nbtt-igb-x-etuno_jas_text

Irẹsụ 1

¹ Ijẹmisi, ozida Oshomoshi ọnri Ananyiyi Ijesu Ikristi, tushi ụna ẹwụrẹva ana garashi: maa kụwụ nini. Ọdọwụ ọnri Ọyiyẹ ² Roo onbo tụni ụjẹ ẹnyarami, ụmẹ ọnụụ ree re ẹkatẹngwụ renyi renyi nini. ³ Waa yẹ nin ka ọziza ma ọdọwụ awụ nin re, ọmẹ kụwa nyi ọsẹngwụdọ nini. ⁴ Navọ di ọsẹngwụdọ mụkọrọ aani netu ẹtẹ, doti wa va zụ nyi ọninọvidi tụẹtẹ nini, di asụụ rụya isọnyọnyi nini ⁵ Ama aaviki ọ nyi ọzọnyọnyi awụ nin enee si uvira, navọ dọ fisụe aani fini ụvọ Oshomoshi, ana shụvọ sha yi oza, dọ rama nyi ẹngwụrẹyi ku enene fisụe isa finụvọ aani, ọ va si ọ yi ọzọnọ. ⁶ Ama navọ dụ we fisụe ini ọdọwụ, asụ jọirẹka. Fụvọki ọzẹna ra jọirẹka vene veni enyi anaa da bụdụ, ọni ashi a kụ ini irefụ, vashirẹ vachi. ⁷ Fụvọ di asi ọzọnọ ro ki ọni va zụụ re isọnyọnyi dọ fini ụvọ Ananyiyi. ⁸ Ẹngwụ ọzọnọ vi ọninẹ ẹva, ọnri ki ọzi dinẹ tụ irasha ọnya inoze aani bo. ⁹ Navọ di ẹnyarayi anavi onriwa ọ fụrachi tụni ụdi ọbani aani, ¹⁰ Ama, di opisa ọ fụrachi tụni ụdi oweyi aani, fụvọki ọ vaa parafụ na vene ododo ana yi inavi. ¹¹ Fụvọki ọyii ra sha, ọ ngwụra jinẹ vẹ. dọ mẹ avii nin wẹngwani. Ododo aani dọ javọ shẹtẹ, ụzoza aani doo vụ̣rii. Avọ opisa nin mẹ vee vụrii inakaakana ụsẹ oze anini. ¹² Ẹdabẹrẹ ọnọvi yi ẹzẹna sẹngwụdọ azamare. Fụvọki ụmẹ ọnọ ra fọ ọ azamare ọnọ jinẹ, ọ vaa dọ ade oshinọyi ẹshẹ poro-pooro ana mi otowụ aani yi enene sirẹyi Oshomoshi. ¹³ Navọ di asi ọzọnyọnyi ana ngwụni azamare, ọọ kaa ki, "Oshomoshi ọnọ zama ọni re," fụvọki azẹma si isọshimi zami Oshomoshi re, Ọni nyẹmbẹ ọma zama ọza re. ¹⁴ Ama ọza ọnọ sụvọ ẹngwụ aani na ngwụni azamare zirengwụ osisi ẹchẹngwụ aani ana jishieyi. ¹⁵ Ụmọni ọsisi ẹchẹngwụ ree zirẹyẹ, dọ ma aichama, ụmọni aichama ọnọ rasi marima, dọ ma isu ọwụọza. ¹⁶ Asụụ navọ ki ọza ọjụwụ vene, ẹnyarami ọnim-ngwayani. ¹⁷ Irẹiza ozoza bo ọnri irẹiza ana gụ vana fụrẹ ẹbẹẹba vẹ. Fidi Adaa ana nyi ẹtofei bo ọnọ chi fụrẹ. Ini ayi aani, ọzi nyi ọvivara venebiri ụmama ana sẹngwụ zụ, do ze vụ shio. ¹⁸ Oo ze Oshomoshi eyi, dọ si irẹyi irẹiza aani ma yi, doti ya zụ vi ẹtụtụ ipaapa ini isa bo ọnọ tụ vẹshẹ. ¹⁹ Waa yẹ ọnọni nin, ẹnyarami ọnim- ngwụayani: navọ di ọzọza ọ jantụ wụ, asụụ jantu karẹyi, ọnri ki, asụụ jantụ mọikụ. ²⁰ Fụvọki ọikụ ọza ọ ma mụkọrọ ini omima-nasẹrẹ Oshomoshi. Fụvavọ, sụvọ fini isidọti onri isọshimi. ²¹ Ini ọvivẹngwụ nẹtẹ, dȯ irẹyi ene chire tụ wụ nini inẹ ana vaa zụụ di ife awụ nin tụ ²² Waa si irẹyi aani mụkọrọ nin, asi ọvi ini ọwiwụ renya, dụ we vene ẹngwụ awụ nin. ²³ Aaviki ọzọnyọnyi ọọ wụ ireyi ọnọ, ama dọ ra ma siọ mụkọrọ, oo vene ọzẹna zamẹ-ngwụ aani ini oreyi. ²⁴ Ọọ mẹ zamẹngwụ aani da, dọọ fizọ̣, ụmụmọ do shiayi, isẹno vene. ²⁵ Ama ẹzẹna jieyi ngwụ ofi ọninatụ ebebani, dọ yi inaani ọmimẹ, dọ ra zi vi ẹzẹna ra wụ, doo shiayi, a vaa mẹ ẹdabẹrẹ yi ẹngwụ azẹnẹ ini ọmimẹ aani ²⁶ Aaviki ọ nyi ezene ze ro ki ọnọ yẹ Osho-moshi fụ, ama dọ raizụ za renụ aani sụ, ọọ mẹngwụ aani apẹ, ọdọwụ ono ro ki ọnọ nyi ọzi bẹri. ²⁷ Irafẹkẹ ọnini, ana razi nyi isẹnẹ paraa inọvidi Oshomoshi Adayi ọnọvi: ọmimẹ ọgụvọ yi ẹnẹna razi nyi ada ọnri osokụ̣ nini ini ọngwẹngwụ anini ọnri ki ọza ọ mẹngwụ aani, asi ọ nyi ẹkụkụ ini ẹshẹ.