¹ Ipọọrụ ọnri Itimoti, ozida Ijesu Kristi, tụshi azabo ana shatụ renyi ini Ijesu Kristi, ana yi Ifiripi vabẹri ẹnẹna voshirẹsụ ọnri Idakoni nini. ² Ọiza-ọọfẹ ọnri ẹngwọrọ fidi Oshomo-shi anavi Adaa ọnri Ananyiyi Ijesu Kristi ọsi vayawụ nin. ³ Maa kụ Oshomoshi avọ inẹfi bo ọni ma si tamayi awụ nin. ⁴ Ẹfibo ọni ma si sụjẹ tụozụrenụ yi ẹwụ nin bo. ⁵ Maa kụ Osho-moshi avọ, inọpati ọgigẹ awụ̣ nin ọi irenụbe-ọiza fini ọkụshi ipaapa vangwụ̣ rajini. ⁶ Maa nyi ọkụaitụra kaa, ẹzẹna nyima ụkọrọ ozoza ini awụ nin, vaa mẹ fụreshi netụ ọkụshi Ijesu Ikristi. ⁷ Ọọgẹ yimi kima nyi oriro awụ nin bo, fụvọki ma nyi wụ nini tụni ọtụtụrụma. Ẹwụ nin bo vi ọnọfụva ami ini ọiza-ọọfẹ, shi imẹ yi ini ijaarụ ọnri ọkikụ irenụ ami yi irenụbe- ọiza ọnri ọdidọrenụ. ⁸ Oshomoshi vi ọnivenụ ami, eyi awụ nin ma tụrami, di me si ki mere wụ nin, bẹri ayụva Ijesu Kristi. ⁹ Ozụrenụ ami ọnọ vika: Osisi awụ ọ vaa nyi ẹdabẹrẹ tụọ ini ọyiyẹ bo. ¹⁰ Maa tụozụrenụ ka dụ wa vaa zụ ni ene zoza fụ, dụ wa nyi rẹiza ana razi nyi iivi, Ini ọkụshi Ikristi. ¹¹ Maa tụozụrenụ ki ẹwụ nin ze ve shi shi yi ẹtụtụ ọmimẹ anasẹrẹ, ọna vẹ zirẹngwụ Ijesu Ikristi, dọ sụbani ọnri ụga yi Oshomoshi. ¹² Ọmẹyani, mesi kụwa yẹ nin ẹnyarami, ki isenẹ mẹmi, ọnọ zẹ mẹ ki irenụbe-ọiza oo nọvidi tụọ. ¹³ Fụvavọ, di ẹbba mi ini Ikristi si ẹtofei vini ivishẹ netu enene sere ẹtẹ, shi azẹnẹsa. ¹⁴ Ẹrụrụ ini ẹẹnyara nin, ẹnẹ nyi ọkụayitụra ini Ananyiyi fụvi ẹbba mi, dẹ nyi ayọvi ọkikarẹyi ini arimanyi angwashi. ¹⁵ Ẹnyi vana showụ Ikristi ini ọvivụva, di azẹnẹsa akaa fi ininẹ ọiza. ¹⁶ Ẹnẹni ọnim shi kọta, vana mẹ fụvọ kẹẹ yẹ ki, aza mi tụni jaarụ fụvọki maa dinẹ yi irenụbe-ọiza. ¹⁷ Ẹnim bidi shi, vana showụ Ikristi fụvi osisi ẹngwụ anini, ọzi vi ini irẹiza. Ee ro ki ẹnvaa mụyari mi ẹfi ẹni ra yini ẹba. ¹⁸ Ọmẹvi kẹ? Isẹnẹ yi naani ọnọ viki inoze-tụroze, shi inoze apẹ, naveki ini rẹiza, ee showụ Ikristi, dima nyi ụjẹ inaani. Ẹẹn, mva nyi ụjẹ, ¹⁹ fụvọki ma yẹ ki ọnọni vaa tụrẹsụ tụni ọjijitụ ami zirẹngwụ ozụrenụ awụ nin ọnri ọgụvọ ifẹ Ijesu Ikristi. ²⁰ Ọkikụeyitụra ọnri iribatọ ami, ki asụshi nyi mi inoze tụroze, ama bẹri ayọvi ọmẹyani ọnri inẹfi bo, aa vaa si Ikristi tụẹba zirẹngwụ ami, ma yi inẹshẹ navẹki me sụ. ²¹ Fụvọki inaayi ami, ọmimẹ ẹshẹ vi Ikristi, di ọsisụ vi ọgụ. ²² Ama, aaviki mva ra inoze ẹchẹngwụ, ọvavi akanya ana gụ yi mi. Yere ọnim vaa nii kẹ? Maa zi yẹ. ²³ Ẹviva ọọ ya meyi, Osisi ami ọnọ viki ma fi zọni, di me netu Ikristi, ọnọni ono zoza fụ, ²⁴ Ama, ma ra ini ẹchẹngwụ ọnọ sẹrẹ, fụvọ awụ nini. ²⁵ Ini ụmọni maan yẹ da, ma yẹ ki mva dinẹ, dim ya bẹrẹ ẹwụ nin bo, fụvi ọni-nọvidi awụ, ọnri ụjẹ ayawụ nini ini ọdọwụ. ²⁶ Fụvavọ, wa nyi oze ọrụrụ zirẹngwụ ami, ọnụ vazi si jụvọ kụrachi ini Ijesu Kristi, ẹfi ọnim ra varama vetụ wụ nini. ²⁷ Re kụwa mẹtẹrẹ inoze anasẹrẹ ini irenụbe-ọiza Ikristi. Mee ve re wụ nini naveki mazi vẹ, di ma wụ kụwa dinẹ kokoro ini ifẹ ọnọni, bẹri ọtụtụrụma ọnya, ụmẹge sikamarenụ ini ọdọwụ irenụbe-ọiza. ²⁸ Asụụ shangwa ọnyọnyi, ini ẹnẹna kachire wụ nini, inoze ọnyọnyi. Ọnọni ọvi ami odidụ wụ nini, ama, dọ vi ọdidọtụ awụ nini, ana fini ụvọ Oshomoshi vẹ. ²⁹ Ọnọni vana si yụ wụ fụvi Ikristi, aivi fụviki dụ wa dọọwụ renya, ama dụ wa zẹ zụ rụya fụvọ aani, ³⁰ Inoze ọkatẹngwụ ọnụ re inẹsha ami, dụza wiwụ inọpati ami.