¹ Muvone ye ndi lato munji natuha Tata, okatiye tuvotere okukuwiwa ye tuli vanakwe, mi eci mbovulyaho twina. Keli vaka, efasi kali tuzyi, kakuli kali ni lya muzyiva. ² Vashakiwa, hanu shetuli vana va Nyambe, mi kali kacishini kovonahara eco netuve. Tuzyi ye Kereste shaka na vonahare, twarava mbwe ndiye, kakuli tura muvona vulyaho akalire. ³ Enshe ozyo akwesi nsepo okuliceniseza kukezya alicenesa eye mwini shinaho acenete eye. ⁴ Enshe ozyo azwira havuso necivi apanga eco caazya murawo, kakuli ecivi caazya murawo. ⁵ Muzyi Kereste navonahara komukwa okuzwisa ecivi. Mi kwali kwaazya ecivi. ⁶ Kwaazya ozyo akere kwakwe apanga ecivi. Kwaazya ozyo azwira havuso mucivi ozyo namuvona kapa okumuzyiva. ⁷ Yela vance, mwashareki muntu yenshe kumihoma. Yenshe ozyo apanga zirukite arukite. ⁸ Ozyo apanga ecivi azwa kwa satani, kakuli satani napanga ecivi kuzwa kukatanzi. Keli vaka Mwana Nyambe navonahara, okutaye tusinye emisevezi ya satani. ⁹ Yenshe napepwa kwa Nyambe kapangi kakuli orutanga rwa Nyambe rukara kwakwe. Kaoli kuzwira havuso muku tenda civi kakuli napepwa kwa Nyambe. ¹⁰ Keyi vana v Nyambe mi navana va satani va vonahara. Enshe ozyo kapangi ezi rotu kazwi kwa Nyambe; nozyo kashaki omukwakwe. ¹¹ Keli nde ñusa ni mwa shuwa kuzwa kuntanzi: ye tuswanezi kusha zyumwi kuzyumwi, ¹² kushafwana mbwe ndi Kaine, ozyo kazwa kumuvi mi nayyaya mwanciwakwe. Mi ncinji namu yaira? Kakuli emitendo yakwe kaili mibbi, mi yo mwance kairukite. ¹³ Mwasha komokwa, vakwangu, heva efasi neli mitoya. ¹⁴ Tuzyi ye ni twa zwa murufu kuya muvumi, kakuli yushaka vakwetu. ¹⁵ Enshe ozyo kashaki akara murufu. Enshe ozyo atoyete mukwakwe muyazi. Mi muzyi ye ovumi kavumani kavukali ku muyazi. ¹⁶ Keci tuzyi lato, kakuli Kereste na neera vumi bwakwe kwetu. Neswe vulyaho tuswanezi oku neera ovumi bwetu kuva kwetu. ¹⁷ Kono enshe akwesi ovufumu bwe fasi, nabweene mukwakwe ashakite, mi akuara mozyo we nshe kwakwe, mbuti shaka likare erato lya Nyambe kwakwe? ¹⁸ Yela vance, twasa shaki kezywi niko rulimi, kono kezi nkezo ni ke niti. ¹⁹ Keci mpaho tuzyi ye kwi niti tuzwa, mi tugoresa emyozyo yetu havuso vwakwe. ²⁰ Mi heva emyozyo yetu neitunyansa, Nyambe munene kutanta myozyo yetu, mi azyi zonshe zintu. ²¹ Vashakiwa, heva emyozyo yetu kaitunyansi, twina ensepo kwa Nyambe. ²² Conshe eco tukumbira tuciwana kuzwa kwakwe, kakuli tukuteka emirawo yakwe mi nokupanga zinti zitavisa havuso bwakwe. ²³ Owu ngo murao wakwe: ye tuswanezi oku zumina mwi zina lya Mwane Jeso Kereste mi nokulishaka zyumi kuzyumwi, shina ho natuha omurawo wakwe. ²⁴ Ozyo avika emirawo ya Nyambe akara kwakwe, mi ne Nyambe neye akara kwakwe. Kezi tuzyi ye mbwakare kwetu, ko Ruho oro naha kwetu.