¹ Ang Pawl, Krista kowi kow singra laikham naphuang kown kow Thurai nauah mi iawng Kriata Isu chintakmi dow ang na chekhai. ² Ang lang sakrau ami chapa Timawthe, Pa Thurai hai Chakramang Isu Krista sasing sanara, sakraura hai taking tasangra dow en tut-e pacham uowi reng lah. ³ Uangprek a-i che a-i mamiuüa changmi powm iawng aiung angak tyk lami achim asaima kowi kow aia lup ang chang pe mi Thurai tut-e awmrawm laiklow ang tek mi chekhai. Ni ni uar uar ma kowi ang Thurai chupra kowi atungma ang tukla en reng khai. ⁴ En miktui mi paw ang tukla reng chekhai, apiawma hai kow nata kümla iawkkown mi kaneuma ang prüa ching. ⁵ En owmra anowm mami krang mipaw atungma ang tukla reng, en pi Lawisi hai en u Enuk iüa kami en mih paw en tawika ngamlam khowk mih pami ang tuk khai. ⁶ Nami rakowi dow en luk kowikow ang tang en rut mih khin khe Thurai uan pek en kami lün pat en nahutah kownkow nakut plan tek en iawk kown mih ang nau chekhai. ⁷ Thurai lümla a-i kami uangpa krampu a-i dowi chekhai, kürün, sakraura ün kowmatia nowngtowla kheti lami ün uangpe a-i rowt mih chekhai. ⁸ A-i CHAKRAMANG laiklow mih kuang hang kow rukrai diah, aia mat pra kowikow klathawng mih mikowi paw hang kow hing rukraila ang diah; Thurai kür sak owm hai satangiung rakowi kowh nganre tawi uam khamah iawlaw rowt diah. ⁹ A i lup chang mira kowi nadowi aia mat khowmah bowkah mih krang nakhai rowt rakowi sanara hai uang lawng a-i khai, achimasaima nasingla kownkow uang haw uanglai ang mih chekhai. Krista Isu kowi dow krawng uang phuaru dowi rawn mih aia saksingsanara mih dow uang peta ang khowk. ¹⁰ Chenganchepaw akawmat mih uanglawng ang mih ia Krista Isu uang khe nami dow uang tüng takhai bowt tak, satangiung kowi mih singra hai nowngia kowng dowi mihra uang krawi tüngta khai bowt chekhai. ¹¹ Ang mih nami laiklow naphuangla kownkow chintakmi hai tüngsang mih kowi klow ang mih dow nakhai. ¹² Naiawng mih rakowi dow chekhai akwamat mih paw maiawngmi ngare ang kham mih nachenganchepaw ang ruk rai dowi chow ang owm khai mih dow ang tuk, ang appe mih dow nami nih dow achima nanowngia towah pami achangma ang tuk mih chekhai. ¹³ Ang hownia kowikow en tukah reng mih tatüng tasangra akowiung mih nalang chünah kown tawngah kengah diah, Isu Krista owmmi rahai sakruara kowi mih dow hing uowi taah büah diah. ¹⁴ Enni pangkawt kowi tabat hüah mih uan pek krang mami a-i matia kowi uowi reng mih lümla sai tawngkeng mih hai paw hing uowitah hüah diah. ¹⁵ Asia Pren kowi kowh maru miuüa Fogel hai Hermogen iüah pat mih cham dung kung kleumai taah khai pami en tuk chow. ¹⁶ CHAKRAMANG dow Ownsiphowr büah kim chak kowi sanara pachampeah lah, amtni dow lainowmma paawmrawm ang khai, ang kla thawng mih rukraila ang büah dowi chakhai. ¹⁷ Rom kua kowi aia uang ting khai akrowk sang alenma uang krawi cham ang kria chekhai. Efisi kua kowi mih paw lainowm ma tawi khowng ang mih krang achangma en tuk chow. ¹⁸ CHAKRAMANG dow nami ni kowi dow aia sanara mih dow pacham paka lah.