¹ Ini ivẹrẹ, irẹyi yi naani, di irẹyi ọnọ ya pe Oshomoshi, di irẹyi ọnọ vi Oshomoshi. ² Ọnọni ọ ya fini ivẹrẹ pe Oshomoshi. ³ Isa bo va naa zirẹngwụ aani mẹ. Ọzi nyi isa ọnya ana mẹ da, dọviki aivi zirẹngwụ aani ana si mẹẹ. ⁴ Ini inẹ aani ọni ifẹ ya. Ifẹ ọnọ, ọnọ vi ẹtofei aza bo. ⁵ Ẹtofei ọna zaa ini oozi, ama oozi ọizụ zaa mụnẹ. ⁶ Ọnyi ọza ọnyi anaa shi Ijọọnụ, ana tụ fidi Oshomoshi vẹ. Ọọ vẹ vene onivenụ, ka ọnọ va divenụ inọpati ẹtofei ọnọ, doti aza ẹẹ zirẹngwụ aani dọọ wụ. ⁸ Ijọọnu ọzi vi ẹtofei ọnọ, ama ọọ vẹ va divenụ inọpati ẹtofei ọnọ. ⁹ Ẹtofei obooro, ana si ẹtofei zụ aza bo ọọ vẹ inẹshẹ. ¹⁰ Ọọ yi nẹshẹ, ama, anẹshẹ ẹzi yẹẹ, shọmẹdaka vika, zirẹngwụ aani ana si mẹshẹ. ¹¹ Oo ve tu aza aani, ama aza aani ẹẹ zi dọọ. ¹² Ama ọzatụrọza ana ra dọọ tụni ẹshẹ anini, dẹ nyi ọdọwụ ini irẹsha aani, ọ yụ wa oze ki ẹ si vi ezi Oshomoshi. ¹³ Azẹzi ma wa zirẹngwụ anya navẹki ẹchẹngwụ, navẹki zirẹngwụ osisi ọza, ama zirẹngwụ osisi Oshomoshi. ¹⁴ Irẹyi ọnọ ọ vara ọza, dọ ra ini akaakana ayi. Yee re ụga aani da, vene ụga Ozi ọnya chọ, ana fi idi Ada aani vẹ, do shi yi ọiza-ọfẹ ọnri irẹiza. ¹⁵ Ijọọnụ ọọ divenu inọpọti aani, do nowu ka, "Ọza ọnim ka irẹyi aani yi ka, 'Ọza ana vaa vẹ inaama mi, ọọ bani fụna mi, fụvọka ọọ yi naani tụ mi.'" ¹⁶ Ẹyi bo o re ọiza-ọfẹ tụra ọiza-ọfẹ fini oshishi aani. ¹⁷ Aa zirẹngwu Imosisi si ụmọ jinẹ vẹ, di ọiza-ọfẹ ọnri irẹiza zirẹngwụ Ijesu vẹ. ¹⁸ Ọzi nyi ọza ene re Oshomoshi yẹyẹ da, Ọni renya chọ ọnọ vi Oshomoshi, ana yi ini irakasha Ada ni, ọnọ vaa si ọ zụ da. ¹⁹ Iveenụ ọni Ijọọnụ mẹ, ụmọni ani Ijuu nini tụ arụfa ọnri Inivati nini fụri Ijerụsanẹmụ ne tụo, dẹ fọọ ka, "Ẹnụ vi kẹ"? ²⁰ Ijọọnụ o divenụ, dọ ka, "Aivẹmi ọvi Ikristi ọnọ." ²¹ Dẹ zẹ va fọọ ka, "Sụ vi aavọ"? Enaija ọnụ wa vi? Oo tụoshi ka, "Ma zivi Enaija." Dẹ zẹ fọọ ka, "Ẹwụọ wa vi ọkisẹ ọnọ"? Do voshi ka "Eiye." ²² Ẹfiavọ dẹ fọọ ka, "Ẹnụ vi kẹ, ye roshi na ka yi ẹnẹna tụ yi? Ụmẹ ka inọpati ẹngwụ awụ kẹ"? ²³ Oo tụoshi ka, "Ẹma vi ọngwẹ ene nowụ ini ụnọmi: 'Teni oze Ạnanyiyi doti ọ vọrọ,' venebiri Aizaya mẹ ka." ²⁴ Aa tụ Ifarisi ẹnyi. ²⁵ Di ẹ fọọ ka, "Ọmẹzị dụ ̣va mẹ isami yi aza, waa zi vi Ikristi ọnọ, navẹki Enaija, navẹki Ọkisẹ ọnọ?" ²⁶ Ijọọnụ ọ tụ wa oshi ka, "Ma si enyi mẹ isami. Ama ọnyi ọza ana dinẹ tụṇi akaakana awụ nịn, ọnụ ra zi yẹ nini. ²⁷ Ọni ọ naa vẹ inaama mi, orụpa ivata ẹzẹni ma zi fụ ana ngwaraa." ²⁸ Isa ẹnẹni ẹẹ mẹ ini irẹkụra Ibẹtani, aka jinẹ Ijọdani, izi Ijọọnụ yaa mẹ isami. ²⁹ Ini eyinẹshẹ aani, Ijọọnụ o re ki Ijesu ọ vi idani, dọ ka, "Ree, ozi Atẹmẹ Oshomoshi ana va kụ aichama anẹshẹ kụra. ³⁰ Ọza ọnim karẹyi inọpati aani yi, ka, 'Ọza anaa vẹẹ inaama mi, ọọ bani fụna mi, fuvọka ọọ yi naani tụ mi' ³¹ Ma zi bidi yẹ, ama maa vẹ, vaa si enyi mẹ isami, doti e roze si ọ zụ ezi aani Isreni nini." ³² Ijọọnụ ọ divenụ ka, "Mee re ka Ifẹ Oshomoshi oo chi fụri ẹbẹẹba vene obenekụkụ , do kụ tụraa. ³³ Ma zi seyi za a, ama ọza ana tụ mi ki ma mẹ isami ini enyi, 'ọọ kaa mi ka, ọza ọnu ze re Ifẹ Oshomoshi oo kụ tụraa', dọ yi inẹẹsụ aani, ọni ọ̣nọ vaa si Ifẹ Ọnini mẹ isami. ³⁴ "Mee ree da, dim divenụ ka Ozi Oshomoshi ọnọ vi." ³⁵ Zẹtụọ, Ijọọnụ ọnri eziafụ aani ẹẹva mẹ gẹ dinẹ ineyi-nẹshẹ aani, ³⁶ de re ki Ijesu aa parafụ, di Ijọọnụ ka, "Ree, ozi Atẹmẹ Oshomoshi yi!" ³⁷ Eziafụ aani ẹviva ẹẹ wụ, ọọ mẹ maan kaa, dẹ vatụra Ijesu. ³⁸ Ijesu mẹ vareyi, do re ka ẹẹ vatụra ọni, dọ fọọ wa ka, "Sụ we si nini"? Ẹẹ tụoshi ka, "Irabayi (ana vi ọ̣zụọzisa), izụ ra kẹ?" ³⁹ Dọ kaa yụ wa ka, "Ve re nini." Inaani, dẹ vẹ ve ri izọ ya; dẹ ya pee ini shọọ, fụvọka ọpati iwakati ẹẹwụ ọni ẹfi ọnọ vi. ⁴⁰ Ọnya ini ẹnẹva, ana wụ Ijọọnụ mẹ karẹyi, dọ vatụra Ijesu, ọnọ vi Andụrụ ana vi ọnyara Isaimọni anaa shi Ipita. ⁴¹ Ọnyara aani Isaimoni ono bidi re, dọ kaa yọ ka, "Yee re Imezaya ọnọ da" (ana vi: Ikristi). ⁴² Ọọ siọ vee tụ Ijesu, di Ijesu ree, dọ ka, "Ẹwa vi Isaimọni ozi Ijọọnụ, Ikefasi ọna kụ vaa shụ ụ" (ọni ọshafụsha aani vi: Ipita). ⁴³ Ineyi-nẹshẹ aani, ụmọni Ijesu aa vaa ni Iganini, oo re Ifiripi, dọ kaa yọ ka, "Vatụra mi". ⁴⁴ Ani Ibẹtisayida ọ̣ni Ifiripi vi, irẹkụra Andụrụ ọnri Ipita. ⁴⁵ Ifiripi oo re Inataniyẹri, dọ kaa yọ ka, "Ọza ọni Imosisi karẹyi aani ini iwe ofi, dọ ọkisẹ nini zẹ ki karẹyi aani, yee ree da. Ijesu ozi Ijosẹfu ani Inazarẹti yọọ. ⁴⁶ Inataniyẹri o tụoshi ka, "Ọ wa nyi isa ọIza ana va zụụ jinẹẹ ve fụri Inazarẹẹti"? Di Ifiripi kaa yọ ka, "Vẹ, dụ we ve ree." ⁴⁷ Ijesu o re Inataniyẹri kọ tụra ọni vẹ, dọ kaa tụọvidi inọpati aani ka, "Ree, ani Isrẹni obooro, ọni amẹri ra zi yi nẹngwụ aani!" ⁴⁸ Inataniyẹri ọọ fọọ ka, "Ụ mẹmẹ yẹ mi"? Di Ijesu tụoshi ka, "Di Ifiripi tangwa vaa shụ ụ, ụmẹ yatụ tụni afụ ọchi Ifigi mee re u." ⁴⁹ Di Inataniyẹri voshi ka, "Irabayi, Ozi Oshomoshi ọnụ vi!, Ẹwụ a vi Oshinọyi ani Isrẹni!" ⁵⁰ Di Ijesu fọọ ka, "Fụvọki maa ka ki mee re ụ inafụ ọchi Ifigi ọnụ wa si dọ zẹ? Ụ vee re isẹnẹ bani fụna ọnọni." ⁵¹ Di Ijesu kaa yọ ka, "Ini irẹiza, ini irẹiza, ma kaa yụ wụ nin ka, ụ vee re ka ẹbẹẹba ọọ na, di angẹni Oshomoshi nin aa shirẹ, dee chi inẹẹsụ Ozi Ọza."