¹ Ni pənowun Fibi wanman mən tla tlə chəch ter kətən sita ə kankiriya. ² Kə tləwun ndi khur tləm Farta cham kəɗuyu ə mbanɗi, kəmchəs i fə fər kitcha, kə tlarwun tə anchi chəka mənatən khuran. mətlan tə indiyan tlə kəsan chan nafchəsi kaan, nat tə nggəta. ³ Ndan ən Bilkisu tə Akila, tlawur tarchənchi ə khur Yesu Almasihu. ⁴ Fe kətləm nggəta karndə sisingdə yanda, chandachə usoko, ngga nggət ichən nawa, nat tə fə kumi fərkitche. ⁵ Ndan ən fə fərkitche ə wuryanda ndan ən Abainitas tla yakhchə nenchə, tla tlech fər kit kəmɗi Yesu ə Asiya. ⁶ Ndamən ən Maryamu tla chowun chə ter kaan. ⁷ Ndaman ən Andranikas tə Yuniyas, wanmanchina fe cham ndə fə ngga'an kə pursuna. Sən fe tanda khur fə ɓascha, fe tlach tlət Almasihu mani nggəta. ⁸ Ndaman ən Amfiliyas tla yakhti khur Almasihu. ⁹ Ndaman ən Urbanus tlawur təryamən khur Almasihu tə Istakis tla yakhti. ¹⁰ Ndaman ən Abalis tla yakhtə Almasihu kə ndawun ən fe ne wuri Aristobulus. ¹¹ Ndawun ən Hirudiya wanmana, tə fe ne wuri Narrkissa fe ne khur Almasihu. ¹² Ndawun ən Tarfina tə Tarafusa, fə tarchə kaan khur Almasihu. Ndaman ən Barsisa tla yakhti, tla chanchə ter Fartə kaan. ¹³ Ndaman ən Rufas ta'an khur Almasihu tə manan tə Yaa. ¹⁴ Ndaman ən Asinkiritas tə Filiguna tə Hamis tə Baturobas tə Hamisu tə kwaan wanmanchəmən ne tləman nanda. ¹⁵ Ndaman ən Filolugus tə Yuliya tə Niriyas tə wanmanchaan tə Ulumfas tə kwaan fə fərkitche ne tləman nanda. ¹⁶ Ndaman ən ra'an tə chəɗ chəɗ tə wanɗəkaɗata. nat fə tər mbanchi Farta tanda ndowun əna. ¹⁷ Ni siyowunda wanmanchəna, kaɗam khar tə fe ne ɓat tə chak tə khaa tə chət wansartə khaa. Kətləm ngga cha'awon chə fe khar kəɗuyu. cham langgə tə tanda. ¹⁸ Kətləm wetə nafchə'ini chawandə mafa kət chənmən Yesu wa se khur yandə ndak. Təmɗi mbən mee yanda tlə tləmdədə wanɗəkaɗachi fe fə chət ɗənɗi ndiichan. ¹⁹ Kətləm choktəyowun khur chət ɗənɗi tlə yakhtə Farta, sək tləmatin chət wuni chənchi kheɗɗi tə khur tə wunchə. Yakhənchəs kə nowun ɗatl chan kə ɓəra ɗənɗi ne ndiichan, kə chokwun kə nafchəɗi tlə chəwakchə ən ndiichan wa. ²⁰ Fartə tla ne kə tlə khas khas kəta nan ɗəf wunchə kə rəɓawun khwere tə sarchəwon. kakəti chən mən Yesu kərəsti kənsi tə wunchi. ²¹ Timoti tlawur terinchi mətlan ndowun əna, kəɗu paɗ Lukiyas tə Yason tə Susibataras tə paɗ wanmanchəna. ²² Nggət Tartiyas tla tlənchə ndik tə ɗiya ndowon əna khur tləm chənmən Yesu Almasihu. ²³ Gayus təɗi tərti kakh wuryan nat tə kwan fə fərkitche, tandə ndowon ɗicha. Arastas tlə kəs kopochəkhar kapa mirɓe tandə ndowon əna tə Kwartus wanmanchəna. ²⁴ Kafati chənmən Yesu kərəsti kə chok tə wunchi nat, kə chok kəɗu. ²⁵ Nakanya mandəs kəmɗi tla chekowunchə alkəta kə ɓaswun ndikti Yesu kərəsti Almasihu, tla təmɗiyan pəndə fe ɗəchəɗi ne kə wuɓta'an chokh, ²⁶ Nakanya sən fe təmɗi ɗelwerchi annabawacha kə nɗar mbati Farta təmɗi fə kumi fərkit kə ɗənɗə mbati Farta kəmɗi fə kumi fərkit chə nat. ²⁷ Kəmɗi Farta tlə sən ən ndak təmɗi Yesu Almasihu kən mandə kə ya'an kə fere, kə chok kəɗu.