¹ Sutang kǝrǝ jiguwʊng ka yǝmba lǝmangngǝm ba Yesu Kristi, Yǝlla Ni-yajiyuwi. ² Nyǝngkǝ mʊlarǝga wang ka Ni-yuweri Ishayang, "Chuwe, kǝmǝ tǝmerǝ ni-tǝmri ya miyu a kak ka mʊng wʊba yǝngna nǝn juwiyu. ³ Ka jir bǝrǝ buwʊng a sei muri, suwerǝ go, 'Tǝ yǝngnatǝn juwiya Niyajiyuwi; tǝ yǝngna juwiyan gu a si sap."" ⁴ Yohana ka be, nəngngatǝn batisma nǝb a mpura sei, warǝ yǝmba butangnga kangngǝm bǝrarǝ yʊnǝtangnga jǝni bwiraiyǝng. ⁵ Tǝmba Yahudiyam warigu tǝn nǝbba Urshalimam ka be gwang giyu, ka nəngngatǝn batisma hanjimi a Lah Urduniyǝn, meni hanjim sʊrǝ jǝni bwiraiyanjiju. ⁶ Yohana mai biyang rǝ yirda kurmongəng rǝ biyang a bʊ a ferdagǝn, mǝni jǝni jaurangu lǝngate tǝn yʊte sei. ⁷ Ka si finang go, "Ka rǝ wʊ bera bukka miyǝngngi, wa li rǝ kumniyu. Wʊ sitǝnbe kǝmǝn dʊtǝta lǝbǝrta guwi. ⁸ Mǝn nǝngnga gǝmǝn batisma nǝn hi mǝni hangu ba nǝngnga gǝmǝn nǝn we yʊlgoi." ⁹ A yai kotǝye Yesu ka dǝgiye wa Nazaret a tǝmba Galiliyəm, kǝn Yohana ni wu nǝngnga batisma a nəngngatən batisma a Lah Urdiniyǝng. ¹⁰ A bukkǝ Yesu a jǝrmǝne wa hiyǝng, korǝn ka wʊmǝn bwi, We Niyajiyuwi ka suwe nyǝra muglo. ¹¹ Kǝ jira jǝre wa korǝn suwerǝ go, "Mwe mǝn yilla dai ya miyu, kǝmǝn nwi furdǝ kwawʊn nǝn mwe deni." ¹² Kǝ We dǝg hangu a di a siyǝng. ¹³ Hangu ka sei muri Kotǝ furtǝ gwar, Chetan bǝnggore. Ka tǝn namta sei, kǝ weni tǝmri nengngatǝn swiyer. ¹⁴ A fulla wun tau Yohannai, Yesu ka be a mura Galili warə yəmbə ləmmangəm ba Niyajiwum, ¹⁵ mənni suwerə go, Fulla hi ka rii, duutətta Niyajiyuwi ka diye rə do. Tə bukang na tə nga rə yəmbə ləmmangəm. ¹⁶ A jii wʊn hangu sura kǝngka wimang ka Galiliyǝng, ka chu Siman tǝn Andrawus chiya Simani kwi garttǝ a wimang a muri, bǝrkǝ hanjim nǝbbǝ tuwa latǝm. ¹⁷ Yesu a sotǝnna hanjimi go, "Tǝ be tə fungngiye, na dǝgǝn tǝ yulo bǝ tuwawu nǝbbǝm." ¹⁸ Rǝ kwa rǝ kwang hanjim ka du gartǝ a fung hangu. ¹⁹ A fulla Yesu a yo yom baniguwi ka chu Yakubu yǝllang Zabadiyu tǝn Yohana chiyangu yǝngna garttǝ a mʊra bwantulong ka hiyǝng. ²⁰ Ka bu hanjimǝng, hanjim ka du te jiyu Zabadi a bwantulong ka hiyǝng tǝn nǝbbbǝ nǝngnga swiyer kinǝm, ka fung hanguwung. ²¹ A dǝgiya Kafarnahum, a ko nyibiyuwung, Yesu ka dǝga kandǝ ruwaninyiniwun ka mǝsatǝnna hanjimi. ²² Hanjim ka mǝna bʊnte rǝ mǝsarang ka gǝng, bǝrkǝ hangu bǝ mǝsatǝn nǝn kumni, me nyǝrarǝ nǝb mʊlarǝm. ²³ A kandǝ ruwanyiniwun ka gu ni rǝ we sirǝmmi, ka mau wʊri rǝ kumni. Suwerǝ go, "Wʊla dabǝn nǝn mwe, ²⁴ Yesu wa Nazaredi? Be mo nǝn juwobǝn ga? Kǝn yǝmǝn, mu wu mən yulgoi ya Niyajiyuwi!" ²⁵ Yesu ka kwertǝn yǝm a we sirǝmmi go "Mǝra nyi na jǝrmǝn na hanguwi!" ²⁶ A bukkǝ we sirǝmmi hi a bautǝnna tǝmǝng, kǝ we sirǝmmi hi ya mau wuriyǝng kǝ jǝrmǝna bwiyanguwung. ²⁷ Nǝb warigu ka nǝngnga mǝnatangnga buni rǝ kwani, gul bwitan jiyu go, "Wulai ji waiwe? Kang mǝsarang ki fiying kǝrǝ kumniyǝngke gǝn kǝne? Dǝg weni sirǝmi nwitǝn yǝm!" ²⁸ A langbǝng yǝmba gǝm ka tʊwe tǝm ba Galiliyǝm rǝ murtangu warigu. ²⁹ A bukka du kandǝ ruwanyiniwun, ka dǝgi ya kaitan Saminu tǝn Andrawusiyǝng, bo ka tǝn Yakubu na Yahaya. ³⁰ Nyille Samiyuwi wu chuwi ka dǝdai me bwilǝmang rə kətərən, kǝn bana hanjim a sotǝnna Yesuwiyǝng. ³¹ Ka be tau kang ka gəng a guggǝng; ka kwarang ka su nǝngngatǝn swiyerǝng. ³² A yʊ hi, a bukkǝ ko dǝggirǝng, kǝn betǝnnǝ rǝ nǝbba bwarabwaraiyǝm warigu tǝn bǝ rǝ səmbatə bwiraiyǝm. ³³ Nǝbba bǝrhənəm warigu ka kura-bwi a nyaya fugangi. ³⁴ Ka kwara rǝ nǝbba bwarabwaraiyəm wmam rǝ bǝ rǝ bwatǝ dəndangngǝm, bo, ka jǝg səmbati bwirai, mǝni a ngatǝn ba səmbati hi ya su yǝm bǝr ki ka yǝm hangu. ³⁵ Ka gun rǝ mori wulak, tǝm ka nyʊru-nyʊru, ka diya gu me gu wi a ruwanyini. ³⁶ Saminu tǝn bǝ ka kinǝm ka fau hangu. ³⁷ A nyang, ka soten go, "Warigu ka fanne." ³⁸ Ka sotǝn go, "Tǝnen diya gu ka, a yagi mʊrte na wau yǝm a gai bo. Ji ya dǝgi kǝn be gwi." ³⁹ Ka di a tǝm ba Galiliyǝm warigu, warǝ yǝm a gana kandə ruwanyiniwun jǝg sembati bwiraiyǝng. ⁴⁰ Gu ni rǝ bugabwiyiri ka be gwan hanguwi; ka ru chillarǝng hanguwung, ka sotǝn go, "Kǝn nga ki bǝn dǝmǝn kwara nǝn me." ⁴¹ Ka nəngna bumte, kǝn Yesuwa yak kang a titǝnəng, ka soten go, "Kǝn nga. Tʊmǝn bwi." ⁴² A gəlobe bugabwir ka du hangu, bo hangu ka nya tʊmǝntang a bwiyǝng. ⁴³ Yesu ka wutǝn su rǝ kumni ka du a diyǝng. ⁴⁴ Ka sotǝnna hanguwi go "Yǝm mo me bǝn sotǝnna gu ni, mǝnni di na yǝggi nʊng dur da mʊn ni tung jənni a chəriya Niyajiyuwi, na yǝgi nəbbən ji ya tungtang a chəriya a Niyajiyuwi bəri tumuntang nyǝngkə Musa suwe re gəng bǝra jǝggatang." ⁴⁵ Mǝnni a jǝrǝng ka su sotǝna nǝb warigu, wʊsa yǝm a gani warigu, bǝ rǝ nyang, Yesu a dǝmǝn ba ku bwi a yom a muri hi. Ka di a sei ya gani me nǝb wi, kǝ nǝbba be gwan giyu a gani dangdang.