¹ Nggət Bulus mafati Yesu Almasihu, nachi yara ɗelwer təɗya kəmɗiyowun nat fe fərchə kit ə khakhi Roma.Taɗchə Fartə nanchi kətləm kə ni kə tlə ɓasa, paɗ tərkan nanchə kətləm kə mba'i ndiktəɗi ɓach kakh məɗ'yan. ² Tlaya nach kə ndikti Farta tla mba'aənndən tər kwatl kanan təmɗi yarati Annabawach fe tlə ndiktə Fartə tə tanda. ³ Kə ɗar wa'yan tla nggəttə fe ə khur kwatl Dauda kə ɗar ndiktə ində'yan. ⁴ Təmɗi tla'tə'yan khur məmatach mba'tə fe wa wai Fartə nakan təmɗi alkəti chəɗ-chəɗ tə semete mətlan nach kə Yesu Almasihu chənmən. ⁵ Pənamənchə tlərɗaktə kaan paɗ taɗkan mənchi kə fə ɓaascha.Chəchan kəɗuyu kətləm nafchə kaan kə fərndə kit paɗ kə mananda. ⁶ Nggun təɗi fərchə kit ə khakhi Roma ya,nggun ə khur fe taɗtə Farta kə nowun kə i Yesu Kristi. ⁷ Yarachi ɗelwer təɗiya kəmɗə'yowun nat nggun təɗi nach Roma fe yakhtə Farta paɗ fe taɗtən kənandə kə nafchə'yan.Nggət sitə wa Farta chinmən tə Yesu Kristi kən ɗət kə pang tə chowun tlərɗaktə paɗ kə chokwun khas-khas. ⁸ Tərkanan nggət ndandə Fartinchə wa usoko təmɗi Yesu Almasihu kətləm nggun nat,kətləm tlə nach fe mba' fər kit 'yowun chək tə yeni ə khakhi Roma. ⁹ Fartəɗi tlə manandi tə wanɗəkaɗat arta kəɗ ɗənɗi tlə mba'andi nafchə kaa ndiktəɗya kə ɗar wa'yan,sənwa kit ta'an mba'ti ma ndinchə wa tlə nachi səyowunndə kə in ma nggət səyandə Farta. ¹⁰ Nggət səyandə Fartə ween mət kətləm ma nggəmanchə kə sa'i kəmɗəyowun tə yakhti Farta. ¹¹ Nachi sitə kəɗuyu kətləm yakhinchə kə kəmmən kha tə wunchi kə kəsowunchisə kə ɗəfwun kəfatsə paɗ kə manawun Kristi kaan. ¹² Yakhchisə wa kə mbakamən konggalchi ra'an təmɗi fərkit 'yamən kəmɗi Yesu Kristi. ¹³ Nakanya yakhwi sə wa kə kuɓowun sən əna wa,wanmanchəna tlə yakhchi sə wa ni ɗət kəmɗəyowun,nakan kəɗu ta'an chəwa kha wa.Yakhchi chət kəɗuyu kətləm kə mbəsi wanchə khur semet khurwun kəɗ ɗənɗi natən ə khur fe sənwakchə ndikti Farta. ¹⁴ Nachi ya tə rəfti Helinawacha in tə i kwaan nafcha,fe tlə mbərchə ən tə fe tlə mbərwakcha. ¹⁵ Kətləm takhsinchə fa kə mbaowunchi ndikti Farta nggun təɗi nach ə Roma. ¹⁶ Kətləm nggət khariwufat kə mba'i ndikti Farta wa,kətləm nda'an nach kə alkəti Farta kə mbəs khəra'tə kəmɗi tla fərchə kit, tərkanan yahudawacha kənan chit kə Hellinawacha. ¹⁷ Təmɗi kaa ndiktə'ini pəndə Fartə kakət'yan kəmɗiyamən,kəɗ ɗənɗi natən kə yarata'an,"kaa nafcha nachandə natkha təmɗi fər kit." ¹⁸ Pən Fartə səɓtə khur'yan ə khulafərta kətləm fe tlə fərwakchə mandə tə fe