¹ Ita, datayo a napigsa ket masapul a tulongantayo iti pagkapsutan dagiti nakapsut, ken saan a masapul a padayawen iti bagbagitayo. ² Ti tunggal maysa kadatayo ket padayawenna iti kaarrubana iti dayta a nasayaat, tapno mapatibker isuna. ³ Ta uray ni Kristo ket saanna a pinadayawan iti bagina. Ngem ketdi, daytoy ket kas naisurat, "Natnag kaniak dagiti panangpabain dagiti nangpabain kadakayo." ⁴ Ta no ania iti naisurat iti naglabas ket naisurat para iti pakasursuroantayo tapno babaen iti kinaanus ken babaen iti panangpabileg iti nasantoan a sursurat ket maaddaan tayo iti namnama. ⁵ Ipaay koma ita ti Dios kadakayo iti kinaanus ken pannakapabileg iti agpada a panunot ti tunggal maysa a maiyannurot kenni Kristo Jesus. ⁶ Aramidenna koma daytoy tapno iti maymaysa a panunot ket mapadayawanyo ti Dios ken Ama ti Apotayo a ni Jesu-Kristo. ⁷ Awatenyo ngarud iti tunggal maysa, a kas panangawat met ni Kristo kadakayo, iti pammadayaw iti Dios. ⁸ Ta ibagak a nagbalin nga adipen ti pannakakugit ni Kristo iti biang ti kinapudno iti Dios, tapno maipatungpalna dagiti kari a naited kadagiti amma, ⁹ ken tapno itan-ok dagiti Hentil ti Dios gapu iti asina. Kas naisurat, "Mangtedakto ngarud iti pammadayaw kenka kadagiti Hentil ken agkantaakto ti pagdaydayaw iti naganmo." ¹⁰ Imbagana pay daytoy, "Agrag-okayo, dakayo a Hentil, kadagiti tattaona." ¹¹ Kunana manen, "Idaydayawyo ti Apo, dakayo amin a Hentil; Idaydayaw koma amin a tattao isuna." ¹² Ibagbaga manen ni Isaias, "Addanto iti kaputotan ni Jesse, ken ti tumakderto nga agturay kadagiti Hentil; maaddaanto iti talek dagiti Hentil kenkuana." ¹³ Punoennakayo koma ti Dios iti namnama iti amin a rag-o ken kappia iti panamatiyo, tapno dumakkel ti namnamayo babaen iti pannakabalin ti Santo Espiritu. ¹⁴ Mamatiak mismo maipanggep kadakayo, kakabsatko. Mamatiak met a napnoankayo iti kinaimbag, napnoan iti amin a pannaka-ammo. Mamatiak met a kabaelanyo iti mangbagbaga iti tunggal maysa. ¹⁵ Ngem ad-adda a timmuredak nga agsurat kadakayo maipanggep iti sumagmamano a banbanag tapno palagipankayo manen, gapu iti parabur nga inted ti Dios kaniak. ¹⁶ Daytoy a parabur ket tapno agbalinak nga adipen ni Kristo Jesus a naibaon kadagiti Hentil, tapno idaton a kas padi ti ebanghelio iti Dios, tapno agbalin a makaay-ayo iti panagidatdaton dagiti Hentil, nasantipikar babaen iti Santo Espiritu. ¹⁷ Kenni Kristo Jesus ket adda rasonko nga agpannakkel iti serbisyok para iti Apo. ¹⁸ Ta saanak nga agbain a mangibaga iti aniaman a banag malaksid ti naaramidan ni Kristo babaen kaniak gapu iti panagtulnog dagiti Hentil. Naaramid dagitoy a banbanag babaen iti sao ken aramid, ¹⁹ babaen ti pannakabalin dagiti pagilasinan ken dagiti nakakaskasdaaw, ken babaen ti pannakabalin ti Espiritu iti Dios. Isu a manipud iti Jerusalem, ken agingga iti kas kaadayo iti Ilirico, naan-anay a naikasabak ti ebanghelio ni Kristo. ²⁰ Iti kastoy a wagas, tarigagayko iti mangiwaragawag ti ebanghelio, ngem saan nga ti lugar a naam-ammon iti nagan ni Kristo, tapno saanak a mangipatakder manen iti pondasion ti sabali a tao. ²¹ Kas naisurat: "Dagiti immay a saan pay a nakadamag kenkuana ket makitadanto isuna, ken maawatanto dagiti saan pay a nakangngeg." ²² Nalapdanak met ngarud iti namin-adu a daras iti iyuumayko kadakayo. ²³ Ngem ita, awanakon ti lugar kadagitoy a rehion, ken tinartarigagayak iti ad-adu pay a tawen nga iyuumayko kadakayo. ²⁴ Namnamaek a makitakayo iti ilalabasko ijay Espania, ken agpatulodak iti dalanko kadakayo, kalpasan a makipagragsakak kadakayo iti apagbiit. ²⁵ Ngem mapanakon ita idiay Jerusalem, tapno agserbi kadagiti namati. ²⁶ Ta pakaragsakan dagiti taga Masedonia ken taga Akaia ti mangted iti tulong kadagiti nakurapay kadagiti namati nga adda idiay Jerusalem. ²⁷ Wen, pakaragsakanda, ken isuda dagiti nakautang kadakuada. Ta no nakibingay dagiti Hentil kadagiti naespirituan a banbanag, ket nakautangda met kadagiti Judio nga agministroda babaen kadagiti material a banbanag. ²⁸ Ngarud, inton maleppaskon daytoy nga trabaho ken masiguradok nga naawat da amin a nakolekta, mapanakton idiay Espania ket bisitaen kayo iti dalanko. ²⁹ Ammok dayta nga inton umayak kadakayo ket napnoan iti bendision ni Kristo. ³⁰ Ita guyugoyenkayo, kakabsat, babaen kenni Apotayo a Jesu-Kristo, ken babaen iti ayat iti Espiritu, a buyogandak iti nainget a panagkararagyo iti Dios para kaniak. ³¹ Ikararagyo a mailisiak koma kadagiti saan nga agtulnog idiay Judea, ken maawat koma iti panagserbik iti Jerusalem kadagiti namati a tattao ti Dios. ³² Ikararagyo a makaumayakto koma kadakayo a sirarag-o babaen iti pagayatan ti Dios, ken tapno koma agkakaduatayo, a makasarak iti inana. ³³ Sapay koma ta adda kadakayo amin iti Dios a mangted ti kappia. Amen.