one pe wu nyi ọgiga ini ụyọọri ọnri ijọva ọnri ọsisiẹngwụdọ ọna yini Ijesu --- mmẹ yi irẹkụra akaakana enyi ọnaa shi Ipatimọsi fụvọ irenube Oshomoshi ọnri ivenu inọpati Ijesu. ¹⁰ Mi yini Ifẹ Ọnini ini ọkụshi Ananyiyi. Dim wụ ọngwẹ ọne nowu tụẹba vene ọpani fiinaama ami. ¹¹ Dọ ka, "Chẹrẹ isọnụ zee re tụni iwe, dụ wa siọ tushi ichọọchi ishimba --- tushi Ẹfesusi, Isimaina, Ipẹgamọmi, Itayatira, Isadisi, Ifinadefiya ọnri Inaodisiya." ¹² Maa vareyi varakara ki me re ọngwẹ onee pe mi karẹyi, mmẹ vareyi dim re irakọpa ishimba ọna si igoonu mẹ. ¹³ Dim re ọzẹne vene ozi ọza ini akaakana irakọpa ishimba ẹnẹ, do chire auru ọna gọdọ ne ku o ụfụ, dọ si ọja igoonu sụọ kara irachi. ¹⁴ Di Irẹsụ aani ọnri ẹyi aani a vụẹtẹ bẹnẹbẹnẹ vene owuotutu --- dọ ọvụọvụ vene irẹta Oshomoshi one pere gụ, di iri aani vene ira ọnaa za. ¹⁵ Di ụfụ aani vene enyisụẹ ana da nyenyere, enyisụẹ ọna si ira akuru teni ẹngwụ, di ọngwẹ aani a sụrẹyi vene enyi irefu ọnaa da bụdụ. ¹⁶ Dọ za ụzọmi ishimba chaụvọ tụni ụvọọri, di itakovi ana rẹ ọnyeyi ẹẹva aa jinẹ fineenu aani. Di eyi aani aa za vene ọyi ọọdụ gogogo. ¹⁷ Mmẹ si iri gẹrẹ ẹ, dim sẹdụ nyẹtẹ tụni ọvidi aani vene ọzẹne fu su. Dọ si ụvọọri aani tụra mi, dọ ka, "Asuu shiangwa. Ẹmi ọnọ vi ipaapa ọnri okeke, ¹⁸ dim vi ẹzẹna ra. Me bidi su, ama, re, maa ra poro pooro! Ikọkọrọ isu ọnri ineeku ọrọkọtọ yinụvọ ami. ¹⁹ Fụvavọ chẹrẹ isẹnu re da tẹtẹ, isẹnaa mẹ ọmẹyani, ọnri isẹnẹ vaa mẹ inaama ọnọni. ²⁰ Ọyiye ọna tẹ inọpati ụzọmi ishimba ọnụụ re inụvọọri ami, ọnri ọchi irakọpa ishimba ọna si igoonu me yi: Ụzọmi ishimba ẹnẹ, ẹnẹ vi angẹni ichọọchi ishimba ẹnẹ, ọnri ki ọchi irakọpa ishimba ẹnẹ vi ichọọchi ishimba."