tlə chəwakchə ɗənɗi nach ndi'chan fe tlə ɗəsanchə kit ta'an təmɗi tlən ɗənɗi nawakchə ndi'chan. ¹⁹ Kətləm ɗənɗi kəmchəs kə sən fe kə ɗar Farta tapi ə sən nda kətləm ə mba'andach Fartə ə ɗa'kəta. ²⁰ Kətləm ɗəna chəch'yan tla tlə mbəla'waktə fe nat kha,nachandə ə ɗa'kəta tla'tə tərkan khesi.Tlə sənchə fe tandə təmɗi ɗəchəɗi chət fee,ɗəchə'ini paɗ nach kə alkət'yan tə nat'yan kə Farta.Kətləm kət nda'an nafchə'ini ən sə natandə mba'ta wa ndat wa kit ta'an,"tamwa'ən sən ən kə ɗar Farta wa. ²¹ chək mə nakan tlə tərchandə wa sən ndə Farta,fərawandə mandə kə nden wa Fartə nakan wa paɗ chawandə usoko wa.Kərsə minni chəkandə kaɗ kə ɓamcha ə khur saktə'yanda,wanɗəkaɗach'yandə sakwandə ən ndi'chan wa ,tandə khur wutla. ²² Tlə tərchandə wa fə ɗaatlchə nakanda paɗ chəndə kə ɓamcha. ²³ Mbeɗendə mandi Fartə kha tla kə fere tə ɗəchəɗi nawakchə nat kha kə fere,nakandə manandə ɗəchəɗi takhəstandə kə nden wa nefe,tə wan ɗəngcha,tə ɗə parach fe tə sarchə foɗa foɗa tə fe tlə kakhchə khurchə khakha. ²⁴ Kətləm nda'an malandak Fartə kə nandə yakh təkəmən wanɗəkaɗach'yanda,kə səɓandə fach'yandə kaɗ tandə kə ra'an. ²⁵ Fen assə in kit ta'an i Fartə tə lekte,paɗ tlə nachandə manandə tə chan mafakət ɗəchəɗi takhəstə Farta məni tlə takhəsta'an tla ne manadə Fartə kə fere,kə chok kəɗu. ²⁶ Kətləm kət nda'an malandak Fartə tə yakh fəlaukət'yanda tə səɓandə ra'an kaɗ, paɗ nəssa'an mbeɗenkandə fəlaukət'yandə kha kə nunef tə nunefe. ²⁷ Khəssə'yandə paɗ mbeɗekandə khaa, mənwandə tə nəssə paɗ wa nakandə khunat tə khəssə kəɗ tandə nakandə chət fəlaukəta.Khəssə tandə məndə tə khəssə nakandə chət əna təkəmndə paɗ tandə mbəs kənau tar təkəmndə'yanda. v 28 Chokkan wa yakhwandə Fartə tə əna chət'yan wa,malandak Fartə khur saka ində'yanda,kə chəndə ɗəchəɗi nawakchə ndi'chan. ²⁹ Ndiiɗ ndə kaɗ tə kumi kakəta, səɓtə fata, tə yakh əni nefe, wenikəte,tə yakhawaktə ən nefe, ɓəl fata,yakh yaanda,ənafat tə takət səɓtə ɗəcha. ³⁰ Fə kalwar michə tə chatlan ən nef kə in,təkrichə Farta.Fə tla'andə wanɗəkaɗachi nafcha,fə kwa'kwa'tə incha,tə yakh inde, fe tlə takhsanchə ɓəɓi ɗəch kha samən samən,paɗ fe tlə səkawakchə mət parchənanda. ³¹ Fə ɓəɓi wanɗəkaɗacha, fe tlə tlarwakchə kə ɗar ndikchə'yanda, fe tlə yakhwakchə ra'an, paɗ tə kumi khaɗandə ra'an fa. ³² v 32 Sənndə ɗənɗi mba'tə Fartə ndat wa, fə chət we'tə ɗəchə'ini kəmndəs kə mərnda. Ngga ɗəchə'ini ndak tlə chətnda wa. Tlə nachandə kənan kirsə fə chəcha'an.