1 نَتْمَنَى تَحْتَمْلُوا الْغَبَاوَة تَاعِي شْوِيَة! بَصَّحْ أَنْتُمَ تَحْتَمْلُونِي. 2 رَانِي نْغِيرْ مَنْكُمْ غِيْرَة الله، عْلَى خَاطَرْ خْطَبْتْكُمْ لْرَاجَلْ وَاحَدْ، بََاشْ نْقَدَمْ عْذْرَاءْ نْقِيَة لَلْمَسِيحْ. 3 بَصَّحْ رَانِي خَايَفْ يَصْرَالْكُمْ كِمَا خَدْعَتْ الْلَّفْعَة حَوَّاءْ بَالْحِيلَة تَعْهَا، تَتَخْدَعْ عْقُولْكُمْ مَنْ بَسَاطَة الْمَسِيحْ. 4 و إِذَا وَاحَدْ يْبَشَّرْلْكُمْ بْيَسُوعْ أَخَرْ مَا بَشَّرْنَاشْ بِهْ حْنَا، و لاَ تَقَبْلُوا رُوحْ اُخْرَى مَنْ غِيرْ الْرُّوحْ الْقُدُسْ، ولاَ إِنْجِيلْ أَخَرْمَا تَعَرْفُوهْشْ، رَاكُمْ مَحْتَمْلِينْ هَادْ الْشِي بْفَرْحْ! 5 و رَانِي حَاسَبْ رُوحِي مَا يْخَصْنِي وَالُوا عْلَى الْرُّسُلْ الْكْبَارْ. 6 حَتَّى و إِذَا كُنْتْ نَهْدَرْ بَكْلاَمْ الْعَامَة مَاشِي فَصِيحْ، مَا تْخَصْنِيشْ مَعْرِفَة، و وَرِنَلْكُمْ كُلْ شِي ڤُدَامْ ڤَاعْ الْنَّاسْ. 7 ولاَ الْغَلْطَة تَاعِي مَلِّي بَشَّرْتْكُمْ بَالإِنْجِيلْ بْلَّى خْلاَصْ و نَقَصْتْ مَنْ قَدْرِي بَاشْ يْزِيدْ قْدَرْكُمْ؟ 8 ظْلَمْتْ كْنَايَسْ أُخْرِينْ كِي تْحَمْلُوا مَصْرُوفْ خِدْمَتْكُمْ، و كِي كُنْتْ حَاضَرْ عَنْدْكُمْ و أَحْتَجْتْ، مَا ثَقَلْتْ عَلَى وَاحَدْ مَنْكُمْ. 9 عْلَى خَاطَرْ إِحْتِيَاجِي خَلْصُوهْ الْخُوتْ أَلِّي جَاوْ مَنْ مَكِدُونِيَّة. و فِي كُلْ شِي مَا بْغِتْشْ نَثْقَالْ عْلِيكُمْ، و نَحْفَظْهَا 10 ومَادَامْ حَقْ الْمَسِيحْ فِيَّى. وَاحَدْ مَا يْحَبَسْ الْزُوخْ هَدَا تَعِي فِي بْلاَدْ أَخَائِيَّة. 11 عْلاَشْ؟ عْلَى خَاطَرْ مَا نْحَبْكُومْشْ؟ الله يَعْلَمْ. 12 بَصَّحْ نْدِيرْ الْشِي أَلِّي رَانِي نْدِيرَهْ دُورْكْ بَاشْ نْبَطَلْ الْسَبَة تَعْ اَلِّي رَاهُمْ يْحَوْسُوا عْلَى سَبَة تْبَيَنْهُمْ كِمَا حْنَا فَالْشِي لِّي يْزُوخُوا بِهْ. 13 عْلَى خَاطَرْ نَّاسْ كِمَا هَادُوا هُمَا رُسُلْ كَذَبَة، وخَدَاعِينْ، يْبَدْلُوا صُورَتْهُمْ كَلِي رُسُلْ الْمَسِيحْ 14 و لاَ عَجَبْ. عْلَى خَاطَرْ الْشِيطَانْ نَفْسَهْ يْبَدْلْ صُورْتَهْ لْشْبَهْ مَلاَيْكَة الْنُورْ! 15 مَاشِي مُحَالْ إِذَا خُدَامْ الْشِيطَانْ تَانِي يْبَدْلُوا صُورَتْهُمْ كِي خُدَامْ لَلْبِرْ. أَلِّي أَخْرَتْهُمْ تْكُونْ عْلَى حْسَابْ فْعَالْهُمْ. 16 و نْڤُولْ تَانِي: وَاحَدْ مَا يَحْسَبْنِي بَلِّي بَهْلُولْ، ولاَ أَقَبْلُونِي كِي بَهْلُولْ، بَاشْ نْزُوخْ أَنَا تَانِي شْوِيَة. 17 أَلِّي رَانِي نًهْدَرْ بِهْ مَاشِي عْلَى حْسَابْ الْرَّبْ، بَصَّحْ كِمَا رَانِي نَتْبَهْلَلْ، وهَادَا سَبَابْ الْزُوخْ تَعِي. 18 مَلِّي كَايَنْ شْحَالْ يْزُوخُوا عْلَى حْسَابْ الْجَسَدْ، نْزُوخْ اَنَا تَانِي. 19 كِي رَاكُومْ تَحْتَمْلُوا بَالْفَرْحْ الْبْهَالِيلْ، أَنْتُمَ الْعَاقْلِينْ! 20 و رَاكُمْ تَحْتَمْلُوا: أَلِّي يَسْتَعْبَدْكُمْ! أَلِّي يَاكَلْكُمْ! أَلِّي يَسْتَغْلْكُمْ! أَلِّي يَتْكَبَرْ عْلِيكُمْ! أَلِّي يَضْرَبْكُمْ! عْلَى وْجُوهكُمْ! 21 مَاشِي هَادَا هُوَ الْذَّلْ و نْڤُولْ: شْحَالْ كُنَا ضْعَافْ مْعَاكُمْ! 22 إِذَا هُمَا عِبْرَانِيُّونْ؟ أَنَا تَانِي. إِذَا هُمَا إِسْرَائِيلِيُّونْ؟ أَنَا تَانِي. إِذَا هُمَا مَنْ نَسْلْ إِبْرَاهِيمْ؟ أَنَا تَانِي. 23 إِذَا هُمَا خُدَامْ الْمَسِيحْ؟ نْڤُولْ كِي وَاحَدْ مَهْبُولْ، أَنَا خِيرْ مَنْهُمْ: فَالْتَعْبْ أَكْثَرْ مَنْهُمْ، فَالْضَرْبْ أَكْثَرْ، فَالْحْبُوسْ أَكْثَرْ، فَالْتَعَرَضْ لَلْمُوتْ شْحَالْ مَنْ مَرَّة. 24 مَنْ الْيَهُودْ تَجْلَدْتْ خَمْسَة مَرَّاتْ رَبْعِينْ جَلْدَة غِيرْ وَاحْدَة. 25 ثَلْثْ مَرَّاتْ تَضْرَبْتْ بَالْعْصَى، رَجْمُونِي مَرَّة، ثَلْثْ مَرَّاتْ تْكَسَرْ بِيَا الْبَابُورْ، شْحَالْ مَنْ لِيلَى و نْهَارْ فَوَتْ فِي وَسْطْ الْبْحَارْ. 26 سَافَرْتْ شْحَالْ مَنْ مَرَّة، و شْحَالْ مَنْ حَمْلَة قَبَلْتْ، أَخْطَاْرالْطْريڤْ و الْخِيَانْ، وأَخْطَارْ بْنِي جِنْسِي، و أَخْطَارْ فَالْمْدِينَة، و أَخْطَارْ فَالْصَحْرَى، و أَخْطَارْ فَالْبْحَرْ، و أَخْطَارْ مَنْ خُوتْ كَذَابِينْ. 27 و شْحَالْ عَانِيتْ مَالْتَعْبْ و الْكَدْ، و الْسَهْرَ شْحَالْ مَنْ مَرَّة، و الْجُوعْ و الْعْطَشْ، و الْصْيَامْ شْحَالْ مَنْ مَرَّة، فَالْبَرْدْ و الْعْرَى. 28 و فُوڤْ ڤَاعْ هَادْ الْمَخَاطَرْ: زَادْ عْلِيَا الْضَغْطْ يُومْ وْرَى يُومْ، مَلِّي أَرْفَدْتْ هَمْ ڤَاعْ الْكَنَائِسْ. 29 كَايَنْ اَلِّي يَضْعَفْ و أَنَا مَا نَضْعَفْشْ؟ و أَلِّي يَغلَطْ و أَنَا مَا نَتَحْرَڤْشْ؟ 30 و إِذَا لاَزَمْ نْزُوخْ، نْزُوخْ بْأُمُورْ ضَعْفِي. 31 الله أَبُو رَبِّنَا يَسُوعْ الْمَسِيحْ، أَلِّي هُوَ مُبَارَكْ لَلأَبَدْ، عَالَمْ بَلِّي مَا رَانِيشْ نَكْذَب 32 فِي دِمَشْقْ، الْوَالِي أَلِّي حَطَهْ الْحَارِثْ السَلْطَانْ كَانْ يْعَسْ مْدِينَة الْدِّمَشْقِيِّينْ، بَاشْ يَحْكَمْنِي، 33 بَصَّحْ هَوَّدْتْ مَالْطَاقَة الْصُورْفِي سَلَة، و سْلَكْتْ مَنْ يَدَّهْ.