¹ Enwe vance, ndimiñolera ezi zintu ye kamusha tendi ecivi. Kono heva kwina ozyo atenda civi, tukwesi muzyimanini kwe Shwetu, Jeso Kereste, ozyo arukite. ² Eye nga ma vutukiro ezivi zetu, mi kali nzetu vulyo, kono efasi lyonshe. ³ Kakwe mpaho tuzyi ye tumuzyi: heva tulivika muntaero zakwe. ⁴ Ozyo ata ye, ''Ndizyi Nyambe,'' kono nasha viki entayero, ndisi mbuzi, mi eniti yazya kwina neye. ⁵ Kono yenshe ozyo avika ezywi lyakwe, ovuniti, bwina kozyo muntu ye ne lato lya Nyambe nilya peteha. Keci tuzyi twina kwakwe. ⁶ Ozyo ata ye ndisiyara kwa Nyambe aswanezi eye mwini kuyenda mbwe ndi Jeso Kereste vuti kayenda. ⁷ Vashakiwa, ndaazya me kumi ñolera omurawo muya kwenu, kono owo murawo ya kare ni kamukwesi kuzwa kuntanzi. Omurawo wakare ndi zywi elyo ni mwashuwa. ⁸ Ee ndimi ñolera murawo muya kwenu, owo weniti ka Kereste ni kwenu, kakuli efifi selizwako, mi eseri lye niti seli munikite ko. ⁹ Ozyo ata ye eye ena mwi seri natoyete mukwakwe mwi fifi ashina kurata hanu. ¹⁰ Ozyo ata ye ashaka omukwakwe asiyara mwiseri mi kwaazya ecivaka ce zishunshu kwali. ¹¹ Kono ozyo atoyete mukwakwe mwi fifi ena mi mwi fifi ashiyenda; kazyi oko aya, kakuli efifi libwikite ha mensho akwe. ¹² Ndimi ñolera kwenu, yera vance, kakuli ezivi zenu zakwatirwa kevaka lye zina lyakwe. ¹³ Ndimi ñolera kwenu, tata, kakuli muzyi ozyo azwa kuntanzi. Ndimi ñolera kwenu, mwevarova, kakuli nimwa koma ovuvi. Ninda ñolera kwenu, kuvance vadana, kakuli shemuzyi Tata. ¹⁴ Ninda ñolera kwenu, tata, kakuli mumuzyi ozyo azwa kuntanzi. Ninda ñolera kwenu, mwevarova, kakuli mugorete, mi ezywi lya Nyambe lisiyara kwenu, mi nimwa koma omivi. ¹⁵ Mwasa shaki efasi kapa ezintu zina mufasi. Heva kwina ozyo ashaka efasi, elato lya Nyambe lya kwaazya kwakwe. ¹⁶ Kakuli zonshe zina mufasi-nji ntakazo yenyama, entakazo za mensho, mi nokulikumuseza ovumi-kazizwi kwa Tata kono zizwa kufusi. ¹⁷ Efasi ne ntakazo zalyo zimana. Kono enshe ozyo apanga okushaka kwa Nyambe arakara oko kakumani. ¹⁸ Vance vadana, nji nako ya ma mani-mani. Shinaho nimwa shuwa ye omuzokeri akezyite, hanu vungi bwa vazokeri shiva nahuli. ¹⁹ Kezi tuzyi ye eyo nji nako ya ma mani-mani. Nivazwa kwetu, kono kali kavazwa kwetu. Kakuli nali kwetu kavazwa nali nani vakara neswe. Kono aho shivaya kunje, nkokusunda ye kali kwetu kava zwa. ²⁰ Kono mukwesi okusingiwa kuzwa kozyo Acenete Enke, mi mweshe muzyi eniti. ²¹ Kali ninda ñora ye tema kamuzyi eniti, kono kakuli muizyi mi kakuli kwaazya embuzi kuzwa kuvuniti. ²² Cware omuhata ndini kono ozyo ashampura ye Jeso kali ndi Kereste? Ozyo muntu muzokeri, kuzwa ho ashampura Tata mi no Mwana. ²³ Kwaazya ozyo ashampura Mwana akwesi Tata. Enshe ozyo azyi Mwane akwesi Tata. ²⁴ Kenu cware, mureke eco nimwashuwa kuzwa kuntanzi cikare kwenu. ²⁵ Heva eco ni mwashuwa kuzwa kuntanzi necikara kwenu, nenwe mbomukare ku Mwana mi nikwa Tata. Mi eyi nje nsepiso naha kwetu: ovumi kavumani. ²⁶ Ninda ñolera ezi zintu kwenu kuamana navo ni va mihome. ²⁷ Kwenu cware, okusingwa oko ni mwatambura kuzwa kwakwe kukere nenwe, mi kali nemushake zyumwi ye amirute. Kono okumisinga kwakwe mbokumirute ezintu zonshe mi njiniti mi kali nkuhoma, mi shina ho ninda miruta, kukare kwenu. ²⁸ Mi hanu, yela vance, mukare kwakwe, kupangira ye aho shaka nali vonahaze, netuve okugora mi kali netuve nenshoni havuso bwakwe mukukezya kwakwe. ²⁹ Heva muzyi ye arukite, muzyi ye yenshe atenda nenja na pepwa kwakwe.