¹ Waa vẹ, ọmẹyani, ẹwụ anavi ọnyi ẹkẹshi nini, sụne dụ wa sụvọ kụrẹsi, fụvi inoodụ ọbani ene ve tụ wụ. ² Ẹkẹshi awụ nini ọọvụ da, ọnri ka idegụ ọri ita awụ nin da. ³ Igonụ ọnri isiriva awụ nini ee kụ-anụvi da. Ọkikụ-anụvi anini vana vaa divenụ kụ wụ. Ọ vaa ri ẹchẹngwụ awụ venebiri ira. Waa kụ ogu awụ tẹ yi ọkụshi ọikọta. ⁴ Re ụta anabaro ee sụne jinẹ vẹ, ụta ọnụ rii anụkọrọ ene pe wụ kụ isa irarẹ awụ, ụne ọnụta ana kụ isa irarẹ ọnụ we zi sii, ọ ngwụ inụtọ Ananyiyi oshirẹkụ kekere. ⁵ Waa ra ini ụbani venebiri oshinọyi, dụ wa mẹngwa awụ ụmesi inẹshẹ. Waa mẹ ọtụtụrụma awu si bani veni ụye ana pa zi ọkụshi ana va si wụọ. ⁶ Waa jishi, dụ wa wụ ẹnẹna manasẹrẹ. Ezi pe wụ nyi ẹshankata. ⁷ Fụvavọ vẹgwụnẹtẹ, ẹwụ ẹnyarami, netụ ẹfi ọni Ananyiyi vaa si vẹ. Ree, ọnarẹ vana dinẹ zi ebeebe isọnọ kụ tụni ẹtẹ irarẹ aani. Dọọ vẹngwụnẹtẹ ẹtẹrẹ netụ ẹfi ono orishi ipaapa ọnri okeke vaa si zụ. ⁸ Ẹwụ, nyẹmbẹ, vẹngwụ awụ nẹtẹ. Mẹ ọtụtụrụma awụ kata, fụvọki ọvivẹ Ananyiyi ọ si kavape. ⁹ Ẹwụ ẹnyarami, asụụ kụrẹka ẹngwụ nini, fụvọ doti asa mi ishọji yụ wụ nini. Ree, ọjishi ọ dinẹ tụni oze. ¹⁰ Ẹwụ ẹnyarami, kọsụẹ, fini ụyọọri ọnri ọsẹngwụdọ ayi ọkisẹ nini, ẹnẹna karẹyi ini irẹsha Ananyiyi. ¹¹ Ree, ya dụbani yi ẹnẹna sẹngwụdọ, venebiri ẹzẹna mi ẹdabẹrẹ yi. Waa bidi wụ inọpati ọsẹngwụdọ Ijoobụ, dụ yẹ isẹni Ananyiyi si ka ọni vaa mẹ, ọmẹmẹ nyi ọsẹngwụdọ ọnri ayụva yọ ọ. ¹² Ọzarẹsụ aani, ẹnyarami, asụụ shekụ, shọ viki wa si ẹbẹẹba, navẹki ẹtẹ, navẹki ireji ọnyọnyi shekụ. Akikọnọ, navọ di 'Ẹẹn' awụ ọvi 'Ẹẹn,' di 'Eeye' awụ ọvi 'Eeye,' fụvọ, di asụụ na javọ ngwụ ini ishọji Oshomoshi. ¹³ Ọwa nyi ọza ọna yi nakaakana awụ nin ana nyi ọkatẹngwụ? Navọ do tụozụrenụ. Ọwa nyi ọza ọna nyi inẹ oshine? Navọ di ọ jashẹ ụga. ¹⁴ Ọwa nyi ọza ọni ẹngwazi inakaakana awụ nini? Navọ di ọ tụshi azẹkụ ichọọchi, doti ẹẹ tụozụrenụ yọ, dẹ zẹ tọ angwẹ tụra ini irẹsha Ananyiyi. ¹⁵ Ozụrenụ ọdọwụ va fụ ikụ ọza ẹnẹngwazi shaa, di Ananyiyi siọ kwẹtẹ. Aaviki ọ chamayi, Oshomoshi dọ si aichama aani vayani. ¹⁶ Fụvavọ dụvọ aichama awụ yi ẹngwụ nini, dụ wa tụozụrenụ yi ẹngwụ nini, di ee roze fụ ikụ awụ nini shaa. Ozụrenụ ọza ana manasẹrẹ vana nyi ụkata, dọ za mụkọrọ oshishozeyi. ¹⁷ Enija vi ọza venebiri ayi. Oo tụozụrenụ tụnẹ tụnẹ ka, asi orishi zụ, ọzi vaa zụ ini irẹkụra ọnọ ini irayi ẹẹta tụri ụfẹ shinọyi. ¹⁸ Ẹnaija dọ zẹ tụozụrenụ. Di ẹbẹẹba zụ orishi tụ nẹtẹ, di ẹtẹ vaa si ẹtụtụ aani jinẹ vẹ. ¹⁹ Ẹnyarami nini, ọnyi ọza inakaakana awụ nini ọne nyeyi fini oze irẹiza, dọ nyi ẹzẹna vaa si ọzọnọ varama joze, ²⁰ di ọzọnọ ọyẹ ka, ọzẹna ra za anaichama varama fini oze ọnọ ngwụ zizi, vana dọọtụ fini isụ ọrọkọtọ, dọ va mi ẹvagụ yi aichama aani ọrụrụ.