¹ Ọmẹyani, ma chẹri iwe ọfụva ọnọni tụshi wụ, ọnim ngwụayani ini ọtitamayi, dima siọ si ọtụtụrụma awụ tụẹba, ² dụ wa siọ tamayi irẹyi, ọni ọkisẹ ọnini nini ka tụrama, ọnri ụmọ ọni Ananyiyi ọnri Ọdọzatụ si vẹ, zirẹngwụ ọnitụ Ijesu nini. ³ Yẹẹ da ka, ụme ojisiya nini vaa vẹ inẹkụshi ọikọta. Ẹ vaa mẹwụ isiya, dẹẹ si ụsẹ tuọvidi vene ọtụtụrụma anini mee sio ⁴ Ẹ vaa kaa ki, "Yere otowụ ọvivavẹ aani kẹ?" Isa boo vana dinẹ tụni ọmẹya fini ụmẹ ọni adayi nini fụrẹ sụara ini ivẹrẹ ẹshẹ." ⁵ Ee shayi ka ẹbẹẹba ọnri ẹtẹ vana fini enyi ọnri ka zirẹngwụ enyi fụri ụmẹ ọgọdọ tụrama, ini ụmọ Oshomoshi, ⁶ ọnri ka zirengwụ isa ẹnẹni ana si vụ ẹshẹ iri ini ọshara enyi. ⁷ Ama, ọmẹyani, ẹbẹẹba ọnri ẹtẹ vene teni tẹ yi ira ini ụmọ ọnyonya ọnọ. Ee teni wa tẹ yi ọkụshi ishọ̣ji ọnri ovivụ aza ana razi vi ayi Oshomoshi iri. ⁸ Asu shayi, ẹwụ ọnim ngwụ-ayani, kaa ọkụshi ọnya inọvidi Ananyiyi, oo venebiri irayi akashi, ọnri ka irayi akashi, oo venebiri ọkụshi ọnya. ⁹ Ananyiyi ọzi siafu tụrẹtẹ inọpati otowụ aani, venebiri azẹnyi me ro, akikọnọ, ọ si ụmẹnẹ yụ wụ nini. Ozi si ki ọzọnyọnyi awụ nini, oo vụri, ama di aza boo ẹẹ zụ nyi oririnẹ varama fini aichama. ¹⁰ Ama ọkụshi Ananyiyi vaa vẹ venebiri oyi. Ẹbẹẹba bo vaa parafu zirẹngwụ ọọkụ ọbani. Isẹnẹ yi ẹbẹẹba bo vana vaa rira vasha, ẹtẹ ọnri ọmimẹ ana yi naani vaa sẹngwụ zụ. ¹¹ Ọmẹ viki isẹnẹni vene vee dụ sha inoze ọnọni, yere ẹngwụ ọza ọnọ vọrọ kụ wa vi nini kẹ? Waa mẹshẹ ọnini vabẹri ivefụ Oshomoshi nini. ¹² Waa nyi iribatọ ọvivẹ ọkụshi Oshomoshi ini ọfira-ọfira. Ini ọkụshi ọnọ, ava sira dụ ẹbẹẹba bo sha, di isa ana yi ẹbẹẹba bo si naa, ini irivụ ọbani. ¹³ Ama vene otowụ aani, yaa dinẹ zi ineekụ ọwọọwa ọnri ẹtẹ ọwọọwa, irasha ọni ọmimẹtẹrẹ vaa ra. ¹⁴ Fụvavọ, ẹwụ ọnim ngwụayani, ụ maa nyi iribatọ isẹnẹni, waa manasẹrẹ, de re wụ kụwa nii, ọnri kiwa zivi azẹna vaa tụofuvọ inọvidi aani, ini ẹngwọrọ. ¹⁵ Zẹtụọ zamaa ka, ụmẹnẹ Ananyiyi vi ọdidọzatụ venebiri ọnyarayi ọnim ngwụayani. Ipọọrụ mẹ chẹrẹ iwe tụshi wụ vene ụvira ana si yọ. ¹⁶ Ipọọrụ ọ karẹyi ẹnẹni ini iwe aani, ọnọviki isẹnyi yi naani ana kata ẹngwụ ọyiyẹ. Anarimayẹ nin ọnri aza ana razi zụfụ dinẹ, ẹ vara isẹnẹni, venebiri ẹ mẹ mẹ irẹyi iwe ọsọsa nini, tụni ovivụri ẹngwụ anini. ¹⁷ Fụvavọ, ẹwụ ọnim ngwuayani, ume yi isẹnẹni bo, sirẹyi ẹngwụ doti asazawụ nin nyeyi, zirẹngwụ irivene aza ene dụ ofi, doti asi ọdidinẹ tụni irẹiza awu, ọ vaa jụ wa avọ. ¹⁸ Ama, wa fụụ tụọ ini ọiza ọọfẹ ọnri ọyiyẹ Ananyiyi Ijesu Ikristi. Ụga ọva si vayani ini ọmeyani, ọnri poro-pooro. Aami!