1 بَصَّحْ الْزُوخْ مَا يَنْفَعْنِي قِي حَتَّى شِي. و دُورْكْ نْفُوتْ لَشِي أَلِّي كَشْفَهْ لِّي الْرَّبْ و الإِعْلاَنَاتْ تَعَهْ. 2 نَعْرَفْ إِنْسَانْ فَالْمَسِيحْ قْبَلْ أَرْبَعْطَاشْ سْنَة. فَالْجَسَدْ؟ مَا نَعْرَفْ، و لاَ خَارَجْ الْجَسَدْ؟ مَا نَعْرَفْ. الله يَعْلَمْ. أَتَرْفَدْ هَدَا لَسْمَا الْثَّالْثَة. 3 و نَعْرَفْ هَادْ الإِنْسَانْ فَالْجَسَدْ ولاَ خَارَجْ الْجَسَدْ؟ مَا نَعْرَفْ. الله يَعْلَمْ- 4 أَتَرْفَدْ لَلْفِرْدَوسْ، و سْمَعْ كْلاَمْ يَدْهَشْ مَا يَتَهْدَرْشْ بِهْ، و حَتَّى إِنْسَانْ مَا عَنْدَهْ الْحَقْ يَهْدَرْ بِهْ. 5 و مَنْ هَادْ الْجِهَة نْزُوخْ. بَصَّحْ مَنْ جِهَة نَفْسِي مَا نْزُوخْ غِيرْ بَالْضُعْفْ تَعِي. 6 و إِذَا بْغِيتْ نْزُوخْ مَا نْبَنْشْ بَهْلُولْ، عْلَى خَاطَرْ رَانِي نْڤُولْ الْحَقْ. بَصَّحْ مَا نْدِيرْشْ هَادْ الْشِي بَاشْ مَا يَشْفُوفْنِي حَتَّى وَاحَدْ فُوڤْ الْلاَزَمْ و أَلِّي سَمْعُوهْ عْلِيَّ. 7 و بَاشْ مَا نَتْكَبَرْشْ بْهَادْ الإِعْلاَنَاتْ، تْمَدَتْ لِّي شُوكَة فَالْجَسَدْ، كَلِي مَلاَيْكَةْ الْشِيطَانْ يَضْرَبْنِي بَاشْ مَا نَرْفَدْشْ رُوحِي. 8 عْلَى جَالْهَا تْضَرَعْتْ ثَاثْ مَرَّاتْ لْ الرَّبْ مَا ڤْلَعْهَاشْ مَنِّي. 9 ڤَالْ لِي: " تَكْفِيكْ نِعْمَتِي، عْلَى خَاطَرْ قَوْتِي فَالْضُّعْفْ تَكْمَلْ". و بْكُلْ فَرْحْ نْزُوخْ فَالْضُعْفْ تَعِي، بَاشْ تَتْحَطْ عْلِيَّى قُوَّة الْمَسِيحْ. 10 عْلَى جَالْ الْمَسِيحْ نَفْرَحْ بَالْضَّعَفَاتْ و الْسَبَانْ والْضِيقَاتْ و الإِضْطِهَادَاتْ. عْلَى خَاطَرْ كِي نْكُونْ ضْعِيفْ تَمَا نْكُونْ قْوِي. 11 رَانِي وَ لِيتْ بَهْلُولْ و أَنَا نْزُوخْ. أَنْتُمَ حَتَمْتُونِي! كَانْ لاَزَمْ تَشَكْرُونِي أَنْتُمْ، عْلَى خَاطَرْ مَا يْخَصْنِي حَتَّى شٍي عَلَى الْرُّسُلْ الْكْبَارْ، حَتَّى إِذَا أَنَا وَالُو. 12 و عَلاَمَاتْ الْرُّسُولْ نْدَرَتْ بِينَاتْكُمْ فْكُلْ صَبْرْ، بْمُعْجِزَاتْ و عْجَايَبْ و قُوَّاتْ. 13 وَاشْ كَا نَقَصْ لْكُمْ عْلَى الْكَنَائِسْ لُخْرِينْ، غِيرْ مَلِّي مَا ثَقَلْتْشْ عْلِيكُمْ؟ سَامْحُونِي عْلَى هَادْ الْظُّلْمْ! 14 هَادِي هِيَى الْمَرَّة الْثَالْثَة أَلِّي رَانِي وَاجَدْ أَنْجِي لْعَنْدْكُمْ و مَا نَثْقَالَشْ عْلِيكُمْ. عْلَى خَاطَرْ مَا نْحَوَسْشْ عْلَى لِّي عَنْدْكُمْ بَصَّحْ نْحَوَسْ عْلِيكُمْ. عْلَى خَاطَرْ مَلاَزَمْشْ الْشَاشْرَة هُمَا أَلِّي يْلَيْمُوا لَلْوَالْدِينْ، الْوَالْدِينْ هُمَا أَلِّي يْلَيْمُوأ لَشَاشْرَة. 15 و أَنَا بْكُلْ فَرْحْ نَصَرَفْ و نْضَحِي بْرُوحِ عَلَى جَالْكُمْ، و كُلْ مَا تْزِيدْ مْحَبْتِي لِيكُمْ نَتْحَّبْ قَلْ! 16 و يْكُونْ كِمَا هَاكْ. أَنَا مَاثَقَلْتْشْ عْلِيكُمْ، و إِذَا كُنْتْ خَايَنْ رَانِي خْوَنْتْكُمْ بَالْخْدَعْ! 17 كَاشْ مَا طْمَعْتْ فِيكُمْ بْوَاحَدْ مَلِّي أَرْسَلْتْهُمْ عَنْدْكُمْ؟ 18 طْلَبْتْ مَنْ تِيطُسْ يْجِي عَنْدْكُم و أَرْسَلْتْ مَعَهْ الأَخْ. كَاشْ مَا طْمَعْ فِيكُمْ تِيطُسْ؟ مَاشِي تْمَشِينَا بْرُوحْ و بْخَطْوأتْ وَاحْدَة؟ 19 وأَنْتُمْ رَا كُمْ حَاسْبِينْ بَلِّي رَانَا نْدَفْعُوا عْلَى رْوَاحْنَا عَنْدْكُمْ؟ ڤُدَامْ الله فَالْمَسِيحْ رَانَا نَهَدْرُوا. بَصَّحْ كُلْ شِي يَا حْبََابْنَا عْلَى جَالْ بَنْيَانْكُمْ. 20 عْلَى خَاطَرْ رَانِي خَايَفْ إِذَا جِيتْ مَا نَلْقَكُومْشْ كِمَا بْغِيتْ، و تَلْقَاوْنِي فِي حَالَة مَا تْبْغُوهَاشْ. و يْكُونْ بَزَافْ مَالْخُصُومَاتْ و الْحْسَدْ و الْزْعَافْ و الْنَمِيمَة والْتَحَزُبْ و الْتَكْبَارْ و الْتَشْوِيشْ. 21 و رَانِي خَايَفْ يَذَلْنِي إِلَهِي عَنْدْكُمْ، و يْكُنْ حَزْنِي كْبِيرْ مَنْ أَلِّي غَلْطُوا مَقْبَلْ و مَا تَبُوشْ عْلَى الْنْجَاسَة و الْزْنَا و الْعِيبْ أَلِّي دَارُوهْ.