¹ Ini ọikọta, ẹwụ nin ẹnyarami, jụjẹ ini Ananyiyi. Ini ayami, dim zụ zẹ chẹri iwe ọnyọnya ọnọni tụshụ wụ nini, ọzi kata mẹngwụ. Isẹnẹni bo ve sere wụ nini. ² Si eyi pẹtẹ yi irezi nin. Si eyi pẹtẹ yi ẹnẹna mụkọrọ ọshimi. Si eyi pẹtẹ yi enene du ẹchẹngwụ aza shaa. ³ Fụvọki ẹyi ọnọvi ẹzẹna jụma da. Ẹyi ọna fẹkẹ Oshomoshi inoze ifẹ. Ẹyi ọna dụbani ini Ikristi Ijesu, ana razi kụayitụra ẹchẹngwụ. ⁴ Inozavọ, ẹmi nyẹmbẹ ọọ nyi ọkụayitụra ini ẹchẹngwụ. Ọọviki ọ nyi ọza ọna vazụ kụayitụra ẹchẹngwụ, ẹma yaan nyọ fụ. ⁵ Ajụma yi mi inọkụshi ọfụshinta inoze ani Isrẹni, anda Ibẹnjamẹni ọnim vi, ani Iheberu ininẹ Iheberụ ọnim vi, inọpati ofi dim vi Ifarisi. ⁶ Ini ọshishẹngwụ sha misa, ma kụọ kata ichọọchi nin ẹngwụ; ini ọmimẹtẹrẹ, inoze ofi, mazi rivi. ⁷ Ama isa bo ọna yaan vi ọgụ yi mi, me kụre wa tuni osụsụ fụvi Ikristi. ⁸ Ini irẹiza, ọmẹyani, ma zi isa bo ika tuni osusu, fụvi ụzoza ana yini ọyiyẹ Ijesu Ikristi Ananyiyi. Fụvọ ani maa vi isa bo sha. Mee roo ọnbo tụni ishẹrẹ, dima vazụ ri ọgụ Ikristi, ⁹ de ve zụ remi ini naani. Mazi nyi ọmimẹ-anasẹrẹ ayami fini ofi. Ama maa nyi ọmimẹ-anasẹrẹ zirẹngwụ ọdọwụ ini Ikristi, ọmimẹ-anasẹrẹ ọna fidi Oshomoshi vẹ fụvọ ọdọwụ. ¹⁰ Fụvavọ, ọmẹyani, mesi kima yẹẹ ọnri ụkata ọshisha kwẹtẹ aani, bẹri ọ nyi nyi ọgiga ini ụyọọri ani. Mesi kima vara tuni ẹngwụ isu ono sụ. ¹¹ Ziravọ, di ma nyi ọshisha kwẹtẹ fini enene sụ da. ¹² Ọzivi irẹiza ọnọvi kime ri isẹnẹni dọ bo da, navẹki ma si gụụ da. Ama ma sivụri di me roze za chirụvọ, isẹni Ikristi Ijesu fụvọ aani zami. ¹³ Ẹnyarami, mazi kẹni kima za chirụvọ da, ama isọnya yi naani; me shayi isẹnẹ yi nama, ma sụkata dụ isẹnẹ inọvidi echi. ¹⁴ Mee zụechi, di ma zụ dọ ọgụ oshishi Oshomoshi ini Ijesu Ikristi. ¹⁵ Ẹẹyi bo ọna vira, ọọ vọrọ ki ya nyi aaro ọnọni, wa vaa nyi aro ọsa, Oshomoshi zẹ va sisi siọ zụ nini. ¹⁶ Tụavo-tụavọ, isatụrisa ọni ra si chirụvọ, anavọ yaa taakụ. ¹⁷ Ẹwụ nin ẹnyarami, navọ dụ wa fama mi, seyi pẹtẹ kokoro yi ẹnẹna zụsẹ veni ẹyi ma zụsẹ ọnụ were nini. ¹⁸ Aza ẹrụrụ ẹẹ zụsẹ, ẹnẹ ọni ma sẹfi bo ka yụ wụ nin, ọmẹyani, dim za ki ka yụ wụ nin bẹri ẹgọ, venebiri ọnivi ọchi-avashi Ikristi. ¹⁹ Oze ẹnẹ vatụra vi ovivụrii, fụvọki ori ẹnẹẹ fẹkẹ, ọnọvi inẹ anini, isi ụshi ọnọvi ubani anini. Oriro anini ọnọ vi isẹshẹ pooro. ²⁰ Ama, ọza ineekụ-ọiza ọnii vi, izẹni ye zi ọdọzatụ anavi Ijesu Ikristi vaa fụrẹ vẹ. ²¹ Ọva vara ẹchẹngwụ ayi ana kachi, tụni ẹngwụ enene ve nẹngwụ ụga ọnọ nyi zirẹngwụ ụkata ọnọsi misa bo, dọ va kụwa shi inafụ aani.