1 Thurai hai CHAKRAMANG Isu Krista nar Jakawb dow, halai pre chen lowra pren chamtauet miuüa dow, mami chasak krawirui mih chekhai athaulangma pacham uowi lah. OWMRA HAI CHAINGRA 2 Aw ang tainauuüa low, chaingra maten enni nakrum mih khin khe alup awmrawm lawnguan pami katuakah bowk büah diah. 3 Hanow, enni owmra chaingah hai uowi mih kowi nowngia kham ngare khai mih enni kiangah chekhai pami tukah chekhai rakowi. 4 Nami anowngma kowi iakham ngare mira dow, tachi dowi mira uowi dowi hai maru kowi peta chiah khai, maru kowi akümma tawpah khai now, lowra lawnguan kowi nangare dowi kownkow pakhai. 5 Enni pungma dawng kowi lowra maru chanlaira mih kadowi hanow, maru maiow tut-e nadowi hai akawlawma hai pe reng miia Thurai tut-e dow pacham lü-ah, napeah kown. 6 Natarap chedow owmra kami hai lawm, owm dowi miia kowi dow, li mih sata tui kowi hutah khe kow tui alowng pün mih iawng nakown chekhai. 7 Nami maru mih CHAKARMANG tut-e hown kow matawng paw naka kown mih hang pa taming lah. 8 Tawngplawng, naiawngmi maru saktuak anik aklik uowi dowi mih aia lup chang mih kowi matawng paw khi khawt dowi chekhai. 9 Tainau ngarawng ngaraima owm mih dow ka khai uowi khe awmrawm mahai pacham uowi lah. 10 Kureng mih paw aia uang kla nem khai mih khin khe paw pa cham awmrawm lah bawrchak pau mih iawng dow aia kureng mih dow nahing kle, na mata kownmi chekhai rakowi. 11 Sat uang lawt hanow, li den mih uang khai, bawr chak mih dow ngawi hanow, apau iun mih dow dow kle, aklawngiung rapaw uang ngawi reng naiawng palawng dow maru kureng mih paw aia pawisa tangka lup kangow luk kowi natam kown mih chekhai. 12 Nami maru nowkah chaiangah khe kow akhi khawtma kowikow khi maiawng mih dow athaulangma uowi mih chekhai nahanow chaingah mih kung kowi CHAKRAMANG aiamat sakrauah miuüa kowi napeah kown khamah mih dow rowsira hai singra luk kruk mih naka kownmi rakowi chekhai. 13 Amiawngiawng mih paw puanra krum mih khin khe, “Thurai mih puan ang mih chekhai” pami hang kow tek lah, Thurai mih dow angak nachang kownkow napuan kown mih mapaw hing nadowi aiamat mih paw katpaw hingta puan dowi. 14 Tawkche lawngtowng büarüa mih kowmatia ngakmi rakowi puanra mih na bowk büah rowt mih chekhai. 15 Nami kung kowi kowprüa dow uang mu hanow angak uang phuang khai, uang awr iuk awr sown hanow kowngra kowi uang dia-ah khai. 16 Aw, ang sakrauah mih tainauuüa low, puanra kowi hang uowi büah diah. 17 Uan pek iungmi maten hai uan pek aküm ngima khai bowt mih dow, mukuang hownia kow iu uang mih uang thawp mi-ia apa hownia kow uangiu dowm mih chekhai, laiuan kowi anowi mih ra hownia anim matawngiawng chow para hownia chamtasüt chamta sowi nami powmiawng dow aia dow chamtasüt chamta sowi dowi chekhai. 18 Thurai aia uan thawp ün mih pungma dawng kowi narik uih narik pau kownkow aiamat nauah mih krang iawng anowmma mih lai hown singra uam pe a-i mih chekhai. LAIKLOW SÜNTAK HAI LUP CHANG 19 Aw ang sakrauah mih tainau-uüa low, maün mih enni tukah büah diah, tawngplawng enni lawngtowng büarüa mih asüntak pra pacham kamrüt lah, atek pra kunmarau mih lak-e kunma paklamah lah. 20 Tawngplawng, lowra maru kunmarau khai hanow, Thurai naumi iawng tachi tanawma mih lup hing chang dowi mih chekhai. 21 Naiawngmi rakowi sui-iai kaniai mami chaptowng hai angak maten mih kuaktah büah hanow enni saktuak kowi Thurai lai sawtah mih nowngia lawng enni mih dow, towplawng towsakma hai chünah büah diah. 22 Hanow Thurai laiklow süntak krowng chow nadowi hai alup paw chang kla nadowi hanow Thurai laiklow dow sünta tawk che alup dow changah dowi now enni matia takuan mih chekhai. 23 Nachenganchepaw, lowra maru Thurai laiklow sünta miia dow na chediah tawkche hing nau chün dowi mih dow, nimrua hai kow kowmatia powm tamümi iawng chekhai. 24 Nachenganchepaw, kowmatia mih kaneu chow uang tatamüah khai, powtta kuang kowi matawng iawng mih powm chow na khai pami dow, plan kut tamata khai iawk mi-iawng chekhai. 25 Natarap chedow lowra ari-arow akümma nauang pathaulang lah miia kowi dow müah khai kow Thurai lai iawng uowi reng mih hai sünta-ah kow tama dowi hai tangmü reng miia dow, aia lup chang mih sakrui kowi iungra naka kown. 26 Lowra maru kowmatia kowi tachi tanawm-ma pow tatuak mih dow aia kow dai hing mingah khetah dowi mih dow kowmatia takuan mih chekhai, aia towah mih tachira dow matawngpaw hing nadowi chekhai. 27 Thurai mih mik khi mira kowikow tachima mami krang achim asaima hai angak uowi dowi mih dow mami chekhai, siring saratcha hai mamaima uüa amatni ngare khe kow mü mia mih lusa asür alawk tatu takak dowi kow langta hen takuang mih chekhai.