¹ Bulus mafati Farta, paɗ tlǝ ɓasi Yesus Almasihu, tǝmɗi fǝr kit i tadtǝ Farta tǝ sǝn kit tlǝ wichǝ ke'ke tǝ chok ɗaketa Farta ² Tǝ ǝ sisingde kǝfere tlada Farta, tla tlǝ lekwakcha, tla ndatǝnwa nan fǝramǝnnda kǝna def kǝfasi. ³ Ə wanmǝncha'an ke'ke' mba'kan ndikta'an tǝmdi tlǝndyan tlǝndǝn nechi kǝ mba'ani nafcha. Nachi chǝt inni tǝmdi tlǝndi Fartǝ'yamǝn tla tlǝch mǝnchǝ mǝnchǝ kaɗi. ⁴ Kǝmdi Titus, ka waa khur bandi'yamǝnya. Mbes'ǝn khar tǝ chok khaskhastǝ fata tlata mǝɗi Farta tǝ Yesu Kristi tlǝ tlǝt mǝnchi. ⁵ Kǝtlǝm da'an malchiwunchǝ ǝ karita kǝtlǝm kǝ ndiɗǝn kha ɗichiɗi diid wakchǝ kha yu. Paɗ kǝsen paktǝ nafchisi ǝnat mǝribcha'an kǝtl ǝndi mba'utiyu. ⁶ Waat kappa nefe kǝn ndǝkchis ɓeryanwa, khes nefi nunef arta, tǝ ka wancha ngga fe tlǝnda nafchǝwa sǝbtǝwancha paɗ cha'adaufe kharwa. ⁷ Kǝmchansi ke'ke' tlǝ dǝba nafcha'an khar, kǝɗ nafɗi nach kǝtlǝ ɗǝbawuri Fartǝ khar, kǝchok kǝ nef nawaktǝ ndiktǝs kǝ ɓer'yan. Kǝchok kǝtlǝ ndiktawa paɗ kǝnkǝ tlǝ krǝs'ǝna. Kǝ chok kǝtlǝ khubtǝ khurawa, tlǝ sabalaw, tlǝ 'yanda, tlǝ sǝmanɗǝ dǝcha. ⁸ Minni kuɗu kǝmchansǝ kǝnkǝ tlǝttlǝt nafchǝ keuri, tleure kǝmɗi ka'ǝna. Kǝn indǝ'yansi, nef ke'ke' paɗ tlǝ kǝs indǝ'yan khar. ⁹ Ke'ke' ndikta'an khar tla cha'andǝfe kaɗi, mannan mɓela cheken alkǝt nafcha tǝ ka cha'at paɗ kǝ takhsanchǝ fene tla'andǝ pǝpakhcha. ¹⁰ Kǝtlǝm nafchǝ ka'an tlǝsǝ ɓanchi kaɗi, kǝɗ fe tlǝ ndachwa khǝchedechfe. Ndiktandǝ sǝbcha'an. Tlǝnanchandǝ lektǝ paɗ tla tlǝ sakanchǝ nafcha. ¹¹ Kǝmchansi kǝ tlarandach fe kha. Tlǝ cha'anchandǝ ɗǝchǝɗi kǝmwakchǝs kǝ cha'an fe kaɗi kǝtlǝm kǝ fǝrandach fe ǝna chok khesǝ paɗ tlǝ welanchandǝ wurchǝ kaɗi. ¹² 12Artǝ khurnandǝ, tlǝɗatlan'yanda.Ndakanwa," Kirawacha paktǝfǝlekche, sǝɓtǝ nafchǝ paɗ, paɗ sǝɓtǝ ɗǝ paracha, fǝ ɓukɓukkǝcha." ¹³ Ndiktǝ'ini kit, paɗ takhsamandatǝn ma' nandǝ nat kǝ ka nafchǝ khur fǝr kit. ¹⁴ Kǝ kawun tlǝmat kǝ sǝssǝɗeti Yahudawaha wa, paɗ kǝ paron ndiktǝ fe tǝɓranchǝ kita ta'an kha. ¹⁴ Kǝ kawun tlǝmat kǝ sǝssǝɗeti Yahudawaha wa, paɗ kǝ paron ndiktǝ fe tǝɓranchǝ kita ta'an kha. ¹⁵ Kǝmɗi fe nach chǝɗ chǝɗ nat ndǝch yanda chǝɗ chǝɗ. Paɗ fe nawakchǝ chǝɗ chǝɗ fǝrwandǝ kit wa, ǝnsǝ chǝɗ chǝɗ wa. Paɗa indǝ'yandǝ tǝ sǝn'ǝn 'yandǝ. ¹⁶ Tlǝ pǝnchandǝ wa sǝnndǝ Fartǝ paɗ karkanɗǝ anchǝf tǝ ɗǝna chǝt'yanda. Nakandǝ kǝ ǝn tǝ fǝ kum tlǝmata. Nggo mbǝla fǝran te tandǝ kǝ chu chǝndǝ ndi'chan wa.