¹ Ẹwụ nin ana vi azẹkụ ọni mee pe karẹyi, ẹmi nyẹmbẹ vi ọzọkụ vene wụ nini. Onivenụ ụyọọri Ikristi ọnim vi, dim zẹ nyi ọgiga ini ụga ana va sii zụ. ² Fụvavọ, mee pe wụ nin azekụ kareyi, si eyi pe iragụ̣ Oshomoshi ana yi inakaakana nini. Si eyi pe wa aivi fụvọki wa bẹdọ vaa mẹ, ama fụvọki we si kụ wa mẹẹ. zirẹngwụ osisi Oshomoshi. Si eyi pe wa, aivi ka fụvị ẹkẹshi, irikishi, ama fini ọtụtụrụma awụ nini. ³ Asụụ mẹ ọga tụra aza ana si chire ụvọ. Ama zirẹ ukọrụvọ awụ, waa sẹngwu awụ shẹsa yu wa. ⁴ Ụmọni oshirẹsụ ọkụatẹmẹzi ra sẹngwụ zụ, a va si ade uga, ana ra ma sa yụ wụ. ⁵ Inioze ọnyọnya, ẹwụ nin ọmụsha, vẹngwụ̣ nẹtẹ yi azẹkụ nini. Ẹwụ nin boo wa sengwụ ovivanẹtẹ mẹ aụrụ chire nini. Fụvọki Oshomoshi oo me si ọza ana kụ ẹngwụ tụẹba ama, ọ si ọiza-ọfẹ yi ọza ana vẹ ẹngwụ nẹtẹ. ⁶ Fụvavọ vẹngwụ nẹtẹ, dụ wa sẹngwụ awụ chire Oshomoshi ụvọ, dọti ọ zụ ka wụ shirẹ ini ẹfi anasẹrẹ. ⁷ Kụ afasha awụ boo tụraa, fụvọki ọọ si eyi pe wụ nin. ⁸ Vẹngwụ nẹtẹ, dụ wa si eyi pe ẹtẹ. Eshụ, ana vi ọnivi awụ̣, aa varakara zizi, oo nowu vene idu, one si ọza ọnọ va naari. ⁹ Veyi irazi ka. Shi gerigeri ini ọdọwụ. Waa yẹ ki anọdọwu ẹrụrụ varakara ẹshẹ, vana ra ri ẹngwụ uyọọri ọnọni. ¹⁰ Inaama ọnụ ra rụya ini ẹfi keere, Oshomoshi ana nyi ọiza-ọfẹ boo, ana shụ wụ ngwụ ini ụga aani, ana razi nyi ọtẹfi ini Ikristi, vaa mẹ wụụ gụ ẹtẹtẹrẹ, dọ za wụ afụ shẹtẹ, dọọ yụ wụ ụkata. ¹¹ Ayi aani ọni ụga ọnri ụkata vi poro-pooro. Aami. ¹² Maa si Isivanọsi vene ọnyarami ana vi ọni irẹiza. Maa chẹrẹ iwe kẹrẹdụ yi ọ shụ wụ nin. Maa tụwụ nin ọtụtụrụma, dim zaa divenụ ka isim chẹrẹ tụ shụ wụ nin vi irẹiza ini ọiza-ọfẹ Oshomoshi. Dinẹ tụ inaani. ¹³ Ọnyẹnẹ ana yi Ibabirọni, ana gẹ ni ẹwụ ri ọ, ki ma kụ wụ. Ozi ami, Imaakụ, ki ma zẹ kikụ wụ nini. ¹⁴ Waa kụ ẹngwụ nin zirengwụ osisi. Ẹngwọrọ ọva si vi ayi awụ nin boo ana yi ini Ikristi.