¹ Irekomandarko kadakayo ti kabsattayo a babai a ni Foebe, nga adipen iti iglesia nga adda idiay Senkrea, ² tapno mabalin nga awatenyo isuna iti Apo. Aramidenyo daytoy iti wagas a maikari kadagiti namati, ken agtakderkayo iti sibayna iti aniaman a banag a pakasapulanna kadakayo, ta nagbalin isuna a katulongan iti kaadduan ken uray pay kaniak. ³ Kablaawanyo da Prisila ken Akila, dagiti kaduak a trabahador kenni Kristo Jesus, ⁴ a nagpeggad ti biagda gapu kaniak. Agyamanak kadakuada, ken saan laeng a siak, ngem uray pay dagiti amin nga iglesia dagiti Hentil. ⁵ Kablaawanyo ti iglesia nga adda iti pagtaenganda. Kablaawanyo ti ay-ayatek nga ni Epeneto, nga isu iti immuna a bunga iti Asia a maipaay kenni Kristo. ⁶ Kablaawanyo ni Maria, a nagtrabaho iti kasta unay para kadakayo. ⁷ Kablaawanyo da Adronico ken Junia, a kabagiak, ken dagiti padak a balud. Nalatakda kadagiti apostol, nga addada met ken Kristo sakbay kaniak. ⁸ Kablaawanyo ni Ampliato, ti ay- ayatek iti Apo. ⁹ Kablaawanyo ni Urbano, ti padatayo a trabahador kenni Kristo ken Estakis nga ay- ayatek. ¹⁰ Kablaawanyo ni Apeles, ti napaneknekan ken ni Kristo. Kablaawanyo dagiti adda iti sangakabbalayan ni Aristobulo. ¹¹ Kablaawanyo ni Herodion, a kabagiak. Kablaawanyo dagiti adda iti sangakabbalayan ni Narsiso nga adda iti Apo. ¹² Kablaawanyo ni Trifena ken Trifosa, nga agtrabtrabaho iti kasta unay iti Apo. Kablaawanyo ti inay-ayat a ni Persis, nga adu iti natrabahoanna iti Apo. ¹³ Kablaawanyo ni Rufo, a napili para iti Apo, ken ti inana ken inak. ¹⁴ Kablaawanyo ni Asincrito, Flegon, Hermes, Patrobas, Hermas, ken dagiti kakabsat nga adda kadakuada. ¹⁵ Kablaawanyo da Filologo ken Julia, ni Nereo ken ti kabsatna a babai, ken ni Olimpas, ken dagiti amin a namati nga adda kadakuada. ¹⁶ Kablaawanyo ti tunggal maysa iti nasantoan nga agek. Kablaawannakayo amin nga iglesia ni Kristo. ¹⁷ Guyogoyenkayo ita kakabsat, agannadkayo maipanggep kadagiti mangpatpataud iti panagsisina ken pakaitibtibkulan. Lumablabesda iti sursuro a naadalyo. Adaywanyo ida. ¹⁸ Ta saanda nga agserserbi kenni Kristo nga Apotayo dagitoy a tattao, ngem dagiti bukodda a tian. Allilawenda dagiti puso dagiti awan basolna babaen iti panagsaoda ti naalumamay ken nalabes a panangipadayaw. ¹⁹ Ta nakadanun iti tunggal maysa ti pagulidanan iti panagtulnogyo. Makipagragrag-oak ngarud kadakayo, ngem kayatko nga agbalinkayo a masirib no ania iti naimbag, ken awanan iti ammo iti dakes. ²⁰ Rumekento ti Dios iti kappia ni Satanas iti mabiit babaen kadagiti sakayo. Adda koma kadakayo ti parabur ni Apotayo a Jesu-Kristo. ²¹ Kablaawannakayo ni Timoteo padak a trabahador, ken Lucio, Jason, ken Sosipato, a kabagiak. ²² Siak, ni Tercio, a nangisurat iti daytoy, kablaawankayo iti Apo. ²³ Kablaawannakayo ni Gayo, ti nangsangaili kaniak ken iti entero nga iglesia. Kablaawannakayo ni Erasto a tesorero iti siudad, ken ti kabsat a ni Kuarto. ²⁴ Adda koma kadakayo ti parabur ni Apotayo a Jesu-Kristo. ²⁵ Ita, kenkuana a mangpatakder kadakayo maiyannurot iti ebangheliok ken ti ikaskasaba ni Jesu- Kristo, kas maiyannurot iti nailatak a palimed a naidulin a nalimed iti nabayagen, ²⁶ ngem naiparangen ken naipakaammo itan babaen kadagiti naipadto a nasantoan a sursurat kadagiti nasyon, a maiyannurot iti bilin iti agnanayon a Dios, a mangiturong iti panagtulnog iti pammati- ²⁷ para iti maymaysa laeng a masirib a Dios, babaen kenni Jesu- Kristo, maadda koma kenkuana ti dayag iti agnanayon. Amen